Read Fulfulded Ezekiyel 48 Bible Online

Ezekiyel 48 - Fulfulded bible

Ezekiyel 48

¹Ndaa inɗe le'i bee geɗe maaji: Keerol lesdi woylawol yahan diga mbeela gal fuunaaŋge haa berniwol Hetilon, nden gal nastirde Hamat, diga ton boo haa Hacar-Enon haa keerol hakkunde lesdi Damas e lesdi Hamat. Ɗum geɗal lenyol Dan. Ɗum fuɗɗan diga keerol fuunaaŋgewol haa yotto Mbeela haa hiirnaaŋge.

²Diga keerol fuunaaŋgewol haa keerol hiirnaaŋgewol, lenyol fuu heɓan tayre lesdi. Ndaa nii tokkindirki le'i diga woyla haa fombina: Dan, Aser, Neftali, Manassa, Efrayim, Ruben, Yahuuda.

⁸Ɓaawo geɗal Yahuuda, keerol diga fuunaaŋge haa hiirnaaŋge mbeela, cene tayre man. Njaajirka maare, kilomeetir sappo e ɗiɗi bee reeta. Njuutirka maare diga fuunaaŋge haa hiirnaaŋge, kal-kal bee geɗe le'i. Haykaliiru daroto haa caka maare.

⁹Geɗal ngal cenoton ngam Jawmiraawo nder tayre man, njuutirka maagal laato kilomeetir sappo e ɗiɗi bee reeta, njaajirka maagal boo, kilomeetir sappo.

¹⁰Liman'en keɓan tayre muuɗum'en haa geɗal cenaaŋgal nga'al. Njuutirka maare haa woyla e fombina, kilomeetir sappo e ɗiɗi bee reeta. Njaajirka maare haa fuunaaŋge e hiirnaaŋge, kilomeetir jowi. Haykaliiru Jawmiraawo daroto haa caka tayre man.

¹¹Nde laatanto liman'en, danygol Cadok. Kamɓe ɓe tokki jagganaago Jawmiraawo, saa'i Isra'iila'en luttuɓe ngayliti, acci mo. Ɓe accaay mo bana Lewi'en woɗɓe.

¹²Ngam maajum ɓe keɓan tayre lesdi ɓurnde senaago ngam Jawmiraawo, haa keerol tayre Lewi'en woɗɓe.

¹³Lewi'en boo keɓan tayre muuɗum'en, nde tiitotiran bee tayre liman'en. Njuutirka maare, kilomeetir sappo e ɗiɗi bee reeta, njaajirka maare boo, kilomeetir jowi.

¹⁴Geɗal lesdi nga'al woni ɓurŋgal wooɗugo. On potaay soorrugo koo ɗume haa maagal, koo sannjugo ngal bee nokkuure woɗnde, koo hokkugo ngal goɗɗo feere. Ngam ngal cenaaŋgal ngam Jawmiraawo.

¹⁵Haa tayre senaande nde'e, nokkuure luttan, njuutirka maare, kilomeetir sappo e ɗiɗi bee reeta, njaajirka maare boo, kilomeetir ɗiɗi bee reeta. Nde laatanto berniwol ngam nyiɓugo cuuɗi e durugo dabbaaji ton. Berniwol jooɗoto haa caka maare.

¹⁶Ndaa poondol berniwol: Haa woyla e fombina e fuunaaŋge e hiirnaaŋge, haa bakeeje nayi fuu, kilomeetir ɗiɗi bee reetita.

¹⁷Durduɗe taaroto berniwol haa bakeeje nayi fuu. Njaajirka maaje, meetir teemerre bee noogas e jowi (125).

¹⁸Luttuɗum tayre berniwol, haa wakeere geɗal cenaaŋgal, waato kilomeetir jowi gal fuunaaŋge, kilomeetir jowi boo gal hiirnaaŋge, ɗum laato gese ngam huuwanɓe nder berniwol.

¹⁹Huuwanɓe nder maagol, iwɓe haa le'i Isra'iila fuu ndemata ɗe.

²⁰Geɗal lesdi cenaaŋgal fuu, hawtaade bee tayre berniwol, waɗan kilomeetir sappo e ɗiɗi bee reeta haa bakeeje nayi fuu.

²¹Ɓaawo on ta'i geɗal cenaaŋgal ngam Jawmiraawo, luttuɗum tayre lesdi go laatanto laamiiɗo, waato gal fuunaaŋge haa yotto keerol lesdi, gal hiirnaaŋge boo haa yotto Mbeela. Geɗal cenaaŋgal ngam Jawmiraawo bee haykaliiru dow maagal e maral Lewi'en e maral berniwol fuu, ɗon haa caka tayre man. Njaajirka tayre man luttunde, kilomeetir sappo e ɗiɗi bee reeta. Nde ɗon hakkunde geɗal Yahuuda haa woyla e geɗal Benyamin haa fombina.

²³Haa fombina tayre man, lenyol luttuŋgol fuu heɓan tayre lesdi, diga keerol fuunaaŋgewol haa keerol hiirnaaŋgewol. Tokkindirki le'i diga woyla haa fombina: Benyamin, Simeyon, Issakar, Zabulon, Gada.

²⁸Haa fombina geɗal Gada, keerol ummoto diga Tamar gal hiirnaaŋge, haa yotto ndiyamji Meriba haa Kaades. Diga ton ngol tokkoto maayel Misra gal hiirnaaŋge, haa yotto Mbeela.

²⁹Bana non cenndirton lesdi hakkunde le'i Isra'iila. Kanjum woni lesdi maaji. Lenyol fuu heɓa geɗal muuɗum nder lesdi man. Nii Allah Jawmiraawo wi'i.

³⁰Ndaa dammuɗe berniwol: Mahol taaroto ngol, dammuɗe nder maagol ewnaama bee inɗe le'i Isra'iila. Haa woyla, mahol kilomeetir ɗiɗi bee reetita e dammuɗe tati bee inɗe: Ruben e Yahuuda e Lewi. Haa fuunaaŋge, mahol bee poondol go e dammuɗe tati bee inɗe: Yusufu e Benyamin e Dan. Haa fombina, mahol bee poondol go e dammuɗe tati bee inɗe: Simeyon e Issakar e Zabulon. Haa hiirnaaŋge boo, mahol bee poondol go e dammuɗe tati bee inɗe: Gada e Aser e Neftali.

³⁵Njuutirka mahol taarotooŋgol berniwol fuu, waɗan kilomeetir joweenayi. Yeeso ɗo, innde berniwol laatoto “Jawmiraawo-ɗon-ton”.