Read Fulfulded Ezekiyel 6 Bible Online

Ezekiyel 6 - Fulfulded bible

Ezekiyel 6

¹Ndaa Jawmiraawo wolwani yam, wi'i:

²“Ɓii-Aadama, waylitit yeeso ma gal kooseeje Isra'iila, waɗ annabaaku dow maaje.

³Yeccu ɗe: Onon kooseeje Isra'iila, nane wolde Allah Jawmiraawo. Ndaa nii o wi'i dow kooseeje e towndiije, dow gaaruuji e waadiiji: Ndaa, mi ukkan kaafahi dow mooɗon, mi halkan nokkuuje mon towɗe,

⁴mi wilan kirsirɗe mon, mi fusan gulduɗe uurle mon. Mi do'an mbaraaɓe mon yeeso labbi mon.

⁵Mi wallinan ɓalli maayɓe mon yeeso labbi mon, mi saŋkitan i'e mon baŋnge kirsirɗe mon.

⁶Haa on njooɗoto fuu, berniiji mon laatoto bille, nokkuuje mon towɗe perwan, kirsirɗe mon laatoto bille, labbi mon pusan, nattan, gulduɗe uurle mon ngewan, ko on mbaɗi wiloto.

⁷Ɓalli mbaraaɓe mbaaloto caka mooɗon. Nden kam on paaman min mi Jawmiraawo.

⁸Ammaa mi accan woɗɓe mon bee yoŋki, daɗanɓe kaafahi, saa'i caŋkitanmi on nder ummaatooje goɗɗe.

⁹To ɓe dahaama, ɓe ciftortam. Ngam maajum mi naawnan ɓerɗe maɓɓe daliila daakaareeku maɓɓe ngam ɓe ngayliti ɓe acci yam. Mi ɗelminan gite maɓɓe accuɗe tijjugo yam ngam tokkaago labbi. Nden kam ɓe nganyan halleende maɓɓe e kuuɗe maɓɓe nyidduɗe fuu.

¹⁰Ɓe paaman min Jawmiraawo mi wolwaay haala sarru maɓɓe ngam meere.”

¹¹Ndaa nii Allah Jawmiraawo wi'i: “Hellu juuɗe ma[2], diɓɓu lesdi, wi': Kayya! Kaafahi e weelo e nyawu kalluŋgu ndaaɓoowu nattinan yimɓe Isra'iila ngam kuuɗe muuɗum'en nyidduɗe fuu.

¹²Daayiiɓe maayran bee nyawu kalluŋgu ndaaɓoowu, ɓadiiɓe njaniran bee kaafahi, luttanɓe hisɓe boo maayran bee weelo. Bana non mi rufirta tikkere am fuu dow maɓɓe.

¹³Nden on paaman min mi Jawmiraawo, to mbaraaɓe maɓɓe mbaalake caka labbi muuɗum'en, nder taarde kirsirɗe muuɗum'en, dow towndiije e geereeje kooseeje, les leɗɗe kecce e les leɗɗe cukkuɗe, haa ɓe nguli uurle belɗe ngam labbi maɓɓe fuu.

¹⁴Mi fortan juŋngo am ngam honugo ɓe, lesdi haa ɓe njooɗi fuu diga ladde haa yotto Ribla, mi laatinan ndi cookri, nden ɓe paaman min woni Jawmiraawo.”