Read Fulfulded Ezekiyel 8 Bible Online

Ezekiyel 8 - Fulfulded bible

Ezekiyel 8

¹Nder nduuɓu joweego'oowu, lewru joweegooru, nyannde jowaɓre maaru, mi ɗonno jooɗi nder saare am, ndotti'en Yahuuda boo ɗonno njooɗi yeeso am. Saa'i man juŋngo Allah Jawmiraawo naŋngi yam.

²Mi laari, ndaa goɗɗo nannduɗo bee neɗɗo. Diga haddorde maako yahugo les, ngi'mi yiite. Diga haddorde maako yahugo dow, ngi'mi jayŋgol bana ɗelko njamndi.

³Ɗum forti ko nanndi bee juŋngo, naŋngi gaasa hoore am. Nder wahayuuji Allah ɗi ngi'mi, Ruuhu eeŋgini yam, yahri yam hakkunde asama e lesdi, yahri yam haa Urusaliima, jippini yam haa dammugal woylawal ngal daldal haykaliiru nderwal. Haa nokkuure man, ndaa suura umminanka kaajal Jawmiraawo.

⁴Tedduŋgal Allah Isra'iila boo ɗon ton, bana ko ngi'noomi haa waadiwol go.

⁵Jawmiraawo wi'i yam: “Ɓii-Aadama, laar gal woyla.” Mi laari ton. Haa dammugal woylawal jahranŋgal haa hirsirde, ngi'mi suura umminanka kaajal Jawmiraawo go.

⁶O wi'i yam: “Ɓii-Aadama, a ɗon yi'a ko ɓe mbaɗata na? Yimɓe Isra'iila ɗon kuuwa kuuɗe nyidduɗe masin ngam riiwugo yam diga nokkuure am seniinde. Fahin a yi'an kuuje goɗɗe mawɗe nyidduɗe boo.”

⁷Nden o yahri yam haa nastirde daldal haykaliiru. Mi laari, ndaa wurdere haa mahol.

⁸O wi'i yam: “Ɓii-Aadama, sumpitit mahol.” Mi sumpiti ngol, ngi'mi dammugal.

⁹O wi'i yam: “Nastu, a yi'a kuuɗe nyidduɗe ɗe ɓe kuuwata haa ɗo.”

¹⁰Mi nasti, mi laari, ndaa suuraaji ladooji e dabbaaji nyidduɗi e labbi Isra'iila'en fuu ɗuuɗɗi cuurɗinaaɗi, fiilti mahol fuu.

¹¹Worɓe cappanɗe njoweeɗiɗo, ndotti'en Isra'iila ɗon ndari yeeso maaji, Yaajaniya ɓii Safan boo ɗon caka maɓɓe. Koo moy woodi feho uurorgo haa juŋngo mum, cuurɗe uureeŋgol uurle ɗon ummo e pehe ɗe'e.

¹²Jawmiraawo wi'i yam: “Ɓii-Aadama, a ɗon yi'a ko ndotti'en Isra'iila mbaɗata nder nyiɓre na? Naa koo moy ɗon nder yeɓre suudu lawru mum? Ɓe ɗon mbi'a: Jawmiraawo yi'ataa en, o acci lesdi meeɗen.”

¹³O wi'i yam: “Fahin a yi'an kuuje goɗɗe mawɗe nyidduɗe ɗe ɓe mbaɗata.”

¹⁴Nden o yahri yam haa nastirde dammugal ngal daldal haykaliiru Jawmiraawo, walaadu woyla. Ton ngi'mi rewɓe ɗon njooɗi, ɓe ɗon mboya lawru Tammusu.

¹⁵O wi'i yam: “Ɓii-Aadama, a ɗon yi'a na? Fahin a yi'an kuuje goɗɗe ɓuranɗe ɗe'e nyiddugo.”

¹⁶Nden o yahri yam haa daldal haykaliiru Jawmiraawo nderwal. Ton, baŋnge nastirde haykaliiru, hakkunde daŋki e hirsirde, worɓe baakin noogas e njowo ndokki ɓaawe haa haykaliiru Jawmiraawo, geese maɓɓe tiiti fuunaaŋge, ɓe ɗon cujidana naaŋge.

¹⁷Jawmiraawo wi'i yam: “Ɓii-Aadama, a ɗon yi'a na? Kuuje nyidduɗe ɗe'e fuu ke'aay yimɓe Yahuuda na? Ɓe ɗon kebbina lesdi bee toonyaare, ɓe ɗon ɓesda tikkingo yam, koo to ɓe ɗaɓɓiti de'itingo yam[4].

¹⁸Ngam maajum maatinanmi ɓe tikkere am. Mi laarataa ɓe bee enɗam, mi yurmintaa ɓe sam. Koo to ɓe mboyani yam bee sawtu, mi nanataa ɓe.”