Read Fulfulded Daniyel 1 Bible Online

Daniyel 1 - Fulfulded bible

Daniyel 1

¹Nder nduuɓu laamu Yehoyakim, laamiiɗo Yahuuda, tataɓu, Nabukodonosor, laamiiɗo Baabila, wari, hippi Urusaliima.

²Jawmiraawo hokki mo Yehoyakim, laamiiɗo Yahuuda, non boo yeɓre kuuwruɗe gonɗe nder haykaliiru Allah. Nabukodonosor yahri ɗe haa suudu ɗowanteeɓe muuɗum haa lesdi Sine'ar, nastini ɗe nder ndesaari ɗowanteeɓe mum.

³Nden o umri Aspenas, mawɗo saraaki'en maako, o suɓa caka Isra'iila'en, derke'en woɗɓe diga danygol laamiiɗo e tedda-asli'en.

⁴Ɓen ngalaa batte, ŋarniiɓe, marɓe faamu e hikma fuu, jaŋnguɓe, hakkilɓe, fotanɓe ngam kuugal nder saare laamiiɗo. Sey ɓe ekkito boo wolde e binndol Kaldiya'en.

⁵Laamiiɗo darni: Kala nyalaade fuu o yeɗi ɓe diga nyaamdu e njaram maako, ɓe njaŋnga duuɓi tati, ɓaawoɗon ɓe puɗɗan kuugal yeeso laamiiɗo.

⁶Woodi caka maɓɓe Yahuudu'en woɗɓe: Daniyel, Hananiya, Miisayel e Azariya.

⁷Mawɗo saraaki'en hokki ɓe inɗe kese. O ewni Daniyel Beltesacar, Hananiya boo Sadarak, Miisayel boo Meesak, Azariya boo Abed-Nego.

⁸Daniyel annini taa o soɓna hoore maako bee nyaamdu e njaram laamiiɗo. Ngam man o tori mawɗo saraaki'en taa o doola mo soɓnugo hoore maako.

⁹Allah heɓni mo mo'ere e hinnuye haa mawɗo saraaki'en oo.

¹⁰Ammaa o wi'i Daniyel: “Mi ɗon hula jaagorɗo am laamiiɗo. Kaŋko umri ko on nyaamata e ko on njarata. Mi wonan nder joote maayde to o yi'i geese mooɗon mbooɗaay bana geese ngorgiraaɓe mooɗon.”

¹¹Nden Daniyel wi'i kaliifaajo mo mawɗo saraaki'en jo'ini dow Daniyel e Hananiya e Miisayel e Azariya.

¹²O wi'i mo: “Foondu maccuɓe ma nyalɗe sappo. Accu min nyaama haakooji tan e min njara boo ndiyam tan.

¹³Ɓaawoɗon a laara jaati amin bee jaati derke'en nyaamanɓe nyaamdu laamiiɗo. Nden waɗ min fodde ko tammiiɗa yi'ugo.”

¹⁴Kaliifaajo go jaɓani ɓe, o foondi ɓe nyalɗe sappo.

¹⁵Nde nyalɗe man timmi, o tawi jaati maɓɓe ɓuri jaati derke'en nyaamɓe nyaamdu laamiiɗo fuu wooɗugo e tekkugo.

¹⁶O itti geɗal nyaamdu e njaram maɓɓe, o nyaamni ɓe haakooji tan.

¹⁷Derke'en nayo ɓe'e, Allah hokki ɓe anndal e faamu nder binndi e nder hikma fuu. Daniyel waawi fassitirgo koyɗi e wahayuuji fuu.

¹⁸Nde saa'iire nde laamiiɗo ta'uno ngam haa ɓe ngadda derke'en fuu yeeso maako yotti, mawɗo saraaki'en yahri ɓe.

¹⁹Laamiiɗo wolidi bee maɓɓe, ammaa walaa koo gooto maɓɓe foti bee Daniyel e Hananiya e Miisayel e Azariya. Ngam man ɓe puɗɗi kuugal yeeso laamiiɗo.

²⁰Koo ndey laamiiɗo ƴami ɓe fuu, o tawi ɓe ɓuri laarooɓe e waɗooɓe hatti nder laamu maako fuu hikma e hakkiilo nde sappo.

²¹Daniyel jooɗi ton haa wargo hitaande nde Koores laamani Baabila.