Read Fulfulded Daniyel 3 Bible Online

Daniyel 3 - Fulfulded bible

Daniyel 3

¹Laamiiɗo Nabukodonosor umri waɗugo suura kaŋŋeeri. Towirka maaka, baakin meetir cappanɗe tati, njaajirka maaka boo baakin meetir tati. O darni ka haa waadiwol Duura nder lesdi Baabila.

²Nden o umri mooɓtugo lawan'en e jawro'en[4] e ngomna'en e sarwooɓe e pataka'en e hiitooɓe e alkaali'en maako fuu haa juulde ngam fuɗɗugo rewugo suura man.

³Nden mawɓe ɓe'e fuu ngari, ɓe ndari yeeso suura man.

⁴Goynoowo ɓaŋgti sawtu, hooli, wi'i: “Onon yimɓe iwɓe haa ummaatooje e asli e ɗemɗe fuu, nane umroore!

⁵Saa'i on nani hoolo luwe e ciide e garayaaji e moolooji e hooduuji e algaytaaji e kuuje gimruɗe goɗɗe, tugge koppi yeeso suura kaŋŋeeri ka laamiiɗo Nabukodonosor darni, cujidane ka.

⁶Koo moy tuggaay koppi mum, sujidanaay ka, o sakkinteeɗo jonta nder yiite ɓolinirde.”

⁷Ngam maajum, nde yimɓe iwɓe haa ummaatooje e asli e ɗemɗe fuu nani hoolo kuuje gimruɗe go, ɓe tuggi koppi, ɓe cujidani suura kaŋŋeeri ka laamiiɗo Nabukodonosor darni.

⁸Saa'i man Kaldiya'en woɗɓe ngari wullaago Yahuudu'en.

⁹Ɓe mbi'i laamiiɗo Nabukodonosor: “A yeeɗa haa foroy, barkaama!

¹⁰A umri koo moy tugga koppi, sujidana suura kaŋŋeeri, saa'i to o nani hoolo kuuje gimruɗe go.

¹¹Mo tuggaay koppi, sujidanaay ka boo, o sakkinteeɗo nder yiite ɓolinirde.

¹²Ammaa Yahuudu'en Sadarak e Meesak e Abed-Nego ɓe a waɗi ɓe ardiiɓe mawɓe dow taƴre lesdi Baabila, kamɓe ɓe paalaay umroore nde a umri, barkaama. Ɓe teddinaay ɗowanteeɗo ma, ɓe cujidanaay suura kaŋŋeeri ka ndarnuɗa boo.”

¹³Laamiiɗo tikki masin, umri waddugo worɓe tato go yeeso muuɗum. Ɓe ngaddi ɓe.

¹⁴Nden o ƴami ɓe: “Sadarak e Meesak e Abed-Nego, gooŋga on cali teddingo ɗowanteeɗo am e sujidango suura kaŋŋeeri ka ndarnumi na?

¹⁵Jonta taaske, saa'i on nani hoolo luwe e ciide e garayaaji e moolooji e hooduuji e algaytaaji e kuuje gimruɗe fuu, tugge koppi, cujidane suura ka mi waɗi. To naa non, on cakkinteeɓe nder yiite ɓolinirde jonta jonta. Ɗowanteeɗo moye hisnata on juŋngo am?”

¹⁶Sadarak e Meesak e Abed-Nego njaabi mo: “Barkaama, walaa haaje min njaabe dow haala ka'a.

¹⁷To Allah mo min teddinta ɗum waawi hisnugo min yiite ɓolinirde e juŋngo maaɗa, nden kam o hisnan min.

¹⁸Koo to o hisnaay min boo, anndu min teddintaa ɗowanteeɓe ma, min cujidantaa suura kaŋŋeeri ka ndarnuɗa, barkaama.”

¹⁹Laamiiɗo tikkani Sadarak e Meesak e Abed-Nego masin haa yeeso maako wayliti. O umri wulnitaago nguli ɓolinirde nde joweeɗiɗi.

²⁰Nden o umri sooje'en ɓurɓe semmbe nder mooɓre konu maako, ɓe kaɓɓa worɓe tato go, ɓe cakkina ɓe nder ɓolinirde.

²¹Ɓe kaɓɓi ɓe, ɓe ɓorniiɓe toggooje e ngapaleeji e kufneeje maɓɓe e limce goɗɗe boo, ɓe cakkini ɓe nder ɓolinirde.

²²Ɓolinirde wuli jaw fodde umroore saatunde nde laamiiɗo umri, haa ɗemɗe yiite mbari sooje'en sakkinɓe worɓe tato go.

²³Sadarak e Meesak e Abed-Nego ndo'i, ɓe kaɓɓaaɓe haa nder yiite ɓolinirde.

²⁴Nden laamiiɗo Nabukodonosor hayɗini, ummi bee jaawal, ƴami sarwooɓe muuɗum: “Naa en cakkini worɓe tato kaɓɓaaɓe nder ɓolinirde na?” Ɓe njaabi: “Nonnon nii, barkaama.”

²⁵O wi'i: “E ko waɗi mi ɗon yi'a worɓe nayo ɗon ngaanca nder yiite? Ɓe kaɓɓaaka, ɓe naawnaaka, nayaɓo maɓɓe boo, jaati maako bana jaati ɓiɗɗo ɗowanteeɓe!”

²⁶Nabukodonosor ɓaditi nastirde ɓolinirde, wi'i: “Sadarak, Meesak, Abed-Nego! Onon jaggiiɓe Allah Ɓaŋiiɗo, ngurte, ngare!” Law ɓe tato fuu ɓe ngurti diga yiite.

²⁷Lawan'en e jawro'en e ngomna'en e sarwooɓe laamiiɗo mooɓti, ndaari, yiite naawnaay ɓalli maɓɓe, wulaay gaasa ko'e maɓɓe e limce maɓɓe, walaa kacceeŋga cuurka haa maɓɓe sam.

²⁸Nden laamiiɗo wi'i: “Yettoore laatano Allah mo Sadarak e Meesak e Abed-Nego, mo neli malaa'ikaajo muuɗum, hisni jaggiiɓe muuɗum ngam ɓe kooli mo. Ɓe ɗowtanaaki umroore am, ɓe njaɓi ɓalli maɓɓe njara bone dow teddingo e sujidango ɗowanteeɗo feere, sonaa Allah maɓɓe tan.

²⁹Jonta kam, ndaa ko mi umrata yimɓe nder ummaatooje e asli e ɗemɗe fuu: Mo wolwi bolle elewɗe dow Allah mo Sadarak e Meesak e Abed-Nego, terɗe maako ta'e geɓe geɓe, saare maako boo laato jiddere, ngam walaa ɗowanteeɗo feere mo waawata hisnugo bana nii.”

³⁰Ɓaawo man laamiiɗo ɓesdi mawningo baawɗe Sadarak e Meesak e Abed-Nego dow taƴre lesdi Baabila.

³¹Laamiiɗo Nabukodonosor neldi habaru haa yimɓe nder ummaatooje e asli e ɗemɗe nder duniyaaru fuu, wi'ugo ni'i: “Salaaman ɗuuɗana on!

³²Ɗum kaanduɗum, mi anndina on alaamaaji e kaayeefiiji ɗi Allah Ɓaŋiiɗo yi'ni yam.

³³Alaamaaji maako ɗi mawɗi! Kaayeefiiji maako keewi baawɗe! Laamu maako duumoto, baawɗe maako ɗon diga yidere haa yidere!”