Read Fulfulded Daniyel 7 Bible Online

Daniyel 7 - Fulfulded bible

Daniyel 7

¹Nder nduuɓu Belsaccar laamiiɗo Baabila aranu, Daniyel hoyɗi, yi'i wahayuuji saa'i o ɗonno waali dow be'itte maako. Ɓaawoɗon o winndi koyɗol man. Ndaa fuɗɗoode maagol:

²O wi'i: Nder wahayu am jemmaare man mi yi'i keni nayi ummi diga asama, laanyi mbeela maŋnga.

³Dabbaaji maapinndiiji nayi ngurti mbeela, ɗi peerotiri ɗi fuu.

⁴Arana nanndi bee mbarooga, nga woodi bileeji dutal. Saa'i mi ɗon laara nga, bileeji maaga ɗoofaama. Nga ɓaŋgtaama e darnaama dow kosɗe maaga bana neɗɗo e nga hokkaama ɓernde neɗɗo.

⁵Nden ngi'mi ndabbaawa ɗiɗaɓa, nga nanndi bee ɓoodu[8]. Nga ɗon ɗappini, nga ɗon jogi becce tati caka nyii'e maaga. Goɗɗo umri nga: “Dara! ƴakku kusel ɗuuɗŋgel!”

⁶Ɓaawoɗon ngi'mi ndabbaawa feere, nga nanndi bee paaɗaawu. Nga woodi bileeji colli nayi haa ɓaawo maaga. Nga woodi boo ko'e nayi. Nga hokkaama laamu dow duniyaaru.

⁷Ɓaawo man ngi'mi nder wahayuuji am jemma ndabbaawa nayaɓa, kulniiŋga e cemmbiɗŋga masin. Nga woodi nyii'e mawɗe ɗe njamndi ɓaleeri, nga ƴakki, nga sampiti, nga dammi luttuɗum fuu. Nga nanndaay bee dabbaaji naane go, nga woodi luwe sappo.

⁸Saa'i mi ɗon tiima luwe man, ngi'mi luwal feere pamaral ɗon wurto caka maaje, luwe tati ɗoofaama yeeso maagal. Ngal woodi gite bana ɗe neɗɗo, non boo hunnduko ngam wolwugo bolle mawnitiiɗe.

⁹Diga mi ɗon laara tawon: Nden leese laamu njo'inaama. Ndottiijo wari jooɗi. Limce maako ndanwi tal bana mallimallooje, gaasa hoore maako nanndi bee uuluuwol laaɓŋgol. Leeso laamu maako laati bana ɗemɗe yiite, kosɗe maago murle boo bana yiite wulŋge jaw.

¹⁰Maayo yiite wurti diga maago, ɗon ila. Tagaaɓe ujineeje njaggani mo, miliyoŋje ndari yeeso maako. Hiitooɓe ngari njooɗi, defte maɓɓitaama.

¹¹Mi ɗon laara daliila bolle mawnitiiɗe ɗe luwal pamaral go wolwata. Saa'i mi ɗon laara, ndabbaawa nayaɓa go mbaraama, ɓanndu maaga sakkinaama nder yiite, nattinaama.

¹²Baawɗe dabbaaji goɗɗi boo ittaama, ammaa balɗe maaji ɓesdaama haa to wakkati waɗi.

¹³Jemma man ndaa boo ko ngi'mi nder wahayuuji am: Goɗɗo bana ɓii neɗɗo wardi bee duule. O yehi haa geeto diga ɓooyma go, woɗɓe njahri mo yeeso maako.

¹⁴O hokkaama baawɗe e tedduŋgal e laamu, yimɓe nder ummaatooje e asli e ɗemɗe fuu ɗon ɗowtano mo. Baawɗe maako nduumoto haa foroy, laamu maako wilataako sam!

¹⁵Min Daniyel, mi sakli masin, wahayuuji ɗi ngi'mi kulni yam.

¹⁶Mi ɓaditi gooto caka dariiɓe ton, mi tori mo o faamtinammi ko woni laaɓɗum nder man fuu. Kaŋko o fassitirani yam ngol, o wi'i:

¹⁷“Dabbaaji maapinndiiji nayi ɗi'i ɗum laamiiɓe nayo tammiiɓe ummaago haa duniyaaru.

¹⁸Ammaa senaaɓe Allah Ɓaŋiiɗo keɓan laamu, njogititto ngu haa abada abadin.”

¹⁹Nden mi tefi anndugo maana ndabbaawa nayaɓa, nga nanndaay bee goɗɗi, nga kulniiŋga masin, nga woodi nyii'e njamndi ɓaleeri e peɗeeli njamndi mboɗeeri, nga ƴakki, nga sampiti, nga dammi luttuɗum fuu.

²⁰Mi yiɗi boo anndugo maana luwe sappo dow hoore maaga e maana luwal pamaral gurtiiŋgal ɓaawo maaje go, ngal do'i luwe tati, ngal woodi gite e hunnduko, ngal wolwi bolle mawnitiiɗe, jaati maagal ɓuri ngal luwe goɗɗe go.

²¹Saa'i mi ɗon laara, luwal man honi senaaɓe Allah, jaali ɓe,

²²haa nde geeto diga ɓooyma wari, kiita boo gooŋɗini senaaɓe Allah Ɓaŋiiɗo e saa'i yottake haa ɓe mara laamu.

²³Mo ɗon anndina yam maana go, wi'i: “Ndabbaawa nayaɓa ɗum laamu nayaɓu ngaranŋgu haa duniyaaru. Ngu nanndataa bee laamuuji goɗɗi fuu. Ngu nyaaman duniyaaru fuu, damman ndu e sampitan ndu.

²⁴Luwe sappo boo, ɗum laamiiɓe sappo waŋganɓe nder maral laamu man. Ɓaawo maɓɓe laamiiɗo goɗɗo waŋgan, kaŋko o nanndataa bee maɓɓe, o do'an laamiiɓe tato.

²⁵O wolwan kalluka dow Allah Ɓaŋiiɗo, o toonyoto senaaɓe Allah boo. O anninan waylugo juulɗe e umrooje diina. Senaaɓe Allah hokkete haa juŋngo maako duuɓi tati e reeta.

²⁶Nden kiita fuɗɗan, ɓe ɓortan mo, ɓe nattinan laamu maako fuu.

²⁷Ammaa laamu e baawɗe e maŋngu dow laamuuji duniyaaru fuu ndokkete haa ummaatoore senaaɓe Allah Ɓaŋiiɗo. Laamu maɓɓe duumoto haa abada abadin, marɓe baawɗe fuu njagganto mo e ɗowtanto mo.”

²⁸Haa ɗo haala man timmi. Min Daniyel hakkiilo am jiiɓi masin, yeeso am nyiɓɓi. Ammaa mi wi'aay ɗum koo moy.