Read Fulfulded Daniyel 9 Bible Online

Daniyel 9 - Fulfulded bible

Daniyel 9

¹Nder nduuɓu laamiiɗo Dariyus, ɓii Ahasuwerus, aranu, goɗɗo danygol Medi'en, laatiiɗo laamiiɗo dow lesdi Kaldiya'en,

²min Daniyel, saa'i man mi faami nder defte ceniiɗe no Urusaliima laatorto bille duuɓi cappanɗe joweeɗiɗi[11] bana no Jawmiraawo wolwanino annabi Yeremiya.

³Mi ɓaditi Jawmiraawo Allah nder do'aare e tornde e suumaye, mi jooɗi nder ndoondi[12] e mi ɓorni limce buhuuje.

⁴Mi tori Jawmiraawo Allah am, mi waŋginani mo hakkeeji ummaatoore am, mi wi'i: “Yaa Jawmiraawo, Allah mawɗo, kulniiɗo. An, a ɗon hakkilana alkawal ma e a waɗana yiɗɓe ma e ɗowtaniiɓe umrooje ma mbooɗeeŋga.

⁵Min mbaɗi hakke, min mbaɗi aybe, min mbaɗi halleende, min tuurtani ma, min acci laawol umrooje e kiitaaji ma.

⁶Min nananaay jaggiiɓe ma annabi'en, wolwanɓe laamiiɓe amin e mawɓe amin e kaakiraaɓe amin e ummaatoore lesdi amin fuu bee innde ma.

⁷Yaa Jawmiraawo, an a adiliijo, ammaa minin Yahuudu'en jooɗiiɓe nder Urusaliima e Isra'iila'en wonɓe nder lesɗe ɓadiiɗe e daayiiɗe fuu, min cemti hannde. A saŋkiti min ngam min zammbi ma.

⁸Yaa Jawmiraawo, laamiiɓe amin e mawɓe amin e kaakiraaɓe amin, min cemti, ngam min mbaɗi hakke dow maaɗa.

⁹An Jawmiraawo Allah, a mari hinnuye e yaafuye koo to minin min tuurtani ma.

¹⁰Min ɗowtanaaki ma, yaa Jawmiraawo Allah amin, min tokkaaki umrooje ɗe ndokkuɗa min bee jaggiiɓe ma annabi'en.

¹¹Isra'iila'en fuu ƴaɓɓi tawreeta ma, cali ɗowtanaago bolle ma. Min mbaɗi hakke dow maaɗa, ngam maajum naalooje e kunayeeje binndaaɗe nder tawreeta jaggiiɗo ma Muusa fuu ukkani min.

¹²A hiɓɓini ko mbi'ɗa dow amin e ardiiɓe min. A ukkani min sarru saatuŋgu, ko waɗi haa Urusaliima, irin man meeɗaay haa duniyaaru fuu.

¹³Kiita ka winnda nder tawreeta Muusa fuu do'i dow amin. Ammaa koo jonta boo, yaa Jawmiraawo Allah amin, min toraaki ma mo'ere, min tuubaay dow aybeeji amin, min kakkilanaay gooŋga ma.

¹⁴An, yaa Jawmiraawo Allah amin, a yejjitaay haala kiita ma, a hiiti min fakat. Ngam a adiliijo nder kuuɗe ma fuu. Ammaa minin min ɗowtanaaki ma.

¹⁵Yaa Jawmiraawo Allah amin, a wurtini ummaatoore ma lesdi Misra bee baawɗe ma mawɗe. Haa hannde fuu a waɗani innde ma tedduŋgal maŋngal. Gooŋga, min mbaɗi hakke, min mbaɗi kalluɗum.

¹⁶Nde nii kuuɗe ma fuu ɗe adiliije, sottin tikkere ma saatunde dow berniwol ma Urusaliima, hooseere ma seniinde. Ngam daliila hakkeeji amin e zunuubaaji kaakiraaɓe amin, taariiɓe min fuu ɗon njanca Urusaliima e ummaatoore ma.

¹⁷Jonta yaa Allah amin, heɗita do'a e tornde maccuɗo ma. Daliila innde ma, laar nokkuure ma seniinde yibbinaande bee yerduye.

¹⁸Yaa Allah am, nan, laar! Laar bille amin, laar berniwol ngol innde ma ɗon ewne ton! Min ɗon ndari, toro haa yeeso maaɗa, naa ngam kuuɗe amin adiliije, ammaa ngam hinnuye ma ɗuuɗɗo.

¹⁹Yaa Jawmiraawo, nan min! Yaa Jawmiraawo, yaafan min! Yaa Jawmiraawo, heɗita min! Huuw daliila innde ma, yaa Allah am, taa neeɓu ngam berniwol ngo'ol e ummaatoore nde'e, an jeyi!”

²⁰Diga mi ɗonno wolwa tawon, mi ɗon waɗa do'a, mi ɗon waŋgina hakkeeji am e ɗi Isra'iila'en ummaatoore am, mi ɗon toro Jawmiraawo Allah am ngam hooseere maako seniinde,

²¹diga mi ɗon waɗa do'a tawon, Jibirilla mo ngi'no mi nder wahayu am naane go, fiiri, wari law haa am. Ɗum saa'iire nde ɓe lii'anto Allah dokke nyaamdu kiikiiɗe.

²²O faamtini yam, o wi'i: “Daniyel, jonta mi wari faamtingo ma annabaaku go.

²³Saa'i a fuɗɗi toraago Allah, wolde iwi diga maako e mi wari yeccugo ma nde, ngam a ɗuuɗa-samanjo. Faamu wolde nde, faamu boo maana wahayu man:

²⁴Allah ta'ani ummaatoore ma e berniwol ma ceniiŋgol duuɓi cappanɗe joweeɗiɗi nde joweeɗiɗi, haa o haɗa tuurtol, o itta hakke, o hefa aybe, o tabitina adilaaku nduumiiŋgu, o waɗa lammba dow wahayu e annabaaku, o moyta ɓurɗo senaago.

²⁵Ngam maajum anndu e faamu ɗu'um: Diga saa'i wolde iwi haa Allah ngam nyiɓtaago Urusaliima haa wargo ardiiɗo mo Allah moyti ɗum, duuɓi joweeɗiɗi nde joweeɗiɗi caaloto. Nden nder duuɓi cappanɗe joweego e ɗiɗi (62) nde joweeɗiɗi, yimɓe nyiɓtoto Urusaliima: Laabi e gasɗe paddooje mahititte nder wakkati ɓillaaje.

²⁶To duuɓi cappanɗe joweego e ɗiɗi (62) nde joweeɗiɗi go timmi, yimɓe mbaran moytaaɗo, walaa ko o heɓata. Ardiiɗo feere waran, wilan berniwol e nokkuure seniinde. Timmoode maako waran bana ilam kalkoojam, haa ragare man boo konu e halkere laatoto, bana Allah taynori.

²⁷Ardiiɗo go haɓɓan e tabitinan alkawal bee yimɓe ɗuuɗɓe ngam duuɓi joweeɗiɗi. Ɓaawo duuɓi tati bee reeta o haɗan lii'anaago Allah kirseteeɗi e dokke. Haa wakeere nyiddunde, nattinoowo daroto haa to timmoode nde Allah taynori yotti dow maako.”