Read Fulfulded Beel e Kuuŋga 1 Bible Online

Beel e Kuuŋga 1 - Fulfulded bible

Beel e Kuuŋga 1

¹Nde Astiyaze, laamiiɗo Mediya'en maayi, Sirus goɗɗo Persiya laami haa pellel maako.

²Daniyel laati faadamaajo, laamiiɗo darjiɗini mo ko ɓuri sarwotooɓe maako luttuɓe.

³Ammaa yimɓe Baabila marno lawru wi'eteendu Beel. Nde weeti fuu, ɓe ɗon ngaddana ndu kuroori ko waɗata kilo teemeɗɗe jowi, baali cappanɗe nayi e inaboojam liitir teemeɗɗe ɗiɗi e cappanɗe jowi.

⁴Laamiiɗo ɗonno rewa lawru man: Kala nyalaade fuu, o ɗon wara rewa ndu. Ammaa Daniyel kam ɗon rewa Allah muuɗum. Nyannde feere, laamiiɗo ƴami Daniyel: “Ko waɗi a rewataa Beel?”

⁵Daniyel jaabi mo: “Mi rewataa labbi ɗi yimɓe mbaɗi bee juuɗe muuɗum'en, min kam sey Allah geeto, tagɗo asamanji e lesdi, marɗo baawɗe dow ko mari yoŋki fuu ndewanmi.”

⁶Laamiiɗo wi'i fahin: “Nii kam a yiɗi wi'go Beel kam naa o ɗowanteeɗo geeto na? A laaraay ko o nyaamata e ko o yarata kala nyalaade fuu na?”

⁷Daniyel fetti jaleeɗe, o wi'i: “Taa sargu hoore ma laamiiɗo! Nder maaru ɗum loope, yaasi boo ɗum njamndi mboɗeeri. Ɗum meeɗaay nyaamgo e ɗum meeɗaay yargo sam.”

⁸Laamiiɗo tikki masin, o ewni liman'en, o wi'i ɓe: “To on mbi'aay yam moy nyaamata nyaamduuji ɗi'i fuu, mi hiitoto on kiita maayde.

⁹Ammaa to on kolli yam ɗum Beel nyaamata dokke ɗe'e, Daniyel hiitete kiita mbareego ngam o huɗi lawru ndu'u.” Nden Daniyel wi'i laamiiɗo: “Ɗum laato bana mbi'ɗa!”

¹⁰Liman'en Beel, limgal maɓɓe cappanɗe joweeɗiɗo, rewɓe maɓɓe e ɓikkoy maɓɓe limaaka. Nden laamiiɗo yahdi bee Daniyel haa suudu Beel.

¹¹Liman'en mbi'i mo: “Barkaama, min ɗon ngurto suudu. Umru ɓe njo'ina nder maaru nyaamdu e njaram uurɗam, nden maɓɓa parewal e takku dammugal suudu man bee halagaare maaɗa.

¹²Lorta jaŋngo fajira: To a tawi lawru Beel nyaamaay, mbar min. E to naa non boo, mbar Daniyel ngam o haadani min.”

¹³Liman'en man ɗon bee hoolaare mawnde ngam ɓe ngasno laawol gal les haa yotti les taabal haa ɓe njo'inta nyaamdu nder suudu man. Laawol man nafan ɓe nastugo haa suudu tum, ɓe kooca dokke man.

¹⁴Nde liman'en ngurti babal man, laamiiɗo jo'ini nyaamdu lawru Beel. Nden Daniyel umri huuwanooɓe laamiiɗo ɓe ngadda ndoondi, ɓe cammina seɗɗa seɗɗa nder suudu man fuu. Laamiiɗo tan anndi ko o waɗi. Ɓaawoɗon, ɓe ngurti ɓe fuu, ɓe maɓɓi parewal e ɓe takki halagaare laamiiɗo, nden ɓe ndilli.

¹⁵Jemma bana ko woowa, liman'en ngardi bee rewɓe e ɓikkoy muuɗum'en fuu, ɓe nyaamdi e ɓe njardi ko hokka haa lawru fuu.

¹⁶Jaŋngo man, laamiiɗo yehi fajira cub haa suudu go bee Daniyel.

¹⁷Ton o ƴami mo: “Suudu go ɗon maɓɓi bee halagaare am go na, Daniyel?” Daniyel jaabi mo: “Ooho, Barkaama, halagaare ma ɗon bana takkuɗa ɗum”.

¹⁸Nde ɓe maɓɓiti parewal, laamiiɗo laari gal taabal, o wi'i: “A baawɗo, yaa Beel! Faasikaare walaa haa ma!”

¹⁹Daniyel fetti jaleeɗe. O haɗi laamiiɗo nastugo haa suudu, o wi'i mo: “Laar lesdi suudu man, a anndi ɗum ɓeye njaaɓi haa ɗo na?”

²⁰Laamiiɗo wi'i bee semmbe: “Mi ɗon laara haa lesdi, kosɗe worɓe, rewɓe e ɓikkoy!”

²¹O tuurti, o naŋngi liman'en, rewɓe maɓɓe e ɓikkoy maɓɓe. Liman'en kolli mo laawol cuuɗiiŋgol ngol ɓe nastirta suudu go, ɓe ngarata ɓe nyaama ko jo'ina dow taabal.

²²Nden laamiiɗo mbari ɓe, o hokkiti lawru Beel haa Daniyel, Daniyel boo fusi ndu, kayru bee suudu man fuu.

²³Yimɓe Baabila ɗonno ndewa boo kuuŋga.

²⁴Nyannde feere, laamiiɗo wi'i Daniyel: “A fotaay wi'go kuuŋga nga naa ɗum ɗowanteeɗo geeto kaŋga boo. Nden kam, rew nga!”

²⁵Daniyel jaabi: “Mi rewataa nga, sey Jawmiraawo, Allah am ndewanmi ngam kaŋko tan woni Allah geeto!

²⁶To laamiiɗo duŋani yam, mi mbaran kuuŋga bilaa kaafahi, bilaa sawru.” Laamiiɗo jaabi mo: “Mi duŋanake ma”.

²⁷Daniyel hooci guduron, ɓellere e gaasa wicco puccu. Nde o dolli ɗum fuu, o tami cobbe, o sakkini ɗe nder hunnduko kuuŋga. Kuuŋga go moɗi ɗum, nden nga waati. Nden Daniyel wi'i bee semmbe: “Ndaare huunde nde ndewotonno!”

²⁸Nde yimɓe Baabila nani habaru man, ɓe tuurti, ɓe mooɓti, ɓe ngurŋgurti dow laamiiɗo. Ɓe ɗon mbi'a: “Laamiiɗo laati Yahuuduujo! O fusi lawru Beel, o mbari kuuŋga, o mbari liman'en!”

²⁹Nden ɓe njehi yolnde laamiiɗo, ɓe mbi'i mo: “Hokku min Daniyel! To a sali boo, min mbarete, an bee saare ma fuu.”

³⁰Laamiiɗo faami naa ɗum guusa: Ɓe ndooli mo haa o hokki ɓe Daniyel.

³¹Yimɓe Baabila cakkini Daniyel nder lowol barooɗe. O jooɗi ton balɗe joweego.

³²Woodi ton barooɗe joweeɗiɗi, nde weeti fuu, ɓe ndokka ɗi yimɓe maayɓe ɗiɗo e baali boo ɗiɗi. Ammaa diga ɓe nastini Daniyel haa lowol man, ɓe ndokkaay ɗi koo ɗume ngam haa ɗi nyaama Daniyel.

³³Annabiijo bi'eteeɗo Habakuk ɗonno nder lesdi Yahudiya wakkati man. O defino nyaamdu maako, o loowi ndu nder taasawo bee tamseeje seɗɗa, haa o yahrana nyaamdu man haa huuwooɓe haa gese.

³⁴Malaa'ikaajo Jawmiraawo wi'i mo: “Yahran Daniyel nyaamdu ndu njogiiɗa. O ɗon haa Baabila nder lowol barooɗe.” Habakuk jaabi mo.

³⁵“Yaa Jawmiraawo, mi meeɗaay yahgo Baabila e mi anndaa haa lowol man woni.”

³⁶Malaa'ikaajo naŋngi mo gaasa, efti mo, ruuyni mo ko ɓuri henndu haa yottini mo Baabila. O jippini mo haa hunnduko lowol barooɗe go.

³⁷Habakuk ewni: “Daniyel! Daniyel! Ndaa nyaamdu ndu Allah neldi ma!”

³⁸Daniyel wi'i: “Yaa Allah am, a siftori yam! A wudintaa yiɗɓe ma!”

³⁹Daniyel fuɗɗi nyaamgo, malaa'ikaajo Allah hoori Habakuk haa lesdi mum.

⁴⁰Nyalaade joweeɗiɗawre, laamiiɗo wari haa waɗana Daniyel do'a maayɓe. Nde o yotti haa lowol, o laari nder ton: Daniyel ɗon jooɗi.

⁴¹Nden laamiiɗo wi'i bee sawtu: “A Mawɗo, yaa Jawmiraawo, Allah mo Daniyel rewata! Walaa Allah feere sey an!”

⁴²O umri ɓe ngurtina Daniyel diga lowol. O sakkini ton yiɗnooɓe halkugo Daniyel. Barooɗe ƴakkidi ɓe law haa gite laamiiɗo.