Read Fulfulded Hose'a 1 Bible Online

Hose'a 1 - Fulfulded bible

Hose'a 1

¹Ndaa wolde nde Jawmiraawo wolwani Hose'a ɓii Beeri nder zamanu Uzziya e Yotam e Akas e Hezekiya, laamiiɓe Yahuuda e nder zamanuuji Yerobo'am ɓii Yo'as, laamiiɗo Isra'iila.

²Ndaa nii Jawmiraawo fuɗɗi wolwugo bee hunnduko Hose'a: O wi'i Hose'a: “Yah, te'u debbo daakaareejo, danydu ɓiɓɓe daakaareeku bee maako, ngam yimɓe lesdi am ɗon mbaɗa daakaareeku bee labbi, ɓe acci yam min Jawmiraawo.”

³Hose'a yehi, ɓaŋgi Gomer ɓii Dibilayim. Debbo oo reedi, o danyani mo ɓiɗɗo gorko.

⁴Jawmiraawo wi'i Hose'a: “Inndu mo Yisre'el, ngam lutti wakkati seɗɗa, mi hiitoto saare Yehu, ngam ɓe ndufi ƴiiƴam haa Yisre'el[1]. Mi nattinan laamu Isra'iila.

⁵Nyalaade man ngewanmi lagaawal Isra'iila nder yayre Yisre'el.”

⁶Debbo go reedi fahin, o danyi ɓiɗɗo debbo. Jawmiraawo wi'i Hose'a: “Inndu mo Lo-Ruhama, waato Enɗaaka, ngam mi tokkataako enɗugo laamu Isra'iila fahin, mi yaafataako ɓe sam.

⁷Ammaa mi enɗan yimɓe laamu Yahuuda, min Jawmiraawo Allah maɓɓe, mi hisnan ɓe. Mi hisnataa ɓe bee lagaawal malla kaafahi malla haɓre malla pucci malla wa'iiɓe ɗi.”

⁸Ɓaawo debbo go enti Lo-Ruhama, o reedi kadiboo, o danyi ɓiɗɗo gorko.

⁹Jawmiraawo wi'i Hose'a: “Inndu mo Lo-Ammi, waato Naa-ummaatoore-am, ngam onon naa on ummaatoore am, min boo naa mi Allah mooɗon.”