Read Fulfulded Hose'a 10 Bible Online

Hose'a 10 - Fulfulded bible

Hose'a 10

¹Isra'iila woni inabohi dimanki ɓiɓɓe ɗuuɗɗe. Nde ɗum ɓesdi ɗuɗɗingo ɓiɓɓe, ɗum ɓesdi boo ɗuɗɗingo kirsirɗe ngam labbi. Nde ɗum ɓesdi wo'ingo lesdi muuɗum, ɗum ɓesdi boo wo'ingo daŋraŋge labbi.

²Ɓerɗe Isra'iila'en cenndake. Sey ɓe ndoondo kiita aybe man jonta. Allah fusan kirsirɗe maɓɓe e daŋraŋge labbi maɓɓe.

³Nden ɓe mbi'an: “Jonta min ngalaa laamiiɗo, ngam min kulaay Jawmiraawo. Koo to min keɓi laamiiɗo, ɗume ɗum nafata min?”

⁴Ɓe mbolwi bolle meere, ɓe kuni kunayeeje pewe, ɓe kaɓɓi alkawalji. Haala kiitaaji ɗon ummo haa maɓɓe bana geene mbarooje mawnanɗe nder diidi haa ngesa.

⁵Jooɗiiɓe haa Samariya ɗon kula daliila gaggel haa Baytawiina. Ummaatoore maagel sunoto daliila maagel. Liman'en maagel ndiwnan daliila maagel, ngam tedduŋgal maagel dahaama daayiiɗum.

⁶Konne'en njahran ngel haa Assuura, ngel laatoto dokkal ngam laamiiɗo mawɗo. Efrayim semtan, Isra'iila toskoto ngam daliila anniyaaji muuɗum.

⁷Berniwol Samariya natti, laamiiɗo maagol ɗon majja bana nguufo dow ndiyam[14].

⁸Nokkuuje towɗe haa Isra'iila waɗi hakke nattan. Gi'e e geene mawnan dow kirsirɗe maɓɓe. Nden ɓe toroto kooseeje: “Cudde min!”, towndiije boo: “Ndo'e dow amin!”

⁹Jawmiraawo wi'i: “Onon yimɓe Isra'iila, diga nyalɗe Gibiya[15] on mbaɗi hakke, haala man tokki haa wargo hannde. Ngam maajum konu waran dow ɓiɓɓe zunuuba haa Gibiya.

¹⁰Mi ɓoccan ɓe bee ngiɗa am. Ummaatooje kawtan dow maɓɓe daliila aybeeji maɓɓe ɗiɗi fuu.

¹¹Efrayim woni wiige eltaaŋge nge yiɗi fiyugo alkamaari[16]. Mi saali, mi yi'i daande maage woonde. Ngam maajum mi haɓɓan Efrayim ngam ndemri, Yahuuda reman, Yaakubu boo remtan ngesa.

¹²Aawane ko'e mooɗon adilaaku, on codan mbooɗeeŋga. Kippite ngesa kesa! Saa'i waɗi haa on ngaylito heedi am, min Jawmiraawo, haa mi wara, mi toɓnana on adilaaku.

¹³On aawi halleende, on codi zunuuba, on nyaami nafuuda fewre. On marsi baawɗe mooɗon e ɗuuɗal honooɓe mooɗon.

¹⁴Ngam man fitina ummoto caka ummaatoore mooɗon. Berniiji mooɗon cemmbiɗɗi fuu mbilete, bana laamiiɗo Salman wiliri Bayti-Arbeel nder nyalaade konu, nde o dirɓi daadiraaɓe dow ɓikkoy muuɗum'en.

¹⁵Irin man laatanto on haa Baytila boo, ngam daliila halleende mooɗon mawnde masin, laamiiɗo Isra'iila nattan to subaha yottake.”