Read Fulfulded Hose'a 12 Bible Online

Hose'a 12 - Fulfulded bible

Hose'a 12

¹Efrayim taarni Jawmiraawo bee pewe. Isra'iila taarni mo bee rikici. Yahuuda ɗon wondi bee Allah, ammaa o ɗon ɗakkotiri boo bee ɗowanteeɓe jananɓe.

²Efrayim ɗon wuura bee henndu, ɗon taasna henndu fuunaaŋge, ɗon ɗuɗɗina pewe e toonyaare nde weeti fuu. O ɗon haɓɓa alkawal bee Assuura, o ɗon nelda nebbam haa Misra.

³Jawmiraawo woodi daliila wullaago Yahuuda. O hiitoto Yaakubu ngam laabi mum, o warjoto mo fodde kuuɗe maako.

⁴Yaakubu naŋngi teppere[17] deerɗum nde ɓe ɗonno haa reedu daada maɓɓe tawon. Nde o laati gorko, o haɓi bee Allah[18].

⁵O haɓi bee malaa'ikaajo, o jaali. Ammaa o woyi, o tori mo hinnuye. Haa Baytila Allah fotti bee maako, ton o wolwani en.

⁶Kaŋko woni Jawmiraawo Allah honooɓe asama, bee innde nde yimɓe ewnorto mo.

⁷Sey a lorto haa Allah maaɗa. Jogita mbooɗeeŋga e kiita gooŋɗuka, tammora Allah maaɗa foroy.

⁸Jawmiraawo wi'i: “Kanaana[19] ɗon jogi awnorɗum fewreejum, o yiɗi waɗugo rikici.

⁹Efrayim ɗon wi'a: Na mi diskuɗo! Mi heɓani hoore am jawdi. Haa nafuuda torra am fuu, goɗɗo tawataa aybe haa o laara ɗum bana hakke.

¹⁰Ammaa min woni Jawmiraawo, Allah maaɗa diga a ɗonno haa lesdi Misra tawon. Mi jo'inte nder bukkaaji fahin, bana nder nyalɗe fottirde.

¹¹Mi wolwani annabi'en, mi ɗuɗɗini wahayuuji, mi waɗi balndi bee kunnduɗe annabi'en.

¹²To sooynde adilaaku ɗon haa Gile'at, nden kam fakat ɓe nattan. Haa Gilgal ɓe lii'i kirseteeɗi kalhali. Ngam maajum kirsirɗe maɓɓe ngartan baagaaje kaa'e nder diidi haa gese.”

¹³Hose'a wi'i: “Yaakubu doggi haa lesdi Siriya, Isra'iila huuwi ngam daliila debbo, o duri tokkere ngam haa o heɓa debbo.

¹⁴Jawmiraawo wurtini Isra'iila diga Misra bee juŋngo annabiijo, bee juŋngo annabiijo boo o ayniri ɓe.

¹⁵Efrayim mettini Jawmiraawo masin. Jawmiraawo lornan ƴiiƴam ɗam o rufi dow hoore maako, o lornanan mo yawaare maako.”