Read Fulfulded Hose'a 13 Bible Online

Hose'a 13 - Fulfulded bible

Hose'a 13

¹Jawmiraawo wi'i: “Nde Efrayim wolwi, koo moy fuu diwni. Lenyol ngo'ol ɓuri marugo tedduŋgal nder Isra'iila fuu. Ammaa ngol nasti aybe bee Ba'al, ngol waati.”

²Hose'a wi'i: “Koo jonta boo yimɓe Efrayim ɗon tokko waɗugo hakke. Bee cardi maɓɓe ɓe ɗon mbaɗa suuraaji ɓolinaaɗi fodde hakkiilo maɓɓe. Labbi ɗi'i fuu, waɗooɓe sanaa'a mbaɗi ɗi. Ndaa ko yimɓe mbi'ata dow maɓɓe: Yimɓe lii'ooɓe kirseteeɗi[20] ɗon kebbo nga'oy koy bee kunnduɗe boo.

³Ngam maajum ɓe laatoto bana ruulde fajiri, bana saawawre subaha sottannde law, bana nyaande ruuyannde diga laarre, bana cuurɗe gurtotooɗe haa burɗe.

⁴Min mi Jawmiraawo, Allah mooɗon diga on ɗonno haa lesdi Misra tawon. On anndaa ɗowanteeɗo feere, sey min, on ngalaa kisnoowo feere sonaa min!

⁵Mi anndi on nder ladde hamaadaare, nder lesdi njoorndi.

⁶Nde ɓe keɓi durduɗe, ɓe kaari. Nde ɓe kaari, ɓerɗe maɓɓe mawniti. Ngam maajum ɓe ngejjiti yam.

⁷Mi laatanto ɓe bana mbarooga. Mi waaltanto ɓe bana paaɗaawu dow laawol.

⁸Mi ukkanto ɓe bana ɓoodu[21] koocanaaŋgu ɓikkoy muuɗum, mi seekan biɓɓe maɓɓe. Mi nyaaman ɓe ton bana mbarooga ndewa, dabbaaji ladde campitan ɓe.”

⁹“Onon Isra'iila'en, on kalkan ngam on tuurtani yam, on tuurtani goɗɗo baawanɗo wallugo on.

¹⁰Toy laamiiɗo mooɗon haa o hisna on bee berniiji mon fuu? Toy hiitooɓe mooɗon ɓe mbi'ɗon yam dow muuɗum'en: Hokku min laamiiɗo e ardiiɓe?

¹¹Nder tikkere am, mi hokki on laamiiɗo. Nder ɓernuki am boo, mi ittan mo.

¹²Mi toŋgi zunuubaaji Efrayim, mi sigi hakkeeji maako.

¹³Luuwe danyanɗo ngaranan mo, ammaa o ɓiɗɗo sooya-hakkiiloojo, ngam to saa'i man waɗi, o wurtataako danyrugol.

¹⁴Mi soottanno ɓe diga joonde maayɓe. Mi hisnanno ɓe diga maayde. An waade, toy gi'al ma? An joonde maayɓe, toy baawɗe ma ngam mbarugo? Mi sali enɗugo ɓe!”

¹⁵Efrayim ɗon ɓesdo caka deerɗum'en. Ammaa henndu fuunaaŋge, henndu Jawmiraawo saatundu waran diga ladde hamaadaare, ɓeeɓna waawru Efrayim, yoornan seeɓoore maako, jaɓta kuuje ɗuuɗa-samanje haa ndesaari maako fuu.