Read Fulfulded Hose'a 2 Bible Online

Hose'a 2 - Fulfulded bible

Hose'a 2

¹“Ammaa saa'i waran haa limgal yimɓe Isra'iila laato bana njaareendi haa maayo, walaa baawanɗo foondugo e limugo ndi. Haa nokkuure nde goɗɗo wi'no ɓe: Naa on ummaatoore am! Yimɓe mbi'an ɓe: On ɓiɓɓe Allah geeto.

²Nden yimɓe Yahuuda e yimɓe Isra'iila fuu kawtan. Ɓe laaminan ardiiɗo gooto dow maɓɓe, ɓe ardanto lesdi maɓɓe, ngam nyalaade Yisre'el laatoto mawnde.

³Mbi'e deerɗiraaɓe mon worɓe: Ammi, waato: On ummaatoore am, deerɗiraaɓe mon rewɓe boo: Ruhama, waato: On enɗaaɓe.”

⁴“Ngulle daada mooɗon, ngulle mo! Ngam naa o debbo am, min boo naa mi goriiko. Sey o itta alaamaaji daakaareeku haa tiinde maako, o itta alaamaaji njeenu haa enɗi maako.

⁵To naa non, mi ɓortan mo fuu, o laato temmbo bana nyannde o danya. Mi laatinan mo bana ladde hamaadaare, mi laatinan mo harde yoornde, mi mbaran mo bee ɗomka.

⁶Mi enɗataa ɓikkoy maako, ngam koy ɓikkoy daakaareeku.

⁷Ngam daada maakoy danyɗo koy waɗi daakaareeku e cemtiniiɗum. Ngam o wi'i: Sey mi tokko waaye'en yiɗɓe yam, hokkanɓe yam nyaamdu e ndiyam e gaasa baali e limce ɗigguɗe e nebbam e njaramji.

⁸Ngam maajum cukkanmi laawol maako bee gi'e, mi maɓɓan ngol bee paddirɗum, ngam taa o heɓta laabi maako.

⁹O tokkoto waaye'en yiɗɓe mo, ammaa o jokkataako ɓe. O ɗaɓɓitan ɓe, ammaa o tawataa ɓe. Nden o wi'an: Sey mi loro haa goram arano, ngam naane mi ɗonno seyi ɓuri jonta.

¹⁰O annditaay min hokki mo alkamaari e inaboojam kesam e nebbam. Mi ɗuɗɗinani mo cardi e kaŋŋeeri. Ammaa ɓe kuuwtiniri ndi ngam Ba'al.

¹¹Ngam maajum mi waran mi hoocita alkamaari am e inaboojam am kesam nder wakkati maaji, mi hoocitan gaasa baali am e leŋ am ko suddanno temmbuki maako.

¹²Jonta cudditanmi les maako haa gite waaye'en maako yiɗɓe mo, walaa kisnanɗo mo diga juŋngo am.

¹³Mi haɗan seyo maako fuu, non boo juulɗe maako, waato juulɗe lewru hesru e nyalɗe ciwtorɗe maako e juulɗe maako goɗɗe fuu.

¹⁴Mi wonnan inabooje maako e ibbi maako, ɗum o wi'i: Kanjum ɗum laati ngeenaari am ndi waaye'en yiɗɓe yam ndokki yam. Min Jawmiraawo mi laatinan ɗum guuɓe meere, dabbaaji ladde nyaaman ɗum.

¹⁵Bana non mi hiitorto mo ngam nyalɗe Ba'alji, labbi maako, saa'i o wulani ɗi uurle, o jaagnori bee halagaare e koɗel, o tokki waaye'en yiɗɓe mo. Ammaa min, o yejjiti yam.” Non Jawmiraawo wi'i.

¹⁶“Ngam maajum, ndaa mi estan mo. Mi yahran mo haa ladde hamaadaare, mi ɗelmitina ɓernde maako ton.

¹⁷Diga ton boo mi hokkitan mo gese inabooje maako, mi waylitan waadiwol Akor[2], ngol laatano mo nastirde tammunde. Ton o jaaboto ewnaandu am bana nder nyalɗe o paanyono, nde o wartino diga lesdi Misra.”

¹⁸Jawmiraawo wi'i: “Nyalaade nde mbaɗanmi bana non, a ewnatam: Goram. A meetataa ewnugo yam: Ba'al am[3].

¹⁹Mi ittan inɗe Ba'alji nder hunnduko maaɗa, walaa mo siftorta inɗe maaji fahin.

²⁰Nyalaade maajum kaɓɓanmi alkawal ngam maɓɓe bee dabbaaji ladde e colli asama e ladooji dow lesdi, mi yewan lagaawal e kaafahi, mi timminan haɓre nder lesdi, haa ɓe keɓa siwtaago nder de'ere.

²¹Mi haɓɓan teegal bee maaɗa haa abada, mi haɓɓan ngal bee maaɗa dow adilaaku e gooŋga e mbooɗeeŋga e hinnuye.

²²Mi haɓɓan teegal bee maaɗa dow gooŋgaaku, an boo a anndan Jawmiraawo.”

²³Jawmiraawo wi'i: “Nyalaade maajum njaabantoomi asamanji. Kanji boo ɗi njaabanto lesdi.

²⁴Lesdi jaabanto alkamaari e inaboojam kesam e nebbam, kanji boo ɗi njaabanto Yisre'el[4].

²⁵Mi aawan mo ngam am nder lesdi. Mi enɗan Lo-Ruhama, mi wi'an Lo-Ammi: An woni ummaatoore am. Kaŋko boo o wi'atam: Allah am.”