Read Fulfulded Hose'a 5 Bible Online

Hose'a 5 - Fulfulded bible

Hose'a 5

¹Jawmiraawo wi'i: “Nane, onon liman'en! Keɗite booɗɗum, onon Yimɓe laamu Isra'iila! Keɗite, onon yimɓe saare laamiiɗo! Ngam haa mooɗon kiita wari. Ammaa on laati tuuforgol haa Mispa e zubaawol be'itaaŋgol dow hooseere Taboora.

²Ɓe ngasi ngaska lugguka haa Sittim[8]. Ngam maajum ɓoccanmi ɓe fuu.

³Mi anndi Efrayim. Isra'iila suuɗaaki yeeso am. Jonta Efrayim waɗi daakaareeku, Isra'iila soɓi.

⁴Kuuɗe maɓɓe ɗon kaɗa ɓe loraago haa Allah maɓɓe, ngam ruuhu daakaareeku ɗon caka maɓɓe, ngam ɓe anndaa yam min Jawmiraawo.

⁵Mawnitaare Isra'iila laati wullaandu dow hoore mum. Isra'iila e Efrayim pergoto ngam aybeeji muuɗum'en, Yahuuda boo fergoto hawtaade bee maɓɓe.

⁶Ɓe ngardan bee dammooji maɓɓe e na'i maɓɓe ngam ɓe ɓadita Jawmiraawo, ammaa ɓe tawataa mo, o daaytake ɓe.

⁷Ɓe zammbi Jawmiraawo, ngam ɓe ndanyi ɓiɓɓe njaalu'en. Ammaa jonta, nder lewru wooru tan, ɓe kalkan, kamɓe bee jawdi maɓɓe.

⁸Kadi puufe luwal haa Gibiya, puufe ngal haa Rama, koole haa Baytawiina: Benyamin, konne'en ɗon ɓaawo ma!

⁹Nyalaade mi waɗata kiita, Efrayim laatoto winnde. Mi anndinan le'i Isra'iila ko tammi wargo fakat.

¹⁰Ardiiɓe Yahuuda laati bana sottinooɓe keeri. Mi rufan tikkere am dow maɓɓe bana ndiyam.

¹¹Efrayim yiɗi tokkaago meereejum. Ngam maajum o toonyaama, kiita do'i mo.

¹²Mi laatanto Efrayim bana mbordi, mi laatanto Yahuuda bana nyawu nyaamoowu i'e.

¹³Efrayim yi'i nyawu muuɗum, Yahuuda boo yi'i huuduure muuɗum. Nden Efrayim yehi Assuura, neldi laamiiɗo mawɗo habaru. Ammaa kaŋko o waawataa yamɗitingo on, o waawataa hurgugo huuduure mooɗon.

¹⁴Ngam min mi laatanto Efrayim bana mbarooga, mi laatanto Yahuuda bana mbarooga cemmbiɗŋga. Mi seekan, nden mi dilla. Mi jaɓtan, walaa kisnanɗo ɓe.

¹⁵Mi dillan, mi loro haa nokkuure am, sey to ɓe tuubi, ɓe ɗakkotiri bee am, sey to ɓe torake yam bee tiinaare ngam ɓillaare maɓɓe.”