Read Fulfulded Yo'el 2 Bible Online

Yo'el 2 - Fulfulded bible

Yo'el 2

¹Puufe luwal konu haa Siyona, koole dow hooseere Jawmiraawo seniinde. Yimɓe lesdi fuu ndiwna, ngam nyalaade Jawmiraawo ɓaditake.

²Ɗum nyalaade nyiɓre nyiɓɓunde, nde nyalaade duule naarginanɗe. Ummaatoore mawnde semmbiɗnde ɗon sudda kooseeje bana jayŋgol fajiri. Irin ummaatoore nde'e meeɗaay laataago sam, irin maare meetataa laataago haa duuɓi ɓuranɗi daayaago boo.

³Yiite nyaamooye ɗon haa yeeso maare, ɗemŋgal yiite ɗon wula haa ɓaawo maare. Hiddeko nde wara, lesdi nanndi bee jarne Adnin. Ɓaawo nde dilli, ndi laati ladde meere, walaa koo ɗume daɗata.

⁴Nde nanndi bee pucci, nde doggan bana pucci ba'eteeɗi ngam konu.

⁵Bana hoolo mootaaji pucci, non hoolo maare dow geereeje kooseeje. Bana hoolo yiite nyaamanŋge tiitiiho, bana ummaatoore semmbiɗnde taaskaniinde haɓre, non nde wa'i.

⁶Ummaatooje ɗon ndiwna yeeso maare, geese fuu ɗon purɗa.

⁷Nde ɗon yaawa bana honooɓe semmbiɗɓe, nde ɗon wa'o mahi taariiɗi berniiji bana waawɓe konu. Gooto gooto fuu ɗon tokko laawol mum, walaa mo selata sam.

⁸Walaa mo yerɓata goɗɗo, koo moy ɗon tiito yeeso muuɗum. Ɓe ɗon caalo caka kuri, walaa ko darnata ɓe.

⁹Ɓe ɗon ukkano berniwol, ɓe ɗon njaawɗa dow mahol, ɓe mba'o dow cuuɗi, ɓe ɗon nastira ɗi gal burɗe maaji bana wuyɓe.

¹⁰Lesdi dimmbi yeeso maare, asamanji ndiwni, naaŋge e lewru nyiɓɓi, koode boo acci yaynugo.

¹¹Ngam Jawmiraawo hooli yeeso jama'aare konu muuɗum. Jama'aare maako ɗuuɗnde masin, hiɓɓinooɓe muuyo maako mari baawɗe. Ngam nyalaade Jawmiraawo laatoto mawnde, hulniinde masin. Moy waawata ɓusugo nde?

¹²Jawmiraawo wi'i: “Koo jonta boo, lorte haa am bee ɓernde woore, bee suumaye e bojji e gonɗi!

¹³Seekugo limce he'ataa, ndikka ngaylite ɓerɗe mooɗon.” Lorte haa Allah Jawmiraawo mooɗon, ngam o marɗo enɗam e hinnuye, mo tikkataa law, mo mbooɗeeŋga e gooŋgaaku mum ɗuuɗi, o faasitan waɗugo sarru.

¹⁴Moy anndi? Teema o waylititto, o faasitan, nden o accana on barka, haa on keɓa ko on lii'anto Jawmiraawo, Allah mooɗon bana dokke nyaamdu e dokke dufeteeɗe.

¹⁵Puufe luwal konu haa Siyona, taaskane suumaye, umre mooɓtorde.

¹⁶Mooɓte yimɓe, cene mooɓtorde, mooɓte ndotti'en, kawte ɓikkoy e musinankoy. Ɓaŋɗo wurto suudu muuɗum, ɓaŋaaɗo boo wurto waalordu muuɗum!

¹⁷Liman'en jagganooɓe Jawmiraawo mboya hakkunde zawleeru haykaliiru e hirsirde maaru. Sey ɓe mbi'a: “Yaa Jawmiraawo, enɗu ummaatoore ma, taa accu ɓe kuɗa yimɓe laatiiɓe maral ma, ngam taa jananɓe njanca ɓe, ngam taa ummaatooje goɗɗe mbi'a: Toy Allah maɓɓe?”

¹⁸Jawmiraawo yiɗi lesdi muuɗum bee yiide haajunde, o enɗi yimɓe ummaatoore maako.

¹⁹O jaabi ɓe ni'i: “Ndaa mi neldi on alkamaari e inaboojam e nebbam haa on kaara. Mi meetataa accugo ummaatooje njanca on.

²⁰Konne'en iwɓe woyla, mi daaynan ɓe e mooɗon, mi riiwan ɓe haa lesdi njoorndi perewndi. Mooɓre maɓɓe aartunde ndiiwanmi haa mbeela fuunaaŋge, mooɓre maɓɓe sakkitiinde boo haa mbeela hiirnaaŋge. Kacceeŋga nyolki maɓɓe eeŋgan dow, ngam min Jawmiraawo mi huuwi kuuɗe mawɗe.

²¹An lesdi, taa hul! Ammaa welweltu, seya, ngam min Jawmiraawo mi huuwi kuuɗe mawɗe!

²²Onon dabbaaji ladde, taa kule! Ngam durduɗe nder ladde puɗiti, leɗɗe ɗon ndima, ibbi e inabohi ɗon ndima ɓiɓɓe.

²³Onon boo, yimɓe Siyona, mbelmbelte, ceyore Jawmiraawo, Allah mooɗon, ngam mi mo'ani on iyeende arannde, mi toɓnani on iyeele, iyeende arannde e ragareere fuu bana naane.

²⁴Laarre[2] heewan alkamaari, ɓiɗɗirɗe keewan inaboojam e nebbam haa rufa.

²⁵Mi hokkitan on ko on majjini nder duuɓi ɗi nyaamoowu e mbaɓɓattu e ngilŋgu e ndo'u nyaami ƴaamle gese mooɗon, jama'aare konu am mawnde nde neldunoomi caka mooɗon.

²⁶Nden on nyaaman, on kaaran. On maŋgtan innde Jawmiraawo, Allah mooɗon mo waɗani on kaayeefiijum. Ummaatoore am meetataa semtineego!

²⁷Nden kam on anndan min mi ɗon caka Isra'iila, min mi Jawmiraawo, Allah mooɗon, walaa goɗɗo feere. Ummaatoore am meetataa semtineego!”