Read Fulfulded Amos 5 Bible Online

Amos 5 - Fulfulded bible

Amos 5

¹Onon Isra'iila'en, nane gimol boyki ngol ngimanmi dow mooɗon:

²Isra'iila, paanyo debbo, do'ake, ummitittaako. Ndaa o baaliiɗo haa lesdi maako. Goɗɗo umminanɗo mo boo woodaa.

³Ngam Allah Jawmiraawo wi'i: “Berniwol Isra'iila ngol yimɓe ujineere ngurti e muuɗum ngam konu, luttan teemerre. Ngol teemerre ngurti e muuɗum boo, luttan sappo.”

⁴Ndaa nii Jawmiraawo wi'i Isra'iila'en: “Ngaylite heedi am, nden kam on ngeeɗan!

⁵Ammaa taa ngaylite haa Baytila. Taa njehe Gilgal. Taa njehe Biirsaba sam. Ngam fakat Gilgal dahete, Baytila laatoto huunde meere.”

⁶Ngaylite heedi Jawmiraawo, nden kam on ngeeɗan! To naa non o halkan lenyol Yusufu bee yiite, o wulan Baytila, walaa nyifanɗo nge!

⁷On ɗon ngayla gooŋgaaku haa ngu laati bana njaram kaaɗɗam, on ɗon ngudina adilaaku bana mbuuwri haa lesdi.

⁸O waɗi koode ɗaccuki e dulooje. O ɗon wayla nyiɓre nyiɓɓunde haa laato fajiri, o ɗon wayla nyalawma haa laato jemma. O ɗon umra ndiyamji mbeela, haa o waanja ɗi dow lesdi. Innde maako Jawmiraawo.

⁹O ɗon ukka halkere dow semmbiɗɓe, non boo dow berniwol cemmbiɗŋgol.

¹⁰Onon on ɗon nganya pelanɗo on haa hiitordu, on ngiɗaa nanugo bolwanɗo gooŋga.

¹¹On ɗon torra laafuɗo, on ɗon njoɓna mo jomorgol alkamaari. Ngam maajum, on nyiɓi cuuɗi bee kaa'e cehaaɗe, ammaa on njooɗataako nder maaji. On njubi gese inabooje booɗɗe masin, ammaa on njarataa inaboojam maaje.

¹²Mi anndi, zunuubaaji mooɗon ɗuuɗi, hakkeeji mooɗon teddi. On ɗon ɓilla adiliijo, on ɗon ngaɗa rusiya ngam sottingo gooŋga talakaajo haa hiitordu.

¹³Ngam maajum kakkilɗo ɗon jeeɗo saa'iire nde'e, ngam nde halli.

¹⁴Tiine waɗugo ko wooɗi, naa ko halli, haa on ngeeɗa, haa Jawmiraawo, Allah honooɓe asama wonda bee mooɗon, bana mbi'roton!

¹⁵Nganye halleende, ngiɗe mbooɗeeŋga, mbaɗe kiita ngooŋɗuka haa hiitordu. Teema Jawmiraawo, Allah honooɓe asama hinnoto luttuɓe Yusufu.

¹⁶Ngam maajum Allah Jawmiraawo, honooɓe asama wi'i: “Haa babe fuu yimɓe mboyan. Dow laabi fuu yimɓe mbi'an: Kayya! Kayya! Ɓe ewnoto remooɓe haa pellel suno, non boo rewɓe annduɓe gimi boyki.

¹⁷Bojji laatoto koo haa gese inabooje boo ngam min mi saaloto caka mooɗon.” Non Jawmiraawo wi'i.

¹⁸Bone laatanto heppananɓe nyalaade Jawmiraawo! Ɗume nde nafata on? Nde nyiɓre, naa jayŋgol.

¹⁹Nde laatoto bana to goɗɗo doggi mbarooga, fotti bee ɓoodu[5]. To o yottake saare maako, o ɓaarake juŋngo maako haa mahol, nden mboodi soppi mo.

²⁰Nyalaade Jawmiraawo, fakat nde nyiɓre, naa jayŋgol, nde nyiɓre ɓaleere, naa ɗelko!

²¹Jawmiraawo wi'i: “Mi ɗon wanya juulɗe mooɗon, mi wudini ɗe. Mi seyortaako mooɓorle mooɗon.

²²To on lii'anake yam guleteeɗi e dokke nyaamdu, mi yerdataako ɗum. Mi yiɗaa yi'ugo ga'i payɗi ɗi on lii'anto yam kirseteeɗi ngam kawtal mooɗon bee am.

²³Acce hoolo gimi mon, mi yiɗaa mi nana pijirle moolooji mon!

²⁴Ko ngiɗmi kam, haa kiita ngooŋɗuka ɓula bana ndiyam, gooŋgaaku boo bana maayel ngel jinnataa.

²⁵Onon Isra'iila'en, duuɓi cappanɗe nayi ɓooyma nder ladde, on lii'ani yam kirsaaɗi e dokke nyaamdu na?

²⁶On mbaɗi suuraaji ɗowanteeɓe mooɗon, Sakkut, laamiiɗo mooɗon e Kaywan, horre lawru mooɗon, on ndoondi ɗi.

²⁷Ngam maajum ndahanmi on haa gaɗa Damas.” Non Jawmiraawo wi'i. Innde maako Allah honooɓe asama.