Read Fulfulded Yonas 1 Bible Online

Yonas 1 - Fulfulded bible

Yonas 1

¹Jawmiraawo wolwani Yonas ɓii Amittay, wi'i mo:

²“Umma, yah Niniwe, berniwol maŋngol. Waaza ngol kiita am, ngam halleende yimɓe maagol tullitake, mi safti laarugo nde.”

³Ammaa Yonas ummi, waɗi anniya doggugo haa Tarsis daayiiɗum e Jawmiraawo. O yehi Yafo, ton o heɓi koommbowal maŋngal jahanŋgal Tarsis. O yoɓi ceede jahaaŋgal, nden o nasti ngal ngam haa o yahda bee yimɓe maagal haa Tarsis, o dogga daayiiɗum e Jawmiraawo.

⁴Ammaa Jawmiraawo ummini henndu saatundu dow mbeela. Naargewol cemmbiɗŋgol wifi dow maaga, haa koommbowal ɓadake fusugo.

⁵Laanyooɓe koommbowal kultori, mboyi, koo moy heedi ɗowanteeɗo mum. Ɓe ngudini doŋgle maɓɓe nder mbeela ngam hoynugo teddeeŋga koommbowal. Ammaa Yonas jippino nder reedu maagal, waali, ɗon ɗaano ɗoyŋgol lugguŋgol.

⁶Mawɗo koommbowal wari haa maako, wi'i mo: “Ko waɗi ma, ɗoyɗiijo? Umma, tora ɗowanteeɗo maaɗa! Teema o yurminan en ngam taa en kalka.”

⁷Laanyooɓe koommbowal mbi'mbi'tiri: “Sey en mbaɗa kur'u ngam heɓtugo moy waddani en sarru ngu'u.” Ɓe mbaɗi kur'u, ngu waŋgini Yonas.

⁸Ɓe mbi'i mo: “Yeccu min, ngam daliila moy sarru ngu'u ukkani en? Kuugal ngale kuuwata? Diga toy ngarɗaa? Toy lesdi ma e ummaatoore ma?”

⁹O jaabi ɓe: “Mi Ibraniŋkeejo, mi kulɗo Allah Jawmiraawo mo asama, mo tagi mbeela e lesdi.”

¹⁰Nden laanyooɓe koommbowal kuli masin, mbi'i mo: “Kayya! Ɗume mbaɗɗa?” Ngam ɓe anndi o ɗon dogga diga yeeso Jawmiraawo, bana o anndiniri ɓe.

¹¹Ammaa mbeela ɗon ɓesda dimmbaago. Ngam maajum ɓe ƴami mo: “Ɗume min mbaɗata ma ngam haa mbeela de'ana min?”

¹²O jaabi: “Sey on koo'ammi, on cakkinammi nder ndiyam. Nden kam mbeela de'anan on. Ngam mi anndi naargewol cemmbiɗŋgol ngo'ol ukkani on daliila am.”

¹³Laanyooɓe koommbowal laanyi bee semmbe ngam lornugo koommbowal haa fomoonde. Ammaa ɓe mbaawaay, ngam mbeela ɗon ɓesda dimmbaago bee semmbe.

¹⁴Nden ɓe tori Jawmiraawo: “Yaa Jawmiraawo, useni! Taa accu min min kalka ngam daliila yoŋki gorko oo. Taa yowan min ƴiiƴam goɗɗo mo waɗaay aybe. Ngam an, yaa Jawmiraawo, a waɗi ko fottani ma.”

¹⁵Nden ɓe koo'i Yonas, ɓe cakkini mo nder ndiyam. Mbeela de'i, acci dimmbaago.

¹⁶Ngam maajum yimɓe koommbowal kuli Jawmiraawo masin. Ɓe lii'ani mo kirsaaɗi, ɓe togani mo togayeeje boo.