Read Fulfulded Yonas 3 Bible Online

Yonas 3 - Fulfulded bible

Yonas 3

¹Fahin Jawmiraawo wolwani Yonas, wi'i mo:

²“Umma, yah Niniwe, berniwol maŋngol. Waaza ngol ko mi wi'ete.”

³Nden Yonas ummi, yehi Niniwe, bana Jawmiraawo umri mo. Niniwe laati berniwol maŋngol yeeso Jawmiraawo. Ngam yiilaago ngol, sey goɗɗo waɗa nyalɗe tati.

⁴Yonas nasti ngol baakin yahdu nyalaade woore. O waazi: “Lutti nyalɗe cappanɗe nayi haa Niniwe halka!”

⁵Yimɓe Niniwe nuɗɗini Allah. Ɓe umri suumaago, ɓe ɓorni buhuuje[1], mawɓe e leesɓe fuu.

⁶Haala man yottani laamiiɗo Niniwe. O ummi dow leeso laamu maako, o ɓorti alkibbaare maako, o ɓorni limce buhuuje, o jooɗi nder doɗɗe.

⁷O umri ɓe ngooyna umroore laamiiɗo e mawɓe mum nder Niniwe, wi'ugo ni'i: “Yimɓe e dabbaaji fuu, na'i e dammooji, taa nyaama koo ɗume, taa ndura, taa njara ndiyam.

⁸Sey yimɓe e dabbaaji fuu cuddo limce buhuuje. Sey ɓe toro Allah bee semmbe, ɓe tuuba, sey koo moy acca laawol mum kalluŋgol e kuuɗe mum kalluɗe.

⁹Moy anndi? Teema Allah faasitan, o accan tikkango en tikkere saatunde ngam taa en kalka.”

¹⁰Nde Allah yi'i ko ɓe mdaɗi, no ɓe acciri laawol maɓɓe kalluŋgol, o faasiti huuwugo ɓe sarru ngu o wi'no.