Read Fulfulded Limle 1 Bible Online

Limle 1 - Fulfulded bible

Limle 1

¹Nder nduuɓu ɗiɗaɓu ɓaawo gurtaaki Isra'iila'en diga lesdi Misra, lewru ɗiɗaɓru, nyannde go'oore maaru, Jawmiraawo wolwani Muusa nder laymaaru fottirde haa ladde hamaadaare Sina. O wi'i:

²“An e Haruna, mbaɗe binndol: Mbinnde limgal yimɓe jama'aare Isra'iila fuu fodde asli muuɗum'en e ci'e[1] muuɗum'en, mbinnde inɗe worɓe fuu, waawanɓe hoo'ugo balmi konu, ɓe duuɓi noogas e ko ɓuri, koo moy nder mooɓre konu muuɗum.

⁴Haa lenyol fuu baaba-saare gooto wallan on.

⁵Ndaa inɗe wallanɓe on: Nder lenyol Ruben, Elicuru ɓii Sedewur.

⁶Nder lenyol Simeyon, Selumiyel ɓii Curisadday.

⁷Nder lenyol Yahuuda, Nahasunu ɓii Amminadabu.

⁸Nder lenyol Issakar, Netaneyel ɓii Cu'ar.

⁹Nder lenyol Zabulon, Eliyabu ɓii Helon.

¹⁰Nder lenyol Efrayim ɓii Yusufu, Eliisama ɓii Ammihudu e haa lenyol Manassa boo, Gamaliyel ɓii Pedacuru.

¹¹Nder lenyol Benyamin, Abidan ɓii Gidi'oni.

¹²Nder lenyol Dan, Ahi'ezer ɓii Ammisadday.

¹³Nder lenyol Aser, Pagiyel ɓii Okran.

¹⁴Nder lenyol Gada, Eliyasaf ɓii De'uwel.

¹⁵Nder lenyol Neftali, Ahiira ɓii Enan.”

¹⁶Kamɓe ngoni worɓe suɓaaɓe nder jama'aare, ardiiɓe le'i muuɗum'en, ɓe ardiiɓe ujineeje Isra'iila.

¹⁷Muusa e Haruna koo'i yimɓe suɓaaɓe innde bee innde ɓe'e.

¹⁸Ɓe mooɓti jama'aare fuu nyannde go'oore nder lewru ɗiɗaɓru. Isra'iila'en fuu mbinndaama nder defte fodde asli e ci'e muuɗum'en. Ɓe mbinndi inɗe worɓe ɓe duuɓi noogas e ko ɓuri fuu, gooto gooto,

¹⁹Muusa limi yimɓe nder ladde hamaadaare Sina bana Jawmiraawo umruno mo.

²⁰Worɓe ɓe duuɓi noogas e ko ɓuri, waawanɓe hoo'ugo balmi konu fuu mbinndaama innde innde, fodde asli muuɗum'en e ci'e muuɗum'en. Ɓe puɗɗiri bee lenyol Ruben, afo Isra'iila.

²¹Limgal limaaɓe nder lenyol Ruben waɗi ujine cappanɗe nayo e njoweego e teemeɗɗe njowo (46.500).

²²Lenyol Simeyon: Ujine cappanɗe njowo e njoweenayo e teemeɗɗe tato (59.300).

²⁴Lenyol Gada: Ujine cappanɗe nayo e njowo e teemeɗɗe njoweego e cappanɗe njowo (45.650).

²⁶Lenyol Yahuuda: Ujine cappanɗe njoweeɗiɗo e nayo e teemeɗɗe njoweego (74.600).

²⁸Lenyol Issakar: Ujine cappanɗe njowo e nayo e teemeɗɗe nayo (54.400).

³⁰Lenyol Zabulon: Ujine cappanɗe njowo e njoweeɗiɗo e teemeɗɗe nayo (57.400).

³²Lenyol Efrayim ɓii Yusufu: Ujine cappanɗe nayo e teemeɗɗe njowo (40.500).

³⁴Lenyol Manassa ɓii Yusufu: Ujine cappanɗe tato e ɗiɗo e teemeɗɗe ɗiɗo (32.200).

³⁶Lenyol Benyamin: Ujine cappanɗe tato e njowo e teemeɗɗe nayo (35.400).

³⁸Lenyol Dan: Ujine cappanɗe njoweego e ɗiɗo e teemeɗɗe njoweeɗiɗo (62.700).

⁴⁰Lenyol Aser: Ujine cappanɗe nayo e ngo'o e teemeɗɗe njowo (41.500).

⁴²Lenyol Neftali: Ujine cappanɗe njowo e tato e teemeɗɗe nayo (53.400).

⁴⁴Bana nii Muusa e Haruna e baaba-ci'e'en laatiiɓe ardiiɓe le'i sappo e ɗiɗi limi worɓe Isra'iila'en ɓe duuɓi noogas e ko ɓuri waawanɓe hoo'ugo balmi konu fuu, fodde ci'e maɓɓe. Limgal maɓɓe fuu waɗi ujine teemeɗɗe njoweego e tato e teemeɗɗe njowo e cappanɗe njowo (603.550).

⁴⁷Ammaa lenyol Lewi'en, fodde lenyol baabiraaɓe muuɗum'en limdaaka bee maɓɓe,

⁴⁸ngam Jawmiraawo wi'no Muusa:

⁴⁹“Taa mbinnde lenyol Lewi, taa limu ngol caka Isra'iila'en.

⁵⁰Ammaa halfin Lewi'en kuugal nder jooɗorde seedamku alkawal, non boo kuuwruɗe gonɗe nder maare fuu. Ɓe ndoondo jooɗorde e kuuwruɗe maare, ɓe kuuwa nder maare e ɓe caŋngina nder taarde maare boo.

⁵¹Sey Lewi'en piista jooɗorde saa'i nde jahaaŋgal ummoto fuu. Nde caŋnginton fuu boo, ɓe ndarna nde fahin. To goɗɗo feere ɓaditake nde, o mbareteeɗo.

⁵²Isra'iila'en luttuɓe caŋngina haa nokkuuje muuɗum'en, koo moy bee mooɓre konu mum, baŋnge tuutawal fodde yeɓre mum.

⁵³Lewi'en kam caŋngina nder taarde jooɗorde, ngam taa tikkere am ukko dow jama'aare Isra'iila. Ɓe cuklanto kuuɗe nder jooɗorde sundukru alkawal.”

⁵⁴Isra'iila'en mbaɗi fuu kal-kal bana no Jawmiraawo umruno Muusa.