Read Fulfulded Limle 11 Bible Online

Limle 11 - Fulfulded bible

Limle 11

¹Ummaatoore Isra'iila woyani Jawmiraawo bana to sarru heɓi nde. Nde Jawmiraawo nani ɗum, o tikki masin, o huɓɓi yiite caka maɓɓe, nge nyaami seɓatto saŋngeere.

²Ɓe ngookani Muusa, kaŋko o tori Jawmiraawo, nden yiite man nyifi.

³Ɓe ewni nokkuure nde'e Tabe'era[7], ngam haa ton yiite Jawmiraawo huɓɓi caka maɓɓe.

⁴Zindar[8] waɗi jananɓe yahduɓe bee Isra'iila'en. Nden Isra'iila'en boo puɗɗiti siŋkugo, mbi'i: “Moy hokkata en kusel haa en nyaama?

⁵Kayya! Ciftore, haa Misra en ɗonno nyaama liɗɗi bilaa soodugo e en ɗonno nyaama baygooje e kurciije e haakooji e tiŋeeje e albacce.

⁶Ammaa jonta kondondi men njoori. Walaa koo ɗume, sey mannu tan en ngi'ata!”

⁷Mannu man nanndi bee aawdi famardi, ndaneeri bana ɗacce lekki.

⁸Yimɓe ɗon caŋkito, mooɓta ndu. Nden ɓe nama ndu dow namrude malla ɓe una ndu, ɓe ndefa ndu nder payanɗe malla ɓe mbaɗa tamseeje bette bee man boo. Ndu weli bana tamseeje ca'aaɗe bee nebbam.

⁹Mannu man ɗon saama bee jemma dow saŋngeere hawtaade bee saawawre.

¹⁰Muusa nani bojji yimɓe go, koo moy ɗon darodi bee yimɓe saare mum haa nastirde laymaaru mum. Jawmiraawo tikkani ɓe masin. Ɓernde Muusa boo metti

¹¹dow Jawmiraawo, nden o wi'i mo: “Koni mbaɗɗa maccuɗo ma kalluɗum? Ngam ɗume mi heɓaay mo'ere haa maaɗa? Koni njowanɗa mi doŋngal yimɓe ummaatoore nde'e fuu?

¹²Kadi min danyi ɓe fuu na? Koni umruɗaami mi jogo ɓe bana musininoowo jogorto musinanŋgel, mi yahra ɓe dow juuɗe am haa yotto lesdi ndi kunaniiɗa kaakiraaɓe maɓɓe a hokkan ɓe ndi?

¹³Toy keɓanmi kusel haa mi nyaamna yimɓe ummaatoore nde'e fuu? Ngam ɓe accaay siŋkugo, ɓe ɗon tokki ƴamugo yam kusel!

¹⁴Min feere am mi waawataa suklanaago ummaatoore nde'e fuu, ngam nde teddani yam masin!

¹⁵To non kam, ndikka mbara mi, to a yerdake ɗum, ngam taa mi tokko yi'ugo sarru ngu a ukkani yam.”

¹⁶Jawmiraawo wi'i Muusa: “Mooɓtanam ndotti'en cappanɗe njoweeɗiɗo, ndotti'en caka Isra'iila'en ɓe annduɗa e kaliifa'en. Yahru ɓe haa laymaaru fottirde, ɓe ndarodo ton bee maaɗa.

¹⁷Mi jippoto, mi wolida bee maaɗa. Mi hoo'an haa ruuhu gonɗo nder ma, mi hokka ɓe ɗum. Nden kam ɓe ndoondodotto bee ma doŋngal ummaatoore nde'e, a roondataako ngal an feere ma fahin.

¹⁸Wi' Isra'iila'en boo ɓe cena ko'e maɓɓe ngam jaŋngo, ɓe nyaaman kusel. Jawmiraawo nani bojji mooɗon heedi muuɗum bee wi'go: Moy hokkata en kusel haa en nyaama? Haa Misra en ɗonno nder hayru! Jawmiraawo hokkan on kusel, on nyaaman ngel boo.

¹⁹On nyaamataa ngel nyalaade woore malla nyalɗe ɗiɗi malla jowi malla sappo malla noogas tan,

²⁰ammaa on nyaaman ngel deydey lewru fuu, haa on cafta, haa on tuuta ngel. Ngam on ngudini Jawmiraawo gonɗo caka mooɗon, on mboyi yeeso maako, on mbi'i: Koni en ngurti lesdi Misra?”

²¹Muusa wi'i Jawmiraawo: “Asee! Worɓe yahooɓe bee kosɗe ujine teemeɗɗe njoweego (600.000) ɗon ngondi bee am. An boo a wi'i a hokkan ɓe kusel, ɓe nyaama ngel deydey lewru fuu!

²²To ɓe kirsi na'i e dammooji, ɗum he'an ɓe na? Malla to ɓe naŋngi liɗɗi fuu nder mbeela, ɗum he'an ɓe na?”

²³Jawmiraawo jaabi Muusa: “Kadi juŋngo am rammi na? A yi'an to wolde am gooŋɗan malla gooŋɗataa.”

²⁴Muusa wurti, yecci ummaatoore ko Jawmiraawo wi'i mo fuu. O mooɓti cappanɗe njoweeɗiɗo caka ndotti'en, o darni ɓe nder taarde laymaaru fottirde.

²⁵Nden Jawmiraawo jippi nder ruulde, wolwani Muusa, hoo'i haa ruuhu gonɗo nder maako, hokki ɗum ndotti'en go. Nde ruuhu man jippi dow maɓɓe, law ɓe mbaɗi annabaaku, ammaa ɓaawoɗon ɗum tokkitaaki.

²⁶Ɗiɗo maɓɓe, Eldat e Meedat, ɗonno nder saŋngeere, ɓe ngaraay haa laymaaru fottirde. Ruuhu jippi dow maɓɓe, kamɓe boo ɓe mbaɗi annabaaku ton nder saŋngeere.

²⁷Sukaajo feere doggi maatini Muusa, yecci mo no Eldat e Meedat ɗon mbaɗa annabaaku nder saŋngeere!

²⁸Yosuwa ɓii Nuuna, balloowo Muusa diga nderkaaku mum, wi'i: “Haɗ ɓe, jaagorɗo am!”

²⁹Ammaa Muusa jaabi mo: “A haajantam na? Jawmiraawo hokkuma yimɓe mum fuu Ruuhu mum, ɓe laato annabi'en!”

³⁰Nden Muusa bee ndotti'en go lorti haa saŋngeere.

³¹Jawmiraawo waddi henndu, ndu waddi gerle diga wakeere mbeela, do'i ɗe haa saŋngeere, ɗe taari nde deydey jahaaŋgal nyalaade woore gal wakeere nde'e e ndeya fuu. Ɗe mbaagi dow lesdi baakin meetir gootel.

³²Ummaatoore yehi, mooɓti gerle nyalawmaaje ɗiɗi, jemmaare woore. Mo mooɓti peetum heɓi baakin buhuuje noogas. Ɓe mbe'iti ɗe dow lesdi nder taarde saŋngeere fuu.

³³Diga kusel timmaay ƴakkeego tawon, Jawmiraawo tikkani ɓe, ukkani ɓe sarru naawŋgu masin.

³⁴Ɓe ewni nokkuure nde'e Kibirot-Hattaawa[9], ngam ɓe uwi zindaaɓe ton.

³⁵Ɓe ummi Kibirot-Hattaawa ɓe ndilli Hacerot, ɓe caŋngini ton.