Read Fulfulded Limle 12 Bible Online

Limle 12 - Fulfulded bible

Limle 12

¹Miriyam e Haruna mbolwi dow Muusa ngam o te'uno debbo Etiyopiyaajo.

²Ɓe mbi'i: “Kadi Jawmiraawo ɗon wolwira kam bee Muusa tan na? Naa o wolwiran bee amin, minin boo na?” Jawmiraawo nani ɗum.

³Muusa o jaŋkiniiɗo masin, walaa jaŋkiniiɗo bana maako haa duniyaaru fuu.

⁴Law Jawmiraawo wi'i Muusa e Haruna e Miriyam: “Ngurte, njehe haa laymaaru fottirde, onon tato fuu!” Ɓe tato fuu ɓe ngurti, ɓe njehi.

⁵Jawmiraawo jippi nder ruulde nanndunde bee daŋraŋgal, dari haa nastirde laymaaru, ewni Haruna e Miriyam. Ɓe ɗiɗo fuu ɓe ɓaditi.

⁶Jawmiraawo wi'i: “Nane ko mi wi'ata! To woodi annabiijo am caka mooɗon, nden kam mi waŋgiranan mo bee wahayuuji, mi wolwiranan mo bee koyɗi.

⁷Ammaa bee jaggiiɗo am Muusa ɗum laatataako non. O ɗon suklani yimɓe ummaatoore am fuu bee hoolaare.

⁸Mi ɗon yeewtida bee maako hunnduko bee hunnduko, nder baŋguɗum naa nder cuuɗiiɗum. O yi'i koo jaati am boo. Koni on kulaay wolwugo dow jaggiiɗo am Muusa?”

⁹Jawmiraawo tikkani ɓe, nden o dilli.

¹⁰Nde ruulde sotti diga laymaaru fottirde, saɗawre fiilti ɓanndu Miriyam, o furɗi tal bana mallimalloore. Nde Haruna wayliti gal maako, o yi'i saɗawre fiilti ɓanndu maako.

¹¹Nden Haruna wi'i Muusa: “Useni, jaagorɗo am, taa yowan min kiita aybe amin ngam min mbaɗi aybe man bee faataare!

¹²Useni, taa o laato bana ɓiŋngel ngel wardaay bee yoŋki, ngel reeta ɓanndu mum nyoli!”

¹³Nden Muusa tori Jawmiraawo: “Yaa Allah, yamɗitin mo!”

¹⁴Jawmiraawo jaabi: “To baaba maako tuutino mo tuuɗe haa yeeso, o jooɗataako bee semteende man nyalɗe joweeɗiɗi na? Fakat o gurtinteeɗo diga saŋngeere nyalɗe joweeɗiɗi. Ɓaawoɗon o loro caka mooɗon.”

¹⁵Ɓe ngurtini Miriyam diga saŋngeere nyalɗe joweeɗiɗi. Isra'iila'en ndimmbaaki haa o warti.

¹⁶Nden ɓe ummi Hacerot, ɓe caŋngini nder ladde Paran.