Read Fulfulded Limle 21 Bible Online

Limle 21 - Fulfulded bible

Limle 21

¹Laamiiɗo Kanaani'en haa Arat nder lesdi fombina nani Isra'iila'en ɗon ngarda laawol Atariima. O ukkani ɓe, o naŋngi woɗɓe maɓɓe.

²Isra'iila'en togani Jawmiraawo togayeere, mbi'i: “To a hokki min jaalorgal dow jama'aare nde'e, nden kam min nattinan berniiji maɓɓe fuu.”

³Jawmiraawo nani ɓe, hokki ɓe jaalorgal dow Kanaani'en. Isra'iila'en nattini ɓe e berniiji maɓɓe fuu. Ɓe inndi nokkuure man Horma[17].

⁴Isra'iila'en ummi hooseere Hor, tokki laawol maayo Maaliya haa taaro lesdi Edoom. Ammaa dow laawol, ɓe mbaɗi sooynde munyal.

⁵Ɓe ciŋki Allah e Muusa. Ɓe mbi'i: “Koni on ngurtini min lesdi Misra haa min maaya nder ladde nde'e? Walaa nyaamdu e ndiyam haa ɗo! Min cafti boo nyaamdu meereeru ndu'u!”

⁶Jawmiraawo neli boɗɗe marɗe tooke masin (ɓanndu wulan jaw bana yiite to irin mboodi ndi'i ŋati goɗɗo) caka maɓɓe, ɗe ŋati yimɓe, ɗuuɗɓe maɓɓe maayi.

⁷Isra'iila'en ngari haa Muusa, mbi'i mo: “Min mbaɗi hakke bee siŋkugo Jawmiraawo e siŋkugo ma. Tora Jawmiraawo, o sottinana min boɗɗe ɗe'e.” Muusa torani jama'aare.

⁸Jawmiraawo wi'i mo: “Sey a waɗa mboodi njamndi mboɗeeri, a ɓila ndi dow leggal haa koo moy ŋataaɗo laara ndi, hisa maayugo.”

⁹Muusa waɗi mboodi njamndi mboɗeeri, o ɓili ndi dow leggal. Koo moy ŋataaɗo, laari mboodi njamndi, hisi maayugo.

¹⁰Isra'iila'en ummi ton, caŋngini haa Obot.

¹¹Ɓe ummi Obot, ɓe ngari haa Iye-Atariima, nder ladde haa fuunaaŋge lesdi Mo'ab.

¹²Ɓe ummi ton, ɓe caŋngini haa waadiwol Zeret.

¹³Ɓe ummi Zeret, ɓe caŋngini haa sera waadiwol Arnon ummiiŋgol lesdi Amoori'en haa yotti ladde. Ngol ɗonno haa keerol hakkunde Amoori'en bee Mo'abi'en.

¹⁴Ngam maajum Deftere Konuuji Jawmiraawo ɗon wi'a: “Wuro Waheba baŋnge Sufa e waadiiji e Arnon

¹⁵e diirtorde waadiiji wurnde heedi berniwol Ar haa yotti keerol lesdi Mo'ab.”[18]

¹⁶Diga ton ɓe ndilli Beer. Haa ton Jawmiraawo wi'no Muusa: “Mooɓtu jama'aare haa mi yarna nde.”

¹⁷Saa'i man Isra'iila'en ngimi: “An ɓulndu, yaaltu! Ngimnde ndu!

¹⁸Kayru woni ɓulndu ndu ardiiɓe, tedduɓe caka jama'aare ngasi ɗum bee tuggaaru laamiiɗo e bee cabbi maɓɓe.” Ɓe ummi ladde nde'e ɓe njehi Mattana.

¹⁹Ɓe ummi Mattana, ɓe njehi Nahaliyel. Ɓe ummi Nahaliyel, ɓe njehi Bamot.

²⁰Ɓe ummi Bamot, ɓe njehi haa waadiwol nder njayri Mo'ab, les hooseere Pisiga towtunde dow harde.

²¹Isra'iila'en neli nelaaɓe haa Sihon, laamiiɗo Amoori'en. Ɓe mbi'i:

²²“Accu min caalo lesdi ma. Min nastataa gese alkamaari malla gese inabooje, min njarataa ndiyam ɓulli mon. Min tokkoto buuwol haa to min caalake maral ma.”

²³Ammaa Sihon duŋanaaki ɓe saalaago lesdi mum. O mooɓti jama'aare konu maako fuu, ɓe njehi, ɓe potti bee Isra'iila'en baŋnge Yahas nder ladde, ɓe kaɓi bee maɓɓe.

²⁴Isra'iila'en mbari ɓe bee kaafahi. Ɓe nyaami lesdi Sihon, diga Arnon haa maayo Yabbok, haaɗi haa keerol Ammooni'en ngam ngol cemmbiɗinaaŋgol.

²⁵Isra'iila'en nyaami berniiji Amoori'en fuu. Ɓe njooɗi nder maaji fuu, non boo haa Hesbon e gure taariiɗe ngol fuu.

²⁶Hesbon wonno berniwol Sihon, laamiiɗo Amoori'en. Kaŋko o haɓno bee laamiiɗo Mo'abi'en aartuɗo, o jaɓti lesdi mum fuu haa yotti Arnon.

²⁷Ngam maajum yimooɓe ɗon ngima: “Ngare haa Hesbon, berniwol laamiiɗo Sihon, haa ngol nyiɓte, ngol semmbiɗa fahin.

²⁸Naane yiite iwi Hesbon, ɗemŋgal yiite iwi laamorde Sihon, nyaami Ar nder lesdi Mo'ab, halki mawɓe towndiije haa Arnon.

²⁹Kayto, onon yimɓe Mo'ab! On kalki, onon ummaatoore Kemos! Ɗowanteeɗo mon laatini worɓe mum dogguɓe, rewɓe mum boo naŋngaaɓe Sihon, laamiiɗo Amoori'en!

³⁰Ammaa jonta min piɗi ɓe, min mbili Hesbon haa yotti Dibon. Min nguli boo Nofaha haa yotti Medeba.”[19]

³¹Isra'iila'en njooɗi nder lesdi Amoori'en.

³²Muusa neli nelaaɓe ngam horugo berniwol Ya'ajer. Isra'iila'en nyaami gure taariiɗe ngol, ndiiwi Amoori'en jooɗiiɓe ton.

³³Nden Isra'iila'en ngayliti, tokki laawol yahugo lesdi Baasan. Ook, laamiiɗo Baasan bee jama'aare konu mum fuu ngurti ngam haɓugo bee maɓɓe haa Edirey.

³⁴Jawmiraawo wi'i Muusa: “Taa hul mo, ngam mi hokki ma mo, kaŋko e yimɓe maako fuu e lesdi maako. Waɗ mo ko a waɗi Sihon, laamiiɗo Amoori'en jooɗinooɗo haa Hesbon.”

³⁵Isra'iila'en mbari Ook e ɓiɓɓe mum e yimɓe mum fuu, walaa koo gooto maɓɓe daɗi. Nden ɓe marti lesdi maako.