Read Fulfulded Limle 27 Bible Online

Limle 27 - Fulfulded bible

Limle 27

¹Celofhad ɓii Hefer ɓii Gile'at ɓii Makir ɓii Manassa ɓii Yusufu woodi ɓiɓɓe rewɓe. Ndaa inɗe maɓɓe: Mahala e No'a e Hogila e Milka e Tirsa. Ɓe yimɓe saare woɗnde nder ci'e Manassa. Ɓe ɓaditi,

²ɓe ndari yeeso Muusa e Eli'azaaru limanjo e ardiiɓe e jama'aare fuu haa dammugal laymaaru fottirde. Ɓe mbi'i:

³“Baaba amin maayi nder ladde. O wondaay bee Koora e mooɓre mum, saa'i ɓe tuurtana Jawmiraawo. O maayi ngam daliila hakke maako. Ammaa o walaa ɓiɓɓe worɓe.

⁴Koni innde maako majjata nder saare maako ngam o walaa ɓiɗɗo gorko? Hokku min maral lesdi caka deerɗiraaɓe baaba amin.”

⁵Muusa ƴami Jawmiraawo ngam haala maɓɓe ka'a.

⁶Jawmiraawo wi'i mo:

⁷“Ko ɓiɓɓe Celofhad rewɓe ɗaɓɓi, ɗum fotti. Sey a hokka ɓe maral lesdi caka deerɗiraaɓe baaba maɓɓe, ɓe ndona ko o heɓanno.

⁸Wi' Isra'iila'en ni'i: To goɗɗo maayi, walaa ɓiɗɗo gorko, nden kam ɓiyiiko debbo rona maral maako.

⁹To o walaa ɓiɗɗo debbo, nden kam deerɗiraaɓe maako ndona ngal.

¹⁰To o walaa deerɗiraaɓe, nden kam wappanyɓe maako ndona ngal.

¹¹To o walaa wappanyɓe boo, nden kam banndiiko nder asŋgol maako ɓurɗo ɓadaago rona ngal. Ɗum laatanto Isra'iila'en farilla tabitinanka kiita ndarnuka fodde ko min Jawmiraawo mi umri ma.”

¹²Jawmiraawo wi'i Muusa: “Wa'a hooseere Abariima nde'e, haa ngi'a lesdi ndi ndokkumi Isra'iila'en.

¹³A yi'a ndi, nden a hawtoya bee yimɓe ma haa joonde maayɓe, bana deerɗa Haruna,

¹⁴ngam on tuurtani umroore am nder ladde Ciin saa'i jama'aare fuu jokkiri bee am daliila ndiyam. On ceednaay senaare am yeeso maɓɓe haa ndiyam Meriba baŋnge Kaades nder ladde Ciin.”

¹⁵Muusa tori Jawmiraawo, wi'i:

¹⁶“Yaa Jawmiraawo Allah, dokkanɗo marɗum ɓanndu fuu yoŋki, darnu goɗɗo dow yimɓe jama'aare.

¹⁷Kaŋko o ardo ɓe, o ɗowa ɓe nder haɓre, ngam taa jama'aare ma laato bana tokkere baali nde walaa gaynaako.”

¹⁸Jawmiraawo wi'i Muusa: “Ewna Yosuwa ɓii Nuuna, mo Ruuhu am ɗon nder mum, yow juuɗe ma dow hoore maako.

¹⁹Darnu mo yeeso Eli'azaaru limanjo e jama'aare fuu, ngam a halfitina mo kuugal maako yeeso maɓɓe.

²⁰Sey a hokka mo yeɓre baawɗe ma, haa jama'aare Isra'iila fuu ɗowtano mo.

²¹O daroto yeeso Eli'azaaru limanjo. Kaŋko o ɓadititto yeeso am, o ƴaman muuyo am bee kaa'e kur'u. Yosuwa e Isra'iila'en wonduɓe bee maako e jama'aare Isra'iila fuu ɗowtanto umrooje maako.”

²²Muusa waɗi ko Jawmiraawo umri mo. O ewni Yosuwa, o darni mo yeeso Eli'azaaru limanjo e jama'aare fuu,

²³o yowi juuɗe maako dow hoore maako, o halfitini mo kuugal maako, bana Jawmiraawo wi'no mo.