Read Fulfulded Limle 32 Bible Online

Limle 32 - Fulfulded bible

Limle 32

¹Le'i Ruben e Gada mari dabbaaji ɗuuɗɗi masin. Ɓe ngi'i no lesdi Ya'ajer e lesdi Gile'at laatori durdude woonde.

²Ngam maajum ɓe njehi haa Muusa e Eli'azaaru limanjo e ardiiɓe jama'aare, ɓe mbi'i:

³“Jawmiraawo jaalake lesdi ndi'i yeeso jama'aare Isra'iila, waato Atarot e Dibon e Ya'ajer e Nimra e Hesbon e El'ale e Sibama e Nebo e Be'on. Ndi laati durdude woonde, minin boo min mari dabbaaji ɗuuɗɗi.

⁵To a yerdake min, useni marnu min lesdi ndi'i. Taa eernu min maayo Urdun.”

⁶Muusa jaabi yimɓe Ruben: “On njooɗoto ɗo yaake banndiraaɓe mon njahata haɓoygo!

⁷Koni kulnoton Isra'iila'en ngam taa ɓe eero maayo Urdun, ɓe nasta lesdi ndi Jawmiraawo hokki ɓe?

⁸Bana non baabiraaɓe mon mbaɗi saa'i mi neli ɓe diga Kaades-Barne'a ngam ɓe kora lesdi.

⁹Ɓe njehi, ɓe njotti waadiwol Eskol, ɓe ndaari lesdi. Ammaa nde ɓe ngarti, ɓe kulni yimɓe ngam taa ɓe nasta lesdi ndi Jawmiraawo hokki ɓe.

¹⁰Nyalaade man Jawmiraawo tikkani Isra'iila'en, huni:

¹¹Fakat, worɓe wurtiiɓe Misra, ɓe duuɓi noogas e ko ɓuri, ngi'ataa lesdi ndi kunaniimi Ibrahiima e Isiyaaku e Yaakubu, ngam ɓe tokkaaki yam bee ɓernde woore.

¹²Sey Kaaleb ɓii Yefunna Kenizziijo e Yosuwa ɓii Nuuna tan ngi'ata ndi, ngam kamɓe ɓe tokki yam bee ɓernde woore.

¹³Jawmiraawo tikkani Isra'iila'en, yiilni ɓe nder ladde duuɓi cappanɗe nayi, haa yidere maɓɓe fuu maayi, ngam ɓe mbaɗi kalluɗum haa Jawmiraawo.

¹⁴Jonta boo, yimɓe yidere hallunde nde'e ɗon mbaɗa bana baabiraaɓe maɓɓe, haa ɓe ɗuɗɗina tikkere Jawmiraawo dow Isra'iila!

¹⁵To on ngaylitake, on acci mo, nden kam o tokkoto yiilnugo on nder ladde. Bana non nastinton ummaatoore nde'e fuu nder halkere.”

¹⁶Ɓe ɓaditi Muusa, ɓe mbi'i: “Accu min mbaɗa baalɗe ngam baali e be'i amin e berniiji ngam ɓikkoy amin.

¹⁷Nden min taaskoto, min ardo jama'aare konu Isra'iila'en, haa to min nastini ɓe nder lesdi maɓɓe. Saa'i man ɓikkoy amin njooɗoto nder berniiji cemmbiɗɗi, kisan yimɓe lesdi ndi'i.

¹⁸Min kootataa ci'e[23] amin, sonaa to Isra'iila'en luttuɓe keɓi mare lesdi maɓɓe.

¹⁹Min keɓataa maral gese caka maɓɓe gaɗa Urdun, ngam min keɓi geɗal amin haa fuunaaŋge Urdun.”

²⁰Muusa jaabi ɓe: “To on ngiɗi waɗugo bana non, nden kam taaske ngam haɓre, Jawmiraawo ɗowan nde.

²¹Taaskaniiɓe konu caka mooɗon fuu eero maayo Urdun dow ardaaŋgal Jawmiraawo, haa to o farti konne'en maako,

²²o nyaami lesdi boo. Nden on keɓan loraago, Jawmiraawo e Isra'iila'en pelataa on, lesdi ndi'i boo laatoto maral mooɗon.

²³Ammaa to on mbaɗaay ko mbi'ɗon, nden kam on mbaɗan hakke dow Jawmiraawo. Annde, o hiitoto hakke man.

²⁴Nyiɓe berniiji ngam ɓikkoy mon, mbaɗe baalɗe ngam baali e be'i mon boo. Mbaɗe ko mbi'ɗon.”

²⁵Yimɓe Ruben e Gada mbi'i Muusa: “Min mbaɗan ko umruɗa.

²⁶Ɓikkoy amin, rewɓe amin, baali e be'i e na'i amin njooɗoto haa ɗo nder berniiji lesdi Gile'at.

²⁷Ammaa minin taaskaniiɓe konu fuu, min eeroto maayo Urdun dow ardaaŋgal Jawmiraawo, min kaɓoya bana mbi'ɗa.”

²⁸Ngam maajum Muusa umri Eli'azaaru limanjo e Yosuwa ɓii Nuuna e baaba-ci'e'en nder le'i Isra'iila,

²⁹wi'i ɓe: “To yimɓe Ruben e Gada taaskanake haɓre, to ɓe eerodake maayo Urdun bee mooɗon dow ardaaŋgal Jawmiraawo, to ɓe mballi on nyaamugo lesdi ton, nden kam ndokke ɓe lesdi Gile'at, ɓe mara ndi.

³⁰Ammaa to ɓe eerodaaki maayo bee mooɗon, to ɓe mballaay on haɓugo, nden kam ɓe keɓan geɗal maɓɓe caka mooɗon nder lesdi Kanaana.”

³¹Yimɓe Ruben e Gada njaabi: “Min maccuɓe Jawmiraawo, min mbaɗan bana o umri min.

³²Min taaskanto haɓre, min eero maayo dow ardaaŋgal maako, min nasta lesdi Kanaana, haa min njogito maral amin haa fuunaaŋge Urdun.”

³³Muusa marni le'i Gada e Ruben e reeta lenyol Manassa ɓii Yusufu maral Sihon, laamiiɗo Amoori'en e maral Ook, laamiiɗo Baasan, berniiji fuu bee lesdi taariindi ɗi.

³⁴Yimɓe Gada nyiɓti berniiji Dibon e Atarot e Aro'er

³⁵e Atarot-Sofan e Ya'ajer e Yogbeha

³⁶e Bayti-Nimra e Bayti-Haram, berniiji cemmbiɗɗi e baalɗe ngam baali e na'i.

³⁷Yimɓe Ruben nyiɓti berniiji Hesbon e El'ale e Kiriyatayim

³⁸e Nebo e Ba'al-Me'on — ɓe cannji innde maagol — e Sibama. Ɓe ndokki berniiji nyiɓtaaɗi fuu inɗe kese.

³⁹Ɓiɓɓe Makir ɓii Manassa nasti lesdi Gile'at, nyaami ndi, ndiiwi Amoori'en wonɓe ton.

⁴⁰Muusa marni ɓiɓɓe Makir lesdi Gile'at, ɓe njooɗi ton.

⁴¹Ya'ir, goɗɗo lenyol Manassa, yehi nyaami gure goɗɗe, inndi ɗe Gure-Ya'ir.

⁴²Nobah boo yehi nyaami berniwol Kenat bee gure maagol, inndi ngol bee innde mum.