Read Fulfulded Limle 36 Bible Online

Limle 36 - Fulfulded bible

Limle 36

¹Baaba-ci'e'en[25] nder ci'e Gile'at ɓii Makir ɓii Manassa ɓii Yusufu ngari haa Muusa e ardiiɓe le'i Isra'iila,

²ɓe mbi'i: “Jawmiraawo umri ma a senndana Isra'iila'en lesdi maral muuɗum'en bee kur'u. O umri ma boo a hokka ɓiɓɓe Celofhad rewɓe geɗal baaba maɓɓe, banndiraawo amin.

³Kadi, to worɓe lenyol goɗŋgol nder Isra'iila te'i ɓe, nden kam maral maɓɓe laatanto lenyol man, maral amin ustoto.

⁴Nder hitaande dimɗineeki boo, saa'i maral coorraaŋgal fuu wartanta marɗo ɗum naane, ndonŋgu maɓɓe laatanto lenyol worɓe maɓɓe haa foroy, majjiran lenyol amin.”

⁵Muusa anndini Isra'iila'en ko Jawmiraawo umri ɗum. O wi'i: “Lenyol yimɓe Yusufu wi'i gooŋga.

⁶Ndaa ko Jawmiraawo umrani ɓiɓɓe Celofhad rewɓe: Ɓe te'an bee koo moy fottani ɓe, ammaa sey bee worɓe lenyol baaba maɓɓe tan.

⁷Maral koo moy Isra'iilaajo laatano lenyol maako, laatantaako lenyol feere. Bana non Isra'iila'en fuu njogorto maral lenyol muuɗum'en.

⁸Koo moy debbo donanɗo maral nder lenyol Isra'iila koo ngole, te'ra bee gorko lenyol mum. Bana non le'i Isra'iila'en njogorto ndonŋgu kaakiraaɓe muuɗum'en.

⁹Maral man laatantaako lenyol goɗŋgol, ammaa ngal tabitan nder lenyol gootol. Isra'iila'en fuu colanto maral muuɗum'en.”

¹⁰Ɓiɓɓe Celofhad rewɓe mbaɗi bana Jawmiraawo umruno Muusa.

¹¹Mahala, Tirsa, Hogila, Milka e No'a te'ri bee ɓiɓɓe wappanyɓe muuɗum'en.

¹²Ɓe te'aaɓe worɓe lenyol Manassa ɓii Yusufu. Bana non ndonŋgu maɓɓe luttani lenyol baaba maɓɓe.

¹³Kanjum woni umrooje e kiitaaji ɗi Jawmiraawo umri Isra'iila'en bee hunnduko Muusa, nder laɗɗe Mo'ab baŋnge Urdun, haa fuunaaŋge Yeriko.