Read Fulfulded Mika 3 Bible Online

Mika 3 - Fulfulded bible

Mika 3

¹Min Mika mi wi'i: Nane, onon mawɓe nder yimɓe Yaakubu, onon alkaali'en Isra'iila. Naa anndugo haala kiita ngooŋɗuka woni kuugal mooɗon na?

²Ammaa on ɗon nganya ko wooɗi, on ngiɗi ko halli. On ɗon itta laral e kusel dow i'e yimɓe ummaatoore am.

³On ɗon nyaama ɓe, on ɗon itta lare maɓɓe, on ɗon ngewa i'e maɓɓe, on ɗon njo'ina ɓe taƴe taƴe bana nyaancaaɗum nder sikaare, bana kusel nder fayannde.

⁴Nden on toroto Jawmiraawo, ammaa o jaabataako on. Nyalaade man o suuɗan on yeeso maako daliila kuuɗe mooɗon kalluɗe.

⁵Ndaa nii Jawmiraawo wi'i dow annabi'en majjinɓe ummaatoore muuɗum: “To on ngoodi ko on ƴakka, on ɗon ngooyna: Jam salaaman! Ammaa mo hokkaay on ko on ƴakka, on ɗon taasko honugo ɗum.

⁶Ngam man jemma waɗan, on keɓataa wahayuuji. Nyiɓre waɗan, on mbaɗataa hatti. Naaŋge mutan, nyalawma nyiɓɓan dow annabi'en ɓe'e.

⁷Yi'ooɓe toskoto, waɗooɓe hatti cemtan. Ɓe fuu ɓe cuddan geese maɓɓe, ngam Jawmiraawo jaabataako ɓe.”

⁸Ammaa min, Ruuhu Jawmiraawo hebbini yam baawɗe e gooŋgaaku e cuusal, haa mi anndina yimɓe Yaakubu tuurtol muuɗum'en, mi anndina Isra'iila'en hakke muuɗum'en.

⁹Sey on nana, onon mawɓe nder yimɓe Yaakubu, onon alkaali'en Isra'iila! On ɗon nganya kiita ngooŋɗuka, on ɗon lelna ko laati darnuɗum fuu.

¹⁰On ɗon nyiɓa Siyona bee rufugo ƴiiƴam, Urusaliima boo bee sooynde adilaaku.

¹¹Hiitooɓe Urusaliima ɗon njaɓa rusiya nder kiita. Liman'en ɗon njaŋngina ngam heɓugo ngeenaari. Annabi'en boo ɗon mbaɗa hatti ngam heɓugo ceede. Bee non fuu, ɓe ɗon tuugo dow Jawmiraawo, ɓe ɗon mbi'a: “Naa Jawmiraawo ɗon caka meeɗen? Sarru heɓataa en!”

¹²Ngam maajum, daliila mooɗon ɓe ndeman Siyona bana ngesa, Urusaliima laatoto bille, hooseere haa haykaliiru woni laatoto towndiire guuɓe.