Read Fulfulded Mika 5 Bible Online

Mika 5 - Fulfulded bible

Mika 5

¹Jawmiraawo wi'i: “An Baytilaama-Efrata, a wuro famaro caka ci'e Yahuuda. Ammaa haa maaɗa goɗɗo mo laamanto Isra'iila ngam am iwata, iwde maako diga ɓooyma, haa nyalɗe caaliiɗe.”

²Ngam man Jawmiraawo accan yimɓe muuɗum, haa to ɓesnanɗo ɓesni. Nden luttuɓe deerɗiraaɓe ɓiɗɗo oo ngartan haa yimɓe Isra'iila.

³Kaŋko o ummoto, o dura tokkere maako bee baawɗe Jawmiraawo, bee maŋngu innde Jawmiraawo Allah maako. Ɓe njooɗoto jam ngam laamu maako mawnan haa yotto keeri duniyaaru.

⁴Kaŋko bee hoore maako laatoto salaaman maɓɓe. To Assuura'en ngari lesdi meeɗen, to ɓe nasti cuuɗi laamorde meeɗen cemmbiɗɗi, en umminan ardiiɓe ɗuuɗɓe dow maɓɓe.

⁵Kamɓe ɓe nduran lesdi Assuura bee kaafahi e lesdi Nimrudu bee kaafahi losaaki. Bana non Jawmiraawo hisnirta en juuɗe Assuura'en, to ɓe nasti lesdi meeɗen, ɓe njaaɓi nder keeri meeɗen.

⁶Luttuɓe Yaakubu laatoto caka ummaatooje ɗuuɗɗe bana saawawre iwnde haa Jawmiraawo, bana waabiliire dow huɗo. Ɓe ɓaarortaako ballal ɓiɓɓe Aadama, ɓe tammataako koo ɗume haa yimɓe.

⁷Luttuɓe Yaakubu laatoto caka ummaatooje e caka jama'aaje ɗuuɗɗe bana mbarooga caka dabbaaji nder laynde, bana mbarooga cemmbiɗŋga caka tokke dammooji. To nga wari, nga yaaɓa e nga faɗɗa, walaa kisnanɗo ko nga naŋngi.

⁸Isra'iila'en, ɓaŋgte juuɗe mon dow konne'en mon, haa ɓe fuu ɓe kalka!

⁹Jawmiraawo wi'i: “Saa'i man mi nattinan pucci mon caka mooɗon, mi halkan mootaaji pucci mon.

¹⁰Mi yibbinan gure nder lesdi mon e berniiji mon cemmbiɗɗi fuu.

¹¹Mi nattinan hiilaaji ɗi mbaɗoton, waɗooɓe hatti boo ngonataa caka mooɗon fahin.

¹²Mi nattinan labbi mon cehaaɗi e daŋraŋge labbi mooɗon. On meetataa sujidango kuuje ɗe juuɗe mon mbaɗi.

¹³Mi ɗoofan daŋraŋge Asera mon caka mooɗon, mi halkan gure mon.

¹⁴Bee tikkere e ɓernuki mbaatortoomi ummaatooje ɗe ɗowtanaaki yam fuu.”