Read Fulfulded Nahum 1 Bible Online

Nahum 1 - Fulfulded bible

Nahum 1

¹Ɗo woni koŋngol dow Niniwe[1]. Deftere nde'e ɗon anndina ko Nahum Elkosiijo yi'i.

²Jawmiraawo o Allah kaajuɗo, o waatoto! Jawmiraawo waatoto, o keewɗo tikkere, o waatoto wanywanyɓe maako, o yejjitittaa aybe konne'en maako!

³Jawmiraawo o tikkataa law, ammaa semmbe maako ɗuuɗi, o accataa hiitaago aybuɗo sam! Laawol maako ɗon caka duluuru e naargewol, duule ngoni collaaje ɗe kosɗe maako umminta.

⁴O telɓanan mbeela e nga yooran, o ɓeeɓnan maaje fuu. Lesɗe Baasan e Karmel mbaatan, pinndi dow Libanon boo ɗaylan.

⁵Kooseeje ndiwnan daliila maako, towndiije ɓolwan. Lesdi dimmboto yeeso maako. Non boo duniyaaru e jooɗiiɓe nder maaru fuu.

⁶Moy dartoto yeeso ɓernuki maako? Moy waawata dartanaago tikkere maako saatunde? Ɓernuki maako ɗon waanjo bana yiite, tapaaje ceeki yeeso maako.

⁷Jawmiraawo o booɗɗo, o hisrude nder nyalaade ɓillaare. O ɗon hakkilana tawɓe hisrude haa maako.

⁸O hisnan ɓe e ilam mawɗam. Ammaa o nattinan nokkuure berniwol, o taasnan konne'en maako haa yotto nder nyiɓre.

⁹Ɗume nufoton dow Jawmiraawo? Kaŋko o nattinan on fuu. Walaa haaje sarru waɗa nde ɗiɗi.

¹⁰Koo to on laatake bana wumre gi'e naŋngindiranɗe, wuykiraaɓe njaramji muuɗum'en, on ngulan fuu bana huɗo yoorko.

¹¹An Niniwe, haa maaɗa goɗɗo mo nufi kalluɗum dow Jawmiraawo iwi, anniyaaji maako kalli masin.

¹²Ndaa nii Jawmiraawo ɗon wi'a: “Koo to ɓe ngardi ɓe fuu e no ɓe ɗuuɗɗiri fuu, ɓe kalkan, ɓe timman. Onon Yahuudu'en, mi toskini on, ammaa mi meetataa toskingo on.

¹³Jonta ngewanmi kaɓɓirgal maɓɓe, mi itta ngal dow daaɗe mooɗon, mi ta'an callalluuji mooɗon.”

¹⁴An Niniwe, ndaa ko Jawmiraawo umri dow maaɗa: “Yeeso ɗo, a heɓataa danygol tabitinanŋgol innde maaɗa fahin. Mi nattinan suura cehaaka e suura njamndi ɓolinaandi nder suudu ɗowanteeɓe maaɗa. Mi taaskitinan yenaande ma, ngam a laati huunde meere.”