Read Fulfulded Nahum 2 Bible Online

Nahum 2 - Fulfulded bible

Nahum 2

¹Ndaa gooynoowo habaru salaaman ɗon dow kooseeje, ɗon wara. An Yahuuda, waɗ juulɗe ma, hebbin togayeeje ma. Ngam kalluɗo meetataa saalaago caka mooɗon, o nattidi.

²An Niniwe, nattinoowo ɗon wara haɓugo bee maaɗa. Aynu suudu ma semmbiɗndu, aynu laabi ma, taada, semmbiɗiɗ booɗɗum!

³Ngam Jawmiraawo ɗon wartira maŋngu Yaakubu e ngu Isra'iila, koo nde hippooɓe mbili Isra'iila, nattini lice inabohi man.

⁴Bawarɗe[2] honooɓe nattinoowo go mbooji. Semmbiɗɓe maako ɗon ɓorni limce boɗeeje. O ɗon darna mootaaji maako bana jame yiite jaynanɗe, ɓe ɗon ndimmbina labbe maɓɓe.

⁵Mootaaji pucci ɗon caamna dow laabi, ɗon njaawa haa babe koo toy. Nanndu maaji bana jame yiite, koo toy ɗi jaawɗi bana ma'e.

⁶O ewnoto mawɓe honooɓe maako semmbiɗɓe, ammaa ɓe pergoto nder yahdu maɓɓe. Ɓe njaawan yahugo gal mahol berniwol, ɓe ndarni kuuje aynooje ton.

⁷Dammuɗe maaje ɗon maɓɓiti, laamorde ɗon yibba.

⁸Ɓe ngurtini debbo laamiiɗo, ɓe dahi mo. Horɓe maako[3] ɗon mboya bana pooli, ɓe ɗon piya biɓɓe maɓɓe.

⁹Ɓooyma berniwol Niniwe nanndino bee weendu heewndu ndiyamji. Ammaa ndaa yimɓe ɗon ndogga diga maagol! Ndare, ndare! Ammaa walaa mo yeesititto.

¹⁰Kooce cardi! Kooce kaŋŋeeri! Woodi ndesaaje ɗe timmataa sam e kuuje ɗuuɗɗe feere feere marɗe saman.

¹¹Koo ɗume fuu yaaɓaama e jaɓtaama e wonnaama koo toy! Ɓerɗe yimɓe ta'i, koppi maɓɓe ɗon ndiwno, keeci maɓɓe fuu ɗon tampi, geese maɓɓe fuu ɗon nyiɓɓi.

¹²Toy ɗowirde barooɗe e nokkuure haa ɓiɓɓe maaje nyaamata? To mbarooga dilli tefoygo nyaamdu, walaa mo ɓillata ɓiɓɓe maaga.

¹³Mbarooga faɗɗi, seeki kuuje ladde ngam mbarookoy maaga e ngam barooɗe maaga debbe, hebbini lowol mum bee keɓal, joonde mum boo bee kusel kuuje paɗɗaaɗe.

¹⁴Jawmiraawo honooɓe asama wi'i: “Mi ɗon monni ma. Mi wulan mootaaji pucci konu ma haa cuurɗe ummo. Kaafahi nyaaman mbarookoy maaɗa. Mi nattinan keɓal ma haa lesdi. Daaɗe nelaaɓe ma meetataa naneego.”