Read Fulfulded Sefaniya 1 Bible Online

Sefaniya 1 - Fulfulded bible

Sefaniya 1

¹Jawmiraawo wolwani Sefaniya ɓii Kusi ɓii Gedaliya ɓii Amariya ɓii Hezekiya, nder zamanu Yusiya ɓii Amon, laamiiɗo Yahuuda, wi'i:

²“Mi nattinan ko woni dow lesdi fuu.

³Mi nattinan yimɓe e dabbaaji, mi nattinan colli non boo liɗɗi nder maayo. Mi nattinan halluɓe e ko fergata ɓe, mi nattinan boo yimɓe dow lesdi.

⁴Mi fortan juŋngo am ngam honugo Yahuuda e jooɗiiɓe haa Urusaliima. Mi nattinan luttuɗum diina Ba'al haa nokkuure nde'e, mi halkan inɗe liman'en lawru ndu'u.

⁵Mi halkan wa'otooɓe dow soorowol ngam sujidango jayli asamanji e sujidanooɓe hunortooɓe ndego bee innde Jawmiraawo e ndego boo bee innde lawru Milkom.

⁶Mi halkan loriiɓe, accuɓe yam, ngam ɓe ngiɗaa ɗakkotirgo bee am, ɓe ngiɗaa sarwaago yam sam.”

⁷Cirwe yeeso Jawmiraawo Allah! Ngam nyalaade maako ɓaditake. O taaskitini kirseteeŋga, o seni ewnaaɓe maako.

⁸Jawmiraawo wi'i: “Nyalaade nde lii'otoomi kirseteeŋga, mi hiitoto saraaki'en e yerima'en e ɓorniiɓe limce jananne fuu.

⁹Nyalaade man kiitotoomi diwanɓe les dammugal[1], hebbinanɓe saare jaagorɗo muuɗum'en bee kuuje toonyaare e rikici.”

¹⁰Jawmiraawo wi'i: “Nyalaade man gookaali mbaɗan haa dammugal bi'eteeŋgal Dammugal Liɗɗi e bojji haa Fattude Hesre e haraka dow towndiije.

¹¹Mboye, onon jooɗiiɓe Fattude Leesnde ngam filooɓe majji, awnooɓe cardi nattidi.

¹²Saa'i man mbiɗitittoomi Urusaliima bee pittirlaaji, mi hiito mbaateendam'en hoolɗiniiɓe. Kamɓe ɓe ɗon mbi'a haa ɓerɗe maɓɓe: Jawmiraawo waɗataa ko wooɗi malla ko halli!

¹³Woɗɓe njaɓtan jawdi maɓɓe, mbilan cuuɗi maɓɓe. Nden ɓe nyiɓtoto cuuɗi, ammaa ɓe njooɗataako ton. Ɓe njuboto inabooje, ammaa ɓe njarataa inaboojam maaje.”

¹⁴Nyalaade Jawmiraawo mawnde ɓaditake, ɗon wara bee jaawɗum. To hoolo maare waɗi, koo annduɗo konu boo wookan.

¹⁵Nde laatoto nyalaade tikkere, nyalaade ɓillaare e bone, nyalaade bonnonda e bonnuki, nyalaade nyiɓre e nyiɓɓuki, nyalaade duule e nyiɓre ɓaleere kurum,

¹⁶nyalaade luwal konu e hoolo dow berniiji cemmbiɗɗi e kisruɗe towɗe.

¹⁷Jawmiraawo wi'i: “Mi hulnan yimɓe haa ɓe njaha bana wumɓe, ngam ɓe mbaɗi hakke dow am. Ƴiiƴam maɓɓe waanjete koo toy bana mbulwuldi, teteki maɓɓe boo bana mbuuwri.”

¹⁸Cardi maɓɓe e kaŋŋeeri maɓɓe kisnataa ɓe nyalaade nde tikkere Jawmiraawo waŋgata, nde yiite kaajal maako nyaamata duniyaaru. Ngam o timminan yimɓe lesdi, law o timminta ɓe. Ɗum laatoto kulniiɗum masin!