Read Fulfulded Sefaniya 2 Bible Online

Sefaniya 2 - Fulfulded bible

Sefaniya 2

¹Mooɓte, kawte, onon yimɓe ummaatoore nde walaa semteende,

²hiddeko on caŋkito, on majja bana nyaande[2], hiddeko tikkere Jawmiraawo saatunde ukkano on, hiddeko nyalaade tikkere maako wara dow mooɗon.

³Ɗakkotire bee Jawmiraawo, onon leesɓe nder lesdi, waɗanɓe muuyo maako! Ɗaɓɓite adilaaku! Ɗaɓɓite yaŋkinaare! Teema on kisan nyalaade nde tikkere Jawmiraawo waŋgata.

⁴Gaaza ferwan, Askalon laatoto ladde, konne'en ndiiwan yimɓe Asdod caka nyalawma, ɓe kalkan Ekuruun.

⁵Kayto! Bone laatanto on, onon Kereti'en jooɗiiɓe kommbi mbeela! Ndaa ko Jawmiraawo wolwi dow mooɗon: “An Kanaana, lesdi Filisti'en, mi halkete, walaa koo gooto luttata nder maaɗa!”

⁶Lesdi ma kommbi mbeela laatoto durduɗe, haa waynaaɓe ndurata, ndi heewan baalɗe ngam tokke dammooji.

⁷Luttuɓe Yahuuda maran lesdi man, ɓe nduran tokke maɓɓe ton, kiikiiɗe boo ɓe njooɗo nder cuuɗi Askalon. Ngam Jawmiraawo Allah maɓɓe hinnoto ɓe, wartiran joonde maɓɓe bana naane.

⁸Jawmiraawo honooɓe asama wi'i: “Mi nani jancoore Mo'ab e kuudi Ammooni'en, no ɓe njanciri yimɓe ummaatoore am, no ɓe mawnitori dow lesdi maɓɓe.

⁹Ngam maajum min Allah mo Isra'iila'en cujidanta ɗum wi'i: Fakat bana mi geeto lesdi Mo'ab laatoto bana Sodoma, lesdi Ammooni'en boo bana Gomorra. Lesɗe ɗe'e laatoto nokkuure gi'e e wasarde mannda, ladde yeewnde haa foroy. Yimɓe am luttanɓe njaɓtan ɓe, luttuɗum ummaatoore am martan mardi maɓɓe.”

¹⁰Ɗum waɗan daliila mawnitaare maɓɓe, ngam ɓe njanci yimɓe Jawmiraawo honooɓe asama, ɓe mawniti dow maɓɓe.

¹¹Jawmiraawo laatanto ɓe kulniiɗo, o halkan ɗowanteeɓe duniyaaru fuu. Jooɗiiɓe haa duuɗe cujidanan mo, koo moy haa nokkuure muuɗum.

¹²Onon Etiyopiya'en boo, kaafahi Jawmiraawo yuwan on!

¹³Jawmiraawo fortan juŋngo muuɗum gal woyla, o halkan Assuura, o wilan berniwol Niniwe, ngol laatoto ladde meere.

¹⁴Tokke mbaaloto ton, non boo dabbaaji ɗuuɗɗi feere feere. Lamnjatal e camnagel mbaaloto caka daŋraŋge maagol. Colli ciikan haa burɗe cuuɗi, baagaaje kaa'e tan ngonata haa nastirde, daŋraŋge leɗɗe cemmbiɗɗe ɗoofete.

¹⁵Bana non berniwol ceyiiŋgol koolɗiniiŋgol laatorto, ngol jooɗino jam, ngol wi'no: “Sey min, walaa berniwol potanŋgol bee am sam!” Ayye! Ngol laati ladde meere e waalorde kuuje ladde! Koo moy caalotooɗo haa maagol wemmboto, dimmban hoore mum.