Read Fulfulded Sefaniya 3 Bible Online

Sefaniya 3 - Fulfulded bible

Sefaniya 3

¹Bone laatanto berniwol tuurtoowol, coɓŋgol, toonyoowol yimɓe muuɗum!

²Ngol ɗowtaaki, ngol jaɓaay elto, ngol hoolaaki Jawmiraawo, ngol ɓaditaaki Allah.

³Saraaki'en caka maagol ɓe barooɗe ngurɓotooɗe, hiitooɓe maagol boo caafaali jaɓtanɗi saa'i kiikiiɗe, ɓe luttataa koo i'al gootal haa fajiri.

⁴Annabi'en maagol ɓe elewɓe, rikici'en, liman'en maagol boo ɗon coɓna ceniiɗum, ɗon luuta tawreeta.

⁵Ammaa Jawmiraawo o adiliijo caka maagol, o waɗataa kalluɗum. Nde weeti fuu, o ɗon ta'a kiita maako, o lelnataa ka sam. Ammaa kalluɗo walaa semteende!

⁶Jawmiraawo wi'i: “Mi nattini ummaatooje, mi wili kisruɗe maaje. Laabi maaje perwi, walaa caalotooɗo ton! Gure maaje natti, walaa jooɗiiɗo ton!

⁷Mi tammi: Jonta ngol hulatam sike, ngol jaɓan elto am. Nokkuure maagol wilatake! Nde mi hiiti yimɓe maagol fuu, ɓe tullitini kuuɗe maɓɓe.

⁸Ngam maajum ndeeneeɗam”, non Jawmiraawo wi'i. “Ndeene nyalaade nde ndarotoomi ngam wullaago on. Mi annini mooɓtugo ummaatooje e hawtugo laamuuji ngam mi waanja tikkere am dow maajum. Yiite kaajal am nyaaman duniyaaru fuu.”

⁹“Ɓaawo man ndokkanmi ummaatooje kunnduɗe laaɓɗe, haa yimɓe fuu ewno innde am, ɓe njaggano yam bee ɓernde woore.

¹⁰Diga gaɗa maaje Etiyopiya, sujidanooɓe yam saŋkitiiɓe ngaddantam dokke.

¹¹Nyalaade man on meetataa semtoraago tuurtol mon dow am. Nder wakkati man nden ittanmi jurotooɓe mawnitiiɓe caka mooɗon, on meetataa mawnitaago dow hooseere am seniinde.

¹²Mi luttanan hoore am ummaatoore ne'iinde laafunde caka mooɗon. Nde hisran bee innde Jawmiraawo.

¹³Luttuɓe Isra'iila mbaɗataa kalluɗum, ɓe mbolwataa fewre, walaa bolle cargooje nder kunnduɗe maɓɓe. Bana tokkere ɓe ndurata, ɓe mbaaloto, walaa kulnanɗo ɓe.”

¹⁴Sey on ngima, on mbelmbelta, onon yimɓe Isra'iila! An Urusaliima, seya, yimu bee ɓernde ma fuu!

¹⁵Jawmiraawo itti kiita dow maaɗa, riiwi konne'en ma. Jawmiraawo, laamiiɗo Isra'iila, ɗon wondi bee maaɗa. Sarru hulnataa ma fahin.

¹⁶Saa'i man Urusaliima nanan habaru ni'i: “Taa hul, Siyona, taa juuɗe ma tampa!

¹⁷Jawmiraawo Allah maaɗa ɗon wondi bee maaɗa, o cemmbiɗɗo, kisnoowo. O seyorto ma bee welwelo, o hesɗitinte bee yiide, o welweltan ngam maaɗa bee gookaali seyo bana nder nyannde juulde.”

¹⁸Jawmiraawo wi'i: “Mi ittanan on sarru, ngam taa toskaare maagu teddana on.

¹⁹Ndaa, saa'i man kalkanmi ɓillooɓe on fuu. Mi wallan woosɓe, mi mooɓtan saŋkitiiɓe. Haa ɓe toski fuu, ton ndokkanmi ɓe tedduŋgal e daraja.

²⁰Saa'i man ngartiranmi on, mooɓtanmi on. Mi hokkan on tedduŋgal e daraja caka ummaatooje duniyaaru fuu, ngam mi wartiran joonde mooɗon bana naane, onon on ngi'an ɗum.” Non Jawmiraawo wi'i.