Read Fulfulded Zekariya 11 Bible Online

Zekariya 11 - Fulfulded bible

Zekariya 11

¹An Libanon, maɓɓitit dammuɗe maaɗa, haa yiite nyaama leɗɗe ma cemmbiɗɗe[13].

²Uuma, an lekki booɗki! Ngam leɗɗe cemmbiɗɗe ndo'ake, leɗɗe mawɗe ɗe'e nattidi! Mboye, onon leɗɗe mawɗe haa Baasan! Ngam laynde sukkunde nde goɗɗo waawataano nastugo nder maare fe'idaama!

³Nane, waynaaɓe ɗon mboya, ngam durdude maɓɓe woonde halkaama. Barooɗe cemmbiɗɗe ɗon ubbo, ngam guuɓe cukkuɗe haa maayo Urdun mbonnaama.

⁴Jawmiraawo Allah am wi'i yam: “Waynu baali taaskitinaaɗi ngam hirseego!

⁵Soodooɓe ɗi ɗon kirsa ɗi, ɓe ndaarataa ɗum bana aybe. Soorrooɓe ɗi ɗon mbi'a: Useko Jawmiraawo, ndaa min ndiski! Koo waynaaɓe maaji boo ngalaa enɗam ngam maaji.”

⁶Jawmiraawo wi'i: “Mi enɗataa jooɗiiɓe nder lesdi! Mi hokkan koo moy haa juŋngo keeddiɗɗum e juŋngo laamiiɗo mum. Kamɓe ɓe mbonnan lesdi, min boo mi hisnataa koo moye diga juuɗe maɓɓe.”

⁷Mi duri baali ɗi soorrooɓe taaskitini ngam hirseego. Mi hoo'i cabbi ɗiɗi. Wooru maaji, mi ewni ndu: Mbooɗeeŋga, nduya boo: Kawtal. Nden mi tokki durugo tokkere.

⁸Mi riiwi waynaaɓe tato nder lewru wooru. Nden mi fuɗɗi wanyugo baali, kanji boo ɗi cafti yam.

⁹Nden kadi mi wi'i ɗi: “Mi durataa on fahin! Mbaatanɗi, mbaata! Majjanɗi, majja. Luttanɗi boo nyaamindira hakkunde maaji.”

¹⁰Mi hoo'i sawru am: Mbooɗeeŋga go, mi yewi ndu. Bana non piistumi alkawal ngal Jawmiraawo haɓɓuno bee ummaatooje fuu.

¹¹Ngal fiistaama nyalaade man. Soorrooɓe baali hakkilananɓe yam go annditi ɗum wolde Jawmiraawo.

¹²Nden kadi mi wi'i ɓe: “To ɗum fottani on, ndokkeeɗam ngeenaari am. To naa non boo, acce.” Ɓe ndokki yam ngeenaari am, ceede cardi cappanɗe tati.

¹³Ɓe poondi yam mi ke'anɗo ngeenaari mboondi! Jawmiraawo wi'i yam: “Sakkinan ɗum ɓolinoowo.” Mi hoo'i ceede cardi cappanɗe tati go, mi sakkinani ɗe ɓolinoowo nder suudu Jawmiraawo.

¹⁴Nden mi yewi sawru am ɗiɗawru wi'eteendu kawtal go. Bana non piistumi deerɗiraagu hakkunde Yahuuda e Isra'iila.

¹⁵Jawmiraawo wi'i yam: “Hoo'u fahin kuuje kuugal gaynaako paataaɗo.

¹⁶Ndaa, mi neloyan gaynaako goɗɗo haa lesdi. O suklantaako baali majjuɗi, o ɗaɓɓitittaa eerɗi, o hurgataa nyawɗi, o nyaamnataa jami. Ammaa o nyaaman kusel baali ɓurɗi fayugo, o seekan koloŋgi maaji.

¹⁷Bone laatano gaynaako meereejo gudinanɗo tokkere! Kaafahi wara dow juŋngo maako e dow yiitere maako nyaamre! Juŋngo maako waata! Yiitere maako nyaamre wuma!”