Read Fulfulded Zekariya 4 Bible Online

Zekariya 4 - Fulfulded bible

Zekariya 4

¹Malaa'ikaajo bolidannooɗo bee am lorti haa am, findini yam bana goɗɗo findinirte e ɗoyŋgol mum.

²O ƴami yam: “Ɗume ngi'ata?” Mi jaabi: “Mi ɗon yi'a jo'inirɗum pittirlaaji, ɗum fuu man ɗum kaŋŋeeri, bee taasawo dow maajum. Haa dow taasawo boo woodi pittirlaaji joweeɗiɗi. Pittirla koo kaye fuu woodi kuɓɓirɗe joweeɗiɗi.

³Woodi boo jaytunje ɗiɗi baŋnge taasawo. Jaytunhi gooti haa wakeere nyaamre, gooti boo haa wakeere nannde”

⁴Mi ƴami malaa'ikaajo bolwananɗo yam go: “Barkaama, ɗume jaytunje ɗe'e anndinta?”

⁵O jaabi yam: “A anndaa ko ɗum yiɗi anndingo na?” Mi wi'i: “Mi anndaa, naywa.”

⁶Malaa'ikaajo wi'i yam: “Ndaa wolde Jawmiraawo ngam Zorobaabila: A hiɓɓintaa kaliifaaku maaɗa bee cuusal malla bee semmbe maaɗa, ammaa sey bee Ruuhu am tan! Non Jawmiraawo honooɓe asama wi'i.

⁷An hooseere mawnde, a ɗume? A laatoto waadiwol yeeso Zorobaabila. O wurtinan hayre talkumoore diga maaɗa. Yimɓe koolan: Kay, nde wooɗi! Kay, nde wooɗi!”

⁸Jawmiraawo wolwani yam fahin, o wi'i:

⁹“Juuɗe Zorobaabila mballini caɓɓawal haykaliiru. Kanje lamsinta ndu boo.” Non annditirton Jawmiraawo honooɓe asama neli yam haa mooɗon.

¹⁰“Mo yawi fuɗɗoode kuuje pamare, seyorto yi'ugo hayre timminirde suudu haa juuɗe Zorobaabila.” Malaa'ikaajo wi'i yam: “Pittirlaaji joweeɗiɗi go ngoni gite Jawmiraawo daaranɗe duniyaaru fuu.”

¹¹Nden mi ƴami malaa'ikaajo: “Jaytunje ɗiɗi haa nyaamre e nannde jo'inirɗum pittirlaaji, ɗum ɗume?”

¹²Fahin ƴammoomi: “Ɗume lice jaytunje ɗiɗi baŋnge ilnirɗe ɗe kaŋŋeeri ilnooje nebbam sayeejam anndinta?”

¹³O wi'i yam: “A anndaa ko ɗum yiɗi anndingo na?” Mi jaabi: “Mi anndaa, barkaama.”

¹⁴Nden o wi'i yam kadi: “Kanje ngoni yimɓe ɗiɗo, moytaaɓe hoore bee nebbam ngam huuwango Jawmu duniyaaru fuu.”