Read Fulfulded Zekariya 6 Bible Online

Zekariya 6 - Fulfulded bible

Zekariya 6

¹Mi tijji fahin, mi yi'i mootaaji pucci nayi. Ɗi ngurti hakkunde kooseeje ɗiɗi ɗe njamndi mboɗeeri.

²Pucci boɗeeji ɗon kaɓɓindiri haa moota arana, haa ɗiɗaɓa boo ɓaleeji.

³Haa tataɓa ɗum pucci daneeji, haa nayaɓa boo ɗum pucci biidiiji.

⁴Mi ƴami malaa'ikaajo bolidanɗo bee am: “Ɗume kanji boo ɗi anndinta, barkaama?”

⁵O jaabi ƴam: “Ɗum keni asama nayi. Ɗi ɗonno ndari yeeso Jawmu duniyaaru fuu. Jonta kam ɗi ɗon ndilla.”

⁶Pucci ɓaleeji kaɓɓindiraaɗi haa moota go ndilli gal lesdi woyla. Daneeji tokki ɗi ɓaawo, ndilli gal hiirnaaŋge, nden biidiiji ndilli gal Lesdi Fombina.

⁷Pucci boɗeeji[7] ɓaditi, ngiɗi dillugo taaroyaago duniyaaru. Nden Jawmiraawo wi'i: “Ndille, taaroye duniyaaru!” Ɗi ndilli.

⁸Nden o ewni yam, o wi'i: “Laar, dilluɗi lesdi woylaari njippinan Ruuhu am[8] dow maari.”

⁹Jawmiraawo wolwani yam wi'i:

¹⁰“Jaɓ dokke haa juuɗe Helday e Tobiya e Yada'ya, ɗe dahaaɓe iwɓe diga Baabila ngaddi. An bee hoore maaɗa nastu hannde nden haa saare Yosiya ɓii Sefaniya.

¹¹Hoo'u cardi e kaŋŋeeri, waɗ meetaleewol bee maaji. Meetu ngol dow hoore Yosuwa ɓii Yocadak, hooreejo liman'en.

¹²Nden wi' mo: Ndaa nii Jawmiraawo honooɓe asama wi'i: Woodi goɗɗo mo innde muuɗum Fuɗŋgo haa ɗo. O fuɗan haa nokkuure nde o daroto, o nyiɓan haykaliiru Jawmiraawo.

¹³Kaŋko nyiɓata haykaliiru Jawmiraawo. O ɓornoto tedduŋgal. O jooɗoto dow leeso laamu maako ngam o laamo. Limanjo goɗɗo wonan haa nyaamo maako. Narral timmuŋgal laatoto hakkunde maɓɓe[9].

¹⁴Ammaa fawnere go walline nder haykaliiru Jawmiraawo, ngam ciftinorki Helday e Tobiya e Yeda'ya e ngam ciftinorki mbooɗeeŋga Yosiya ɓii Sefaniya.”

¹⁵Yimɓe ngaran diga daayiiɗum, ɓe nyiɓto haykaliiru Jawmiraawo. Non annditirton Jawmiraawo honooɓe asama neli yam haa mooɗon. Ɗum laatoto to on ɗowtanake wolde Jawmiraawo bee gooŋga.