Read Fulfulded Zekariya 7 Bible Online

Zekariya 7 - Fulfulded bible

Zekariya 7

¹Nder nduuɓu laamiiɗo Dariyus nayaɓu, nyalaade nayaɓre nder lewru joweenayaɓru wi'eteendu Kislew, Jawmiraawo wolwani Zekariya.

²Saa'i man yimɓe Baytila nelno Sareser e Regem-Melek bee yimɓe woɗɓe ngam ɓe toro Jawmiraawo,

³ɓe ƴama liman'en huuwanɓe nder haykaliiru Jawmiraawo honooɓe asama e annabi'en: “Min tokko woyugo e suumaago nder lewru jowaɓru bana min ɗonno mbaɗa duuɓi ɗuuɗɗi na?”

⁴Jawmiraawo honooɓe asama wolwani yam, wi'i:

⁵“Yeccu yimɓe lesdi e liman'en fuu: Saa'i on cuumi, on mboyi nder lewru jowaɓru e nder lewru joweeɗiɗaɓru, duuɓi cappanɗe joweeɗiɗi, bee gooŋga cuumɗon ngam am na?

⁶Nde on nyaami, on njari, on nyaamaay e on njaraay ngam mooɗon na?”

⁷Bolle ɗe'e Jawmiraawo wi'no bee kunnduɗe annabi'en ɓooyma boo. Saa'i maajum yimɓe ɗonno njooɗi haa Urusaliima, ɗonno koolɗini, non boo haa gure maagol taariiɗe ngol e Lesdi Fombina e towndiije hiirnaaŋge fuu.

⁸Jawmiraawo wolwani Zekariya ni'i:

⁹Ndaa nii Jawmiraawo honooɓe asama wi'i: “Mbaɗe kiita ngooŋɗuka, mboonindire, enɗindire hakkunde mooɗon.

¹⁰Taa toonye atiime'en e rewɓe yurumɓe e hoɗɓe e talaka'en. Taa koo moy nufano goɗɗo kalluɗum.”

¹¹Ammaa yimɓe cali nanugo. Ɓe ngayliti ɓaawo, ɓe cukki noppi maɓɓe ngam taa ɓe nana.

¹²Ɓe caatini ɓerɗe maɓɓe bana hayre saatunde, ngam taa ɓe nana tawreeta e bolle, ɗum ko Ruuhu Jawmiraawo honooɓe asama umrani ɓe bee kunnduɗe annabi'en ɓooyma. Kanjum waɗi tikkere Jawmiraawo honooɓe asama saati masin.

¹³Ngam maajum Jawmiraawo mo asama wi'i: “Mi ewni ɓe, ammaa ɓe nanaay. Nden kamɓe ɓe ewni yam, ammaa min mi nanaay.

¹⁴Mi saŋkiti ɓe caka ummaatooje koo ɗeye fuu ɗe ɓe anndaano. Lesdi wilaama ɓaawo dilluki maɓɓe, walaa caalotooɗo ton. Ɓe ngartiri lesdi mboondi go ladde meere.”