Read Fulfulded Zekariya 9 Bible Online

Zekariya 9 - Fulfulded bible

Zekariya 9

¹Ɗo woni koŋngol Jawmiraawo. Jawmiraawo wolwi dow lesdi Hadarak, berniwol Damas boo woni jipporde wolde man. Jawmiraawo mari gure Siriya[10] bana o mardiri le'i Isra'iila fuu.

²O ɗon wolwa dow Hamat, kommbi Damas, non boo dow Tirus e Sidon, berniiji marɗi hikma.

³Tirus mahi mahol paddirgol. Ngol mooɓti cardi bana mbulwuldi e kaŋŋeeri laaɓndi boo bana loope dow laawol.

⁴Ammaa Jawmiraawo hoo'an ngol, o yibbinan mahol paddirgol maagol nder mbeela, yiite nyaaman ngol.

⁵To berniwol Askalon yi'i ɗum, ngol hultoran, Gaaza diwtoran masin ngam kulol. Non boo Ekuruun, ngam ngol sooyan tammunde ballal. Laamiiɗo wonataa haa Gaaza, walaa goɗɗo jooɗoto haa Askalon.

⁶Njaalu'en njooɗoto haa Asdod. Jawmiraawo wi'i: “Mi nattinan mawnitaare Filisti'en.

⁷Mi wiftan diga kunnduɗe maɓɓe kusel marŋgel ƴiiƴam e diga caka nyii'e maɓɓe boo coɓŋgel lii'anaaŋgel labbi. Kamɓe boo ɓe laatoto luttuɓe ɓe Allah meeɗen, ɓe laatoto bana yeɓre lenyol gonŋgol nder Yahuuda. Jooɗiiɓe Ekuruun boo nastan caka yimɓe am bana Yebusi'en mbaɗno.

⁸Min bee hoore am mi saŋnginan nder lesdi am ngam aynugo ndi. Mi faddan ndi ngam konne'en saalotooɓe. Walaa jananno koo gooto meetataa wargo haa yarna ummaatoore am bone, ngam jonta mi ɗon hakkilana nde.”

⁹An berniwol Siyona, yimu bee seyo! An Urusaliima, welwelta! Ndaa, laamiiɗo maaɗa ɗon wara haa ma. O adiliijo, o jaaliiɗo. O jaŋkiniiɗo, ba'iiɗo wamnde, waato wamnde molde.

¹⁰O nattinan mootaaji pucci konu nder Efrayim, non boo pucci konu nder Urusaliima. O yewan lagaaje konu fuu. O tabitinan salaaman caka ummaatooje. Laamu maako yaajan diga mbeela nga'a haa ngaya, diga maayo Efratis haa keeri duniyaaru.

¹¹Jawmiraawo wi'i: “Ngam daliila alkawal am bee mooɗon, tabitinaaŋgal bee ƴiiƴam ndufaaɗam, mi yooftan haɓɓaaɓe mooɗon diga ngaska ka walaa ndiyam.

¹²Onon haɓɓaaɓe heewɓe tammunde, ngarte haa berniwol cemmbiɗŋgol. Mi ɗon anndina on ɗum hanndeere nde'e: Mi warjoto on mbooɗeeŋga cowi ɗiɗi dow boneeji ɗi njarɗon.

¹³Mi wartiran lesdi Yahuuda bana lagaawal konu, Efrayim boo laatoto kurol. An Siyona, mi umminan ɓikkoy maaɗa ngam haa koy kippoya Yunaniŋke'en, mi laatinte bana kaafahi haa juŋngo cemmbiɗɗo.”

¹⁴Nden Jawmiraawo waŋgan dow maɓɓe. Kurol maako ɗelkan bana ma'ere. Allah Jawmiraawo fuufan luwal konu, o yahan nder keni caatuɗi iwɗi fombina.

¹⁵Jawmiraawo honooɓe asama aynan yimɓe mum. Ɓe kalkan konne'en, ɓe campitan kaa'e piɗaaɗe diga piwli, ɓe naman ɗe. Ɓe ndufan ƴiiƴam konne'en maɓɓe bana inaboojam. Ɓe ilnan ɗam bana ɗam kirsaaɗi nder taasaaje dufirɗe ƴiiƴam malla bana ƴiiƴam ndufaaɗam dow coɓɓuli hirsirde.

¹⁶Nyalaade maajum Allah Jawmiraawo hisnan ummaatoore mum bana gaynaako hisnirta tokkere baali mum. Bana kaa'e ɗuuɗa-samanje haa meetaleewol laamiiɗo, non ɓe njaynirta haa lesdi maako.

¹⁷Ɓe ceyoto, ɓe laatoto ŋarniiɓe! Alkamaari semmbiɗinan sukaaɓe, inaboojam kesam boo faanyɓe.