Read Fulfulded 1 Makabe 1 Bible Online

1 Makabe 1 - Fulfulded bible

1 Makabe 1

¹Zuulgarnayni ɓii laamiiɗo Filip ummi diga wuro mum Makedoniya, dilli ngam waɗgo konu. Non o jaalori Dariyus, laamiiɗo Persiya'en e Mediya'en. O jaɓti mo tawon laamu ngu o mari dow Yunaniŋke'en.

²O waɗi kaɓe ɗuuɗɗe, o nyaami gure cemmbiɗɗe e o mbari laamiiɓe gure man.

³Konu man yahri mo haa keerol duniyaaru e o jaɓti jawle ummaatooje ɗuuɗɗe. Nde lesdi heɓi jam nder laamu maako, o warti o mawnitiiɗo e o ŋallomaajo boo.

⁴Nde o mooɓti sooje'en ɗuuɗɓe e semmbiɗɓe, o leesni gure, lesɗe e laamiiɓe o dooli ɓe yoɓango mo garaama.

⁵Ɓaawoɗon, o nyawi e o faami o maayan.

⁶Nden kadi, o ewni mawɓe ardiiɓe sooje'en, saraaki'en tedduɓe mawnididɓe bee maako diga nderkaaku, o senndani ɓe lesdi maako caka maɓɓe hiddeko o maaya.

⁷Zuulgarnayni maayi ɓaawo laamaago duuɓi sappo e ɗiɗi.

⁸Mawɓe ardiiɓe sooje'en maako laami koo moy haa taƴre lesdi nde ɓe ta'ani ɗum.

⁹Ɓe fuu ɓe ndokki ko'e maɓɓe innde laamiiɗo. Ruutu maɓɓe waɗi bana non duuɓi ɗuuɗɗi, ɗum nastini duniyaaru fuu nder bone.

¹⁰Leggal marŋgal dajje fuɗi caka ɓiɓɓe maɓɓe: Kaŋgal wi'ete Antiyokus Epifan ɓii laamiiɗo Antiyokus. Ɓaawo naŋngeeki maako haa lesdi Roma, o laati laamiiɗo haa lesdi Siriya nder hitaande 137.

¹¹Yaake man, udumre halluɓe waŋgi haa Isra'iila. Ɓe keɓi no ɓe cargira yimɓe ɗuuɗɓe bee wi'go: “Ndillen, narren bee ummaatooje heefeerɓe taariiɗe en. Masiibooji ɗuuɗɗi kippi en diga en cali yeeɗgo bana maɓɓe.”

¹²Yimɓe boo ngiɗi nango irin haalaaji bana ni'i.

¹³Yimɓe seɗɗa caka jama'aare njaawi yahgo haa laamiiɗo: O hokki ɓe duŋayeere tokkaago al'aadaaji yimɓe man.

¹⁴Nden ɓe nyiɓi babal fijirde haa Urusaliima fodde al'aada heefeerɓe;

¹⁵Ɓe cuuɗi hollugo ɓe juulniiɓe, ɓe acci alkawal ceniiŋgal, ɓe tokki heefeerɓe. Ɓe ceyori waɗgo kalluɗum.

¹⁶Nde Antiyokus annditi lesdi maako semmbiɗi, o nufi jaalaago Misra haa o warta laamiiɗo lesɗe man ɗiɗi fuu.

¹⁷O dilli Misra bee mooɓre sooje'en ɗuuɗɓe e semmbiɗɓe, mootaaji haɓre, nyiibi e koommbooje ɗuuɗɗe.

¹⁸O hippi Potolome, laamiiɗo Misra, laamiiɗo oo lusini, doggi. Sooje'en ɗuuɗɓe mbaraama.

¹⁹Antiyokus jaɓti gure cemmbiɗinaaɗe e o luuwi ɗe.

²⁰Ɓaawo jaalaago Misra nder hitaande 143, Antiyokus lorti ɓaawo, tiiti Isra'iila haa o yotti Urusaliima bee mooɓre sooje'en maako semmbiɗnde.

²¹O nasti nder haykaliiru bee mawnitaare. O ɗoofi hirsirde kaŋŋeeri, jo'inirɗum pittirlaaji e ko woni dow fuu,

²²taabal tamseeje dokkaaɗe Allah, paalon ngam sadaka njaram inaboojam, taasahon ngam wiccugo ndiyam, njardukoy kaŋŋeeri, laabuleeji, kifineeje jamɗe, o itti ko woni pawne kaŋŋeeri haa mahol haykaliiru.

²³O hooci ceede boo, kaŋŋeeri e ko mari saman fuu. O heɓti ndesaari cigaandi fuu e o ɓofti ɗum fuu.

²⁴Nde o hoocidi ɗum fuu, o huuci lesdi maako. O rufi ƴiiƴam yoŋkiiji ɗuuɗɗi e o wolwi boliiɗe mawnitiiɗe.

²⁵Haa gure lesdi fuu, ɓe njurmini ngam masiibo kippuŋgo Isra'iila.

²⁶Ardiiɓe e ndotti'en uumi, ɓiɓɓe worɓe e rewɓe ɗon njooɗi ngalaa baawɗe, rewɓe ngalaa ŋarol fahin.

²⁷Ɓaŋgɓe hesɓe kawti nder suno man. Nder cuuɗi maɓɓe ɓaŋgaaɓe ɗon nder mettamɓeram.

²⁸Daliila masiibooji ukkooɗi dow yimɓe Isra'iila, lesdi dimmbi, yimɓe wuro fuu keewi semteende.

²⁹Duuɓi ɗiɗi ɓaawoɗon, laamiiɗo neli haa gure Yahudiya fuu, wakiiliijo maako cuklaniiɗo mooɓtugo garaama: O yehi haa Urusaliima bee mooɓre sooje'en.

³⁰O wolwi boliiɗe ɗe jam nder faasikaare, yimɓe wuro fuu kooli mo. Nden o yerɓi sooje'en kippo wuro, o ukki dow maago bee caatal. O mbari Isra'iila'en ɗuuɗɓe.

³¹O luuwi wuro, o huɓɓi yiite haa calaaje e haa mahi.

³²Sooje'en ndahi rewɓe e ɓikkoy maɓɓe, ɓe cenndi dabbaaji boo.

³³Ɓe mbo'itini wuro Daawuda, ɓe taarni ngo bee mahol towŋgol e caatuŋgol, ɓe ngaɗi soorowol cemmbiɗŋgol.

³⁴Ɓe njo'ini yimɓe halluɓe, buuɗaaje ton, nden ɓe cuuɗi sera.

³⁵Ɓe cigi balmi e nyaamduuji, ɓe mooɓti jawle ɗe ɓe keɓi haa Urusaliima e ɓe kulni Isra'iila.

³⁶Ɗum masiibo dow haykaliiru e ɗum barriya caatuka dow Isra'iila ngam foroy.

³⁷Ɓe ndufi ƴiiƴam yimɓe ɓe ngalaa aybe haa les babal ceniiŋgal, non ɓe coɓniri ngal.

³⁸Ɓe ndooli yimɓe Urusaliima ndogga wuro man, wuro man warti beerle hoɗɓe. Yimɓe maago ngarti hoɗɓe nder maago, cafti eggi ngo.

³⁹Haykaliiru maago sampitaama haa warti harde. Nyalɗe juulde wuro man ngarti nyalɗe suno e bojji, nyalɗe ciwtorɗe ngarti jalnoore e tedduŋgal maago warti yawaare.

⁴⁰Bana tedduŋgal maago mawnino non toskaare maago jonta boo, maŋngu maago warti suno.

⁴¹Nden laamiiɗo Antiyokus winndi, umri haa yimɓe wuro maako fuu, ɓe kawta, ɓe laato jama'aare woore

⁴²e ɓe acca al'aadaaji maɓɓe. Heefeerɓe tokki umroore laamiiɗo man

⁴³e ɗuuɗɓe nder Isra'iila'en ceyori nastugo diina maako. Ɓe lii'ani kirseteeɗi maɓɓe haa labbi e ɓe acci samɗingo nyalaade siwtorde.

⁴⁴Fahin, laamiiɗo neli nelaaɓe mum njahra bataakeeji haa Urusaliima e gure Yahudiya. O umri ɓe tokko yeeso kam al'aadaaji jananni haa lesdi maɓɓe.

⁴⁵O haɗi Yahuudu'en lii'aago guleteeɗi malla goɗɗi malla dokke kuroori malla inaboojam nder haykaliiru. O dooli ɓe taa ɓe kakkilana nyalaade siwtorde malla nyalɗe juulɗe

⁴⁶e ɓe coɓna haykaliiru non boo kuuje ceniiɗe.

⁴⁷Fahin, sey Yahuudu'en nyiɓana labbi kirsirɗe, cuuɗi ngam waɗgo do'a e cuuɗi labbi, sey ɓe lii'a dokke gaduuji e dabbaaji coɓɗi.

⁴⁸Ɓe potaay juulnugo ɓikkoy maɓɓe. Sey ɓe coɓna ko'e maɓɓe bee ko nyiddi fuu.

⁴⁹Sey ɓe ngejjita Tawreeta Muusa e ɓe cannja al'aadaaji maɓɓe fuu.

⁵⁰Caliiɗo umrooje laamiiɗo fuu hiitete kiita mbareeki.

⁵¹Laamiiɗo winndi, hokki umrooje mum haa yimɓe laamu mum fuu, o suɓi wakiili'en ngam aynugo jama'aare Yahuudu'en. O umri boo ɓe lii'ana labbi kirseteeɗi haa gure Yahudiya fuu.

⁵²Ɗuuɗɓe caka Yahuudu'en acci Tawreeta Muusa, ɓe kawtani wakiili'en laamiiɗo, ɓe ngaɗi bononnda ɗuuɗŋga nder lesdi

⁵³haa ɓe ndooli Isra'iila'en hoolaaɓe, ɓe cuuɗo haa ɓe keɓata suuɗgo fuu.

⁵⁴Nyannde sappo e jowaɓre nder lewru Kislew nder hitaande 145, laamiiɗo nyiɓi dow hayre hirsirde nde haykaliiru Kuuŋga coɓŋga e ɓe nyiɓi kirsirɗe haa gure Yahudiya fuu.

⁵⁵Ɓe ɗon ngula uurle yeeso dammuɗe calaaje e haa babe.

⁵⁶Ɓe ceeki defte Tawreeta ɗe ɓe tawi fuu, ɓe cakkini ɗe nder yiite.

⁵⁷Fodde umroore laamiiɗo, to ɓe tawi goɗɗo mari deftere seniinde malla ɗon tokki Tawreeta Muusa fuu, o mbare.

⁵⁸Lewru fuu, yimɓe laamiiɗo marno baawɗe waɗgo Isra'iila'en hoolaaɓe ko ɓe ngiɗi fuu.

⁵⁹Nyannde noogas e jowaɓre lewru fuu, ɓe ɗon lii'ana labbi kirseteeɗi dow hirsirde haykaliiru.

⁶⁰Ɓe ɗon mbara boo fodde umroore laamiiɗo, rewɓe juulnuɓe ɓikkoy mum'en,

⁶¹ɓe ɗon mbarda ɓe bee ɓikkoy maɓɓe ɓilakoy dow daaɗe maɓɓe, ɓe ɗon mbara asŋgol maɓɓe fuu e ɓen juulnuɓe boo.

⁶²Ammaa ɗuuɗɓe nder yimɓe Isra'iila keɓi cuusal salaago nyaamgo nyaamduuji coɓɗi.

⁶³Ɓe ngeli maayugo dow nyaamgo nyaamdu soɓndu e yewgo alkawal ceniiŋgal. Nden, ɓe mbari ɓe.

⁶⁴Tikkere Allah saatunde ɗonno dow Isra'iila.