Read Fulfulded 1 Makabe 10 Bible Online

1 Makabe 10 - Fulfulded bible

1 Makabe 10

¹Nder hitaande 160, Aleksandire Epifan ɓii Antiyokus nayaɓo yehi berniwol Potolemayis, nyaami ngol. O waɗi hoore maako laamiiɗo maɓɓe.

²Nde laamiiɗo Demetiriyus nani habaru man, o mooɓti mooɓe sooje'en ɗuuɗɓe, o dilli honoygo Aleksandire.

³Wakkati man nden Demetiriyus neli haa Yonatan bataakewol jam. nder maagol o tammini mo daraja ɗuuɗka.

⁴O ɗon wi'a hoore maako: “Njaawen ngaɗen sulhu bee Yonatan, hiddeko o narroya bee Aleksandire ngam hongo yam.

⁵Ngam o waawan siftorgo aybeeji ɗi min ngaɗani mo kaŋko e deerɗiiko'en e ummaatoore maako.”

⁶Demetiriyus duŋani Yonatan mooɓtugo sooje'en e tappugo balmi ngam o hawtano mo. O umri boo ɓe ndokkita mo Isra'iila'en maɓɓaaɓe haa suudu Urusaliima semmbiɗndu.

⁷Nden Yonatan dilli haa Urusaliima, o jaŋngi bataakewol laamiiɗo haa yeeso jama'aare e sooje'en wonɓe haa suudu semmbiɗndu.

⁸Ɓe keewi kulol nde ɓe nani laamiiɗo hokki Yonatan duŋayeere mooɓtugo sooje'en.

⁹Sooje'en aynooɓe suudu go ndokkiti mo naŋngaaɓe, kaŋko boo o hokkiti ɓe saaro'en maɓɓe.

¹⁰Yonatan jooɗi haa Urusaliima. O fuɗɗi nyiɓtaago wuro e wo'itingo ngo.

¹¹O umri huuwooɓe nyiɓto mahi wuro man e ɓe taarna hooseere Siyona bee kaa'e towɗe ngam semmbiɗingo nde. Ɗum waɗaama.

¹²Sooje'en jananɓe jooɗiiɓe gure ɗe Bakides cemmbiɗini annini dillugo.

¹³Ɓe ɗali kuuɗe maɓɓe e ɓe lorti haa lesdi maɓɓe.

¹⁴Haa Bayti-Sur kam, Isra'iila'en yedduɓe Allah ndimmbaaki sam, wuro man ɗum suuɗirde maɓɓe.

¹⁵Laamiiɗo Aleksandire heɓi habaru ko Demetiriyus tammini Yonatan nder bataakewol mum. Ɓe limtani mo konuuji e jaalorɗe ɗe Yonatan e deerɗum'en keɓi e torraaji ɗi ɓe ngiidi.

¹⁶Laamiiɗo wi'i: “En keɓata goɗɗo bana maako na? Ngartiren mo balloowo e soobaajo men.”

¹⁷O neli mo bataakewol binndaaŋgol bana nii:

¹⁸“Laamiiɗo Aleksandire ɗon hoofna deerɗum Yonatan.

¹⁹Mi nani ko wi'a dow ma: A goɗɗo marɗo cuusal, a he'i laataago soobaajo amin.

²⁰Daliila maajum mi meeti ma hannde limanjo mawɗo mo jama'aare ma, mi hokki ma boo daraja “soobaajo laamiiɗo”. Sey jonta kam, laatoɗa a balloowo amin e njooɗoɗa a soobaajo amin.” Laamiiɗo neldi mo bee bataakewol ngo'ol, limce boɗeeje ɗe mooɓtirɗe e meetaleewol kaŋŋeeri.

²¹Yonatan ɓorni limce limanjo mawɗo yaake juulde bukkaaji, nder lewru joweeɗiɗawru ndu hitaande 160. O fuɗɗi mooɓtugo mooɓe sooje'en e tappugo balmi ɗuuɗɗi.

²²Nde Demetiriyus nani habaru man, ɓernde maako metti, o wi'i:

²³“Ko ngaɗɗen ɗo! Aleksandire aarti en laataago soobaajo Yahuudu'en e o semmbiɗini joonde maako!

²⁴Min boo, mi winndanan ɓe ngam ƴamgo ɓe walliinde bee hokkugo ɓe daraja e caahuuji. Mi yiɗi ɓe taaskana wallugo yam.”

²⁵O neli ɓe bataakewol ngo'ol: “Laamiiɗo Demetiriyus hoofni jama'aare Yahuudu'en.

²⁶Min keɓi habaru no on ɗon neɗɗini alkawal kaɓɓaaŋgal bee amin e ɗum seyni min, on soobiraaɓe amin tum, on ɗon ngondi bee amin, on kawtanaay konne'en amin.

²⁷To on njogi alkawal ngal on kaɓɓi bee amin, min mbarjoto on bee kuuɗe ko kuuwanton min.

²⁸Min ngaɗana on ustaaru haa garaama e min ndokkan on caahuuji.

²⁹Diga jonta mi yaafanake on haa yoɓgo garaama hitaande fuu, garaama dow mannda e garamaaji laamiiɓe. Ɗum laarani Yahuudu'en fuu.

³⁰Diga jonta, mi ɗon rimɗina on haa foroy ƴaamle yeɓre woore nder tati e reeta ɓenndalooje. Ɗum ɗon fuɗɗa huuwgo diga hannde haa foroy haa lesdi Yahudiya, haa gure tati ɗe Samariya'en e haa Galiili fuu.

³¹Urusaliima laatoto bana berniwol ceniiŋgol, ngol yoɓataa garaama non boo gure maago fuu. Ɓe meemataa koo zakka jawdi maagol bee garamaaji gartananɗi ngol.

³²Mi acci ardaaŋgal dow suudu Urusaliima semmbiɗndu, mi hokkita ardaaŋgal man haa limanjo mawɗo cuɓanɗo aynooɓe ndu.

³³Mi hokkita ndimu haa Yahuudu'en naŋngaaɓe haa Yahudiya e haa laamu am fuu. Mi ƴamataa haa maɓɓe coottaari koo ndiye, mi yaafani ɓe haa garamaaji koo dow dabbaaji maɓɓe.

³⁴Yahuudu'en wonɓe nder lesdi am fuu, mi yaafanake ɗum garmeego e nyamaale wakkati juulde, nyalɗe ciwtorɗe, juulde nde lewru to darake, balɗe ciwtorɗe e balɗe tati aartuɗe malla tokkiiɗe juulde mawnde fuu.

³⁵Walaa potanɗo ƴamgo ɓe malla doolgo ɓe malla ɓillugo ɓe dow haala koo kaye fuu.

³⁶Ɓe poti ɓe nasta nder kuugal sooje'en laamiiɗo, deydey Yahuudu'en ujine cappanɗe tato e ɓe njoɓete bana sooje'en luttuɓe.

³⁷Woɗɓe caka maɓɓe aynan cuuɗi laamiiɗo cemmbiɗɗi malla boo ɓe ndokka ɓe kuuɗe koolɗinaaɗe nder laamu. Ardiiɓe sooje'en e mawɓe maɓɓe cuɓete caka maɓɓe, ɓe ngeeɗan bana no Tawreeta umri ɓe fodde ko laamiiɗo umri dow yimɓe Yahudiya.

³⁸Gure tati ɗe Samariya'en takkanaaɗe Yahudiya kawtanan ɗum, ɗum laatoto taƴre lesdi ngoori, gure ɗe'e kalfinte les ardaaŋgal mawɗo liman'en.

³⁹Mi hokki Potolemayis e lesdi mum haa haykaliiru Urusaliima haa garaama iwka ton huuwtinire ngam haaje dewal.

⁴⁰Hitaande fuu, mi hokkan ceede cardi ujine sappo e jowi dow ko marmi nder laamu am.

⁴¹Ɓooyma, huuwanooɓe ngomna ndokkataa koo moy ceede jowaaje. Yeeso ɗo ɓe kuuwtiniran ɗe ngam haaje haykaliiru.

⁴²Ɓe ɗonno boo kooca hitaande fuu ceede cardi ujine jowi dow keɓal haykaliiru, ɓe meetataa waɗgo ɗum, ngam ceede man laatano liman'en huuwanɓe nder haykaliiru.

⁴³Ɓe naŋngataa suuɗanɓe nder haykaliiru Urusaliima malla dow taƴre lesdi maaru, koo to ɓe ɗon tokki ɓe ceede laamu malla nyamaale goɗɗe, ɓe naŋngataa jawle ɗe ɓe mari nder lesdi am.

⁴⁴Ceede laamu njoɓan kuuɗe nyiɓtaago e hesɗitingo haykaliiru.

⁴⁵Ceede man ɗen njoɓata boo mahitugo mahi towɗi ɗi Urusaliima e semmbiɗingo mahi taariiɗi bee kuuɗe ɓaŋgtugo mahi goɗɗi haa Yahudiya.”

⁴⁶Yaake Yonatan e yimɓe mum keɓi habaru ko Demetiriyus tammini ɓe, ɓe cali jaɓgo haala ka e ɓe ngatanaay ɗum hakkiilo: Ɓe ɗonno ciftora laamiiɗo ukkani Isra'iila masiibooji ɗuuɗɗi, o ɓilli ɓe jamum.

⁴⁷Ɓe ndikkitini hokkugo hoolaare haa Aleksandire, kaŋko laati arano waɗɓe nufayeeje sulhu laaɓɗi. Ɓe kawtani mo duuɓi ɗi o yeeɗi fuu.

⁴⁸Laamiiɗo Aleksandire mooɓti mooɓe ɗuuɗɗe e o tiiti laamiiɗo Demetiriyus.

⁴⁹Laamiiɓe ɗiɗo go nasti haɓre, ammaa sooje'en Aleksandire ndoggi. Demetiriyus tokki ɓe, o jaali ɓe.

⁵⁰Haɓre kam waɗaama bilaa darneego haa naaŋge muti, ammaa Demetiriyus mbaraama nyannde man.

⁵¹Nden Aleksandire neli dow Potolome njoweegoojo, laamiiɗo Misra, wakiili'en bee nelal nga'al:

⁵²“Mi warti nder lesdi am, mi hoociti koromwal laamu kaakiraaɓe am. Mi jaɓti laamu, mi jaali Demetiriyus e mi nyaami lesdi amin.

⁵³Nii non, mi ummini haɓre bee Demetiriyus: Min e sooje'en am, min parti mo bee sooje'en maako fuu, min jaɓti koromwal laamu maako.

⁵⁴Mbaɗen alkawal hakkunde men jonta, alkawal ngal soobiraaku, mi ƴaman ɓiŋngel ma deyel haa teegal. Mi laatoto esiraawo maaɗa, mi hokkan on, an bee maako fuu, caahuuji deydey daraja ma.”

⁵⁵Laamiiɗo Potolome jaabi mo bee kalimaaji ɗi'i: “Ɗum nyalaade mawnde, nyalaade nde ngartuɗa nder lesdi kaakiraaɓe ma e nde a hooci koromwal laamu maɓɓe!

⁵⁶Nii non boo, mi jaɓi ko mbi'ɗa nder alkawal ma, ammaa ngiiden tawon haa Potolemayis, carwootiren. Mi hokkete ɓiyam ngam te'a mo bana ƴamɗa.”

⁵⁷Potolome dilli Misra bee ɓiyum debbo Kelopater, o yotti Potolemayis nder hitaande 162.

⁵⁸Laamiiɗo Aleksandire fotti bee maako. Potolome hokki mo ɓiyiiko, ɓe kaɓɓi teegal haa Potolemayis, ɓe pantini ɗum ko haanani laamiiɓe.

⁵⁹Ɓaawoɗon laamiiɗo Aleksandire winndani Yonatan, o ewni mo o wara o hawra bee maako.

⁶⁰Yonatan yehi tawoyi mo haa Potolemayis, ton o yiidi bee laamiiɓe ɗiɗo fuu. O hokki ɓe kamɓe e wi'eteeɓe “sooba'en laamiiɗo” cardi e kaŋŋeeri e caahuuji ɗuuɗɗi: Ɗum fottani ɓe.

⁶¹Isra'iila'en faasiki'en e yedduɓe Allah kawti haa ɓe ndartana Yonatan. Ɓe kaadani mo, ammaa laamiiɗo Aleksandire faalaay ɓe.

⁶²O umri ɓe cannja limce Yonatan bee limce boɗeeje ɗe mooɓtirde. Ɗum waɗaama.

⁶³Laamiiɗo jo'ini mo kommbi maako, o wi'i wakiili'en maako: “Ɗofte mo haa caka cak wuro, taa goɗɗo waɗa tufle malla haadoore dow maako malla toonyo mo gal kala fii fuu.”

⁶⁴Nde tuflooɓe ceedi dow daraja ka ɓe ngaɗani Yonatan e nde ɓe ndaari o ɓorni limce boɗeeje go, ɓe ndoggi.

⁶⁵Laamiiɗo darjiɗini mo fahin nde o jo'ini mo yeeso “sooba'en laamiiɗo” e o meeti mo mawɗo ardiiɓe sooje'en e ngomnaajo wuro.

⁶⁶Yonatan seyi, huuci nder jam haa Urusaliima.

⁶⁷Nder hitaande 165, Demetiriyus ɓii laamiiɗo Demetiriyus arano warti diga Kereta haa lesdi kaakiraaɓe mum.

⁶⁸Kubaruwol ngol sakli laamiiɗo Aleksandire jamum haa o lorti Antakiya.

⁶⁹Demetiriyus suɓi Apolloniyus bana ngomnaajo lesdi Siriya maŋngo. Kaŋko boo o mooɓti mooɓre sooje'en ɗuuɗnde, o saŋngini kommbi Jamniya. Nden o neldi Yonatan, mawɗo liman'en, bataakewol ngo'ol:

⁷⁰“An feere ma toonyoto min. Ndaa mi toskaama, mi semtinaama ngam daliila ma. Ɗume ɗum nafete laamango min nder kooseeje?

⁷¹To a ɗon hooli mooɓe ma, jippa, hon min nder harde, en ndaaran moy ɓurata margo semmbe caka men, ngam mi ɗonno bee ballal mooɓe garanɗe diga berniiji.

⁷²Humpita, faam moy ngonmi e ɓeye ngoni wallooɓe yam. Ɓe mbi'ete, onon on ngalaa saa'a koo seɗɗa haɓtaago min, ngam kaakiraaɓe mon partaama nde ɗiɗi haa lesdi mum'en.

⁷³Fakat a waawataa dartango kippol wa'ooɓe pucci am e sooje'en am haa harde haa walaa babal e suuɗe, naa hayre naa tapaare.”

⁷⁴Nde Yonatan jaŋngi bataakewol Apolloniyus, o sakli. O hooci sooje'en ujine sappo, o wurtodi Urusaliima. Deerɗiiko Simon tokki mo bee sooje'en wallooɓe woɗɓe.

⁷⁵Ɓe caŋngini yeeso Jaffa. Yimɓe berniwol man maɓɓuno dammuɗe maagol dow umroore sooje'en Apolloniyus wonɓe ton. Isra'iila'en kippi Jaffa.

⁷⁶Yimɓe berniwol man kultori, maɓɓiti dammuɗe maagol haa Yonatan go jaali ngol.

⁷⁷Nde Apolloniyus heɓi habaru maajum, o ummi bee wa'ooɓe pucci deydey ujine tato e sooje'en ɗuuɗɓe. O tiiti Asdod bana to o yahan ton cir, ammaa bee gooŋga o ɗon yaha haa harde ngam wa'ooɓe pucci maako ɗuuɗi e o hooli ɓe.

⁷⁸Yonatan taasni mo gal Asdod e sooje'en geɓe ɗiɗi fuu tiitotiri.

⁷⁹Ammaa Apolloniyus ɗali wa'iiɓe pucci ujineere ɓaawo Isra'iila'en bilaa anndaaŋgal maɓɓe.

⁸⁰Yonatan faami konne'en ɗon kippo mo gal ɓaawo, ɓe ɗon taaro sooje'en maako. Ɓe cakkini kuri dow Isra'iila'en diga fajira haa asiri.

⁸¹Sooje'en Yonatan ɗon kaɓto bana no o umri ɓe, nden pucci konne'en puɗɗi somgo.

⁸²Simon boo nastini yimɓe mum nder haɓre bee konne'en yahooɓe bee kosɗe, wakkati wa'iiɓe pucci tampi e mbaawaay haɓgo fahin. Simon saŋkiti konne'en, ɓe cafti, ɓe ndoggi.

⁸³Sooje'en wa'iiɓe pucci caŋkiti nder harde. Dogguɓe njotti Asdod, ɓe cuuɗi nder suudu Daagon mo ɓe ndewata.

⁸⁴Yonatan wuli e luuwi Asdod bee gure keedduɗe bee maago fuu. Suudu Daagon wulaama bee suuɗiiɓe nder mum.

⁸⁵Yimɓe ko dillani ujine njoweetato fuu mbaraama nder konu malla ngulaama nder ngulu.

⁸⁶Yonatan dilli, yehi waɗi saŋngeere mum yeeso Askalon. Yimɓe wuro ngurti ngam jaɓɓaago mo bee daraja ɗuuɗka.

⁸⁷Nden Yonatan lorti bee sooje'en mum haa Urusaliima, ɓe ɗon ndoondi jawle ɗuuɗɗe.

⁸⁸Nde laamiiɗo Aleksandire nani habaruuji ɗi'i, o tefi teddingo Yonatan fahin.

⁸⁹O neldi mo ɓilduɗum kaŋŋeeri, caahu ngu ɓe ndokkata ko woowa haa marɓe meetaleewol “saaro'en laamiiɗo”. O hokki mo fahin wuro Ekurun e ko taari ɗum.