Read Fulfulded 1 Makabe 11 Bible Online

1 Makabe 11 - Fulfulded bible

1 Makabe 11

¹Haa Misra, laamiiɗo Potolome mooɓti koommbooje mawɗe e mooɓe sooje'en ɗuuɗɗe bana njaareendi daande maayo. O yiɗi margo bee dabare laamu Aleksandire ngam o takkana ngu lesdi maako.

²O dilli lesdi Siriya bee hollugo jam waddi mo. Yimɓe gure ɗe o yaali fuu maɓɓitani mo dammuɗe gure mum e ɓe ɗon ngara ngiida bee maako. Laamiiɗo Aleksandire kanyum bee hoore mum hokki umroore ɓe njaɓɓo mo bana nii ngam Potolome ɗum esiiko.

³Ammaa kaŋko boo, haa o yahata nder gure man fuu, o ɗon ɗala mooɓe sooje'en aynooɓe haa ton.

⁴Nde o yotti les Asdod, ɓe kolli mo suudu Daagon wulaandu, winnde wuro e gure goɗɗe, maayɓe sakkinaaɓe koo toy fuu e wulaaɓe luttuɓe ɓe Yonatan sakkino nder yiite yaake konu: Ɓe mooɓti ɗum fuu ngam hollugo laamiiɗo wakkati o saaloto.

⁵Ɓe limtani Potolome ko Yonatan waɗi fuu, ngam ɓe tammo ɗum tuurtinan mo, ammaa walaa ko o jaabi.

⁶Yonatan yehi haa Jaffa ngam yiidugo bee Potolome. Ɓe njaɓɓindiri e ɓe kiirdi nder wuro man.

⁷Yonatan ɗofti laamiiɗo haa maayo Eleter, ɓaawoɗon o lorti Urusaliima.

⁸Laamiiɗo Potolome kanyum boo mari gure diga fomoonde maayo haa Selewkiya dow maayo. O fuɗɗiti waɗgo anniyaaji kalluɗi dow Aleksandire.

⁹O neli wakiili'en haa laamiiɗo Demetiriyus bee bataakewol ngo'ol: “War haa ɗo ngam haa ngaɗen alkawal. Mi hokkete ɓiɗɗo am debbo Kelopater mo Aleksandire te'i e a ardoto laamu baaba ma.

¹⁰Mi micciti hokkugo ɓiŋngel am haa goɗɗo oo ngam o tefi mbargo yam.”

¹¹Potolome waɗi tufle dow Aleksandire ngam kaŋko maa o yiɗi jaɓtugo laamu maako.

¹²O hoociti ɓiyiiko e o hokki mo haa Demetiriyus. O ta'i gendal maako bee Aleksandire e ɓe ngarti ɓe konne'en laaɓɗum tal.

¹³Potolome nasti Antakiya, o waɗi hoore maako laamiiɗo Siriya maŋngo. O meeti meetaleeji ɗiɗi, ngol laamu Misra e ngol Siriya maŋngo.

¹⁴Wakkati man, laamiiɗo Aleksandire ɗonno haa Kilikiya ngam yimɓe lesdi man tuurti.

¹⁵Nde o nani ko Potolome waɗi, Aleksandire tiiti mo ngam hongo mo. Ammaa Potolome fotti bee maako bee sooje'en ɗuuɗɓe e o farti mo.

¹⁶Aleksandire doggi, yehi suuɗoyi haa Arabiya, laamiiɗo Potolome jaali.

¹⁷Arabjo bi'eteeɗo Zabdiyel ta'i hoore Aleksandire e o neldi nde Potolome.

¹⁸Kaŋko boo o maayi balɗe ɗiɗi ɓaawoɗon, sooje'en ɓe o ɗali nder gure cemmbiɗinaaɗe, yimɓe gure man mbardi ɓe.

¹⁹Bana non, Demetiriyus warti laamiiɗo nder hitaande 167.

²⁰Nder wakkati man Yonatan mooɓti yimɓe Yahudiya haa ɓe kippo cuuɗi Urusaliima cemmbiɗɗi. Ɓe tappi kuuje pusruɗe mahi ngam hippaago ɗi.

²¹Yahuudu'en seɗɗa yedduɓe Allah e wanyɓe yimɓe mum, njehi haa laamiiɗo Demetiriyus, ɓe mbi'i mo Yonatan ɗon taari suudu semmbiɗndu.

²²Habaru man mettini ɓernde laamiiɗo. Ɗon nii o taaski dillugo haa Potolemayis. O winndani Yonatan haa o acca kippol mum dow suudu semmbiɗndu go, o wara ɓe ngiida bee ko yaawi haa Potolemayis.

²³Nde Yonatan jaŋngi bataakewol ngo'ol, o umri ɓe tokko kippol man bana aran. O suɓi ardiiɓe Isra'iila e liman'en seɗɗa ɓe ɗofta mo, o dilli o foondi ɗewnaare jahaaŋgal nga'al.

²⁴O yotti haa laamiiɗo haa Potolemayis bee caahuuji ɗuuɗɗi, cardi e kaŋŋeeri, limce e caahuuji goɗɗi. Nii o heɓi yerduye Demetiriyus.

²⁵Isra'iila'en yedduɓe Allah njahrino kaadooje dow Yonatan,

²⁶ammaa laamiiɗo hoociri mo bana no laamiiɓe aartuɓe koocirno mo: O darjiɗini mo yeeso “sooba'en laamiiɗo”.

²⁷O hokkiti mo kuugal maako bana mawɗo liman'en e daraja ka o heɓno aran fuu, o limi mo boo caka “sooba'en laamiiɗo” aran'en.

²⁸Yonatan ƴami laamiiɗo, Yahudiya e gure Samariya tati fuu njoɓataa garaama, ammaa o tammini hokkugo mo cardi kilo 8.100.

²⁹Laamiiɗo jaɓi ƴamol maako e ngam gooŋɗingo kaɓɓotiral man, o hokkiti Yonatan bataakewol binndaaŋgol bana nii:

³⁰“Laamiiɗo Demetiriyus hoofni deerɗum Yonatan e ummaatoore Yahuudu'en.

³¹Min ɗon neldana on bataakewol ngol min mbinndi dow mooɗon haa Lasten, gooto nder “saaro'en laamiiɗo” ngam keɓon habaru man:

³²Laamiiɗo Demetiriyus hoofni Lasten saaro maako sakiike.

³³Mi anninake warjaago jama'aare Yahuudu'en ngam ɓe ɗowtani yam: Yahuudu'en ɗum soobiraaɓe men, ɓe ɗon ɗowtani en bana no fotti.

³⁴Mi tabitini jarfu maɓɓe dow Yahudiya e gure tati Aferema, Lidda e Ramatayim. Gure tati ɗe'e e ko ɗe ndawranto fuu ittaama haa Samariya ngam ɗe kawtana Yahudiya ngam tammiiɓe lii'ugo kirseteeɗi haa Urusaliima. Yeeso ɗo ɗe njoɓataa garaama koo dow gese, koo dow ɓenndalooje haa laamiiɗo.

³⁵Ɓe njoɓataa garamaaji goɗɗi ngartananɗi yam: Zakka keɓal, garamaaji boowaaɗi, garaama dow mannda e garamaaji ɗi laamu.

³⁶Walaa sarɗiwol fuu faasititte naa hannde, naa yeeso.”

³⁷Mbinndite bataakewol ngo'ol e ndokke ngol haa Yonatan. O jo'ina ngol haa babal baŋguŋgal dow towndiire haykaliiru.

³⁸Nde laamiiɗo Demetiriyus yi'i lesdi ɗon de'iti nder laamu muuɗum e walaa gooto salori mo, o lorni mooɓe maako, soojeejo fuu huuci haa saare mum. Ammaa o ɗali sooje'en haya ɓe o koocuno haa duuɗe Yunaniŋke'en. Ko o waɗi ɗo jaayani mo nganyŋgu sooje'en huuwanooɓe laamiiɓe aartuɓe.

³⁹Tirifon, gonnooɗo bee Aleksandire ɓooyma, seyi nde sooje'en fuu ɗon pela Demetiriyus. O dilli haa Yamlikos, Arabjo mawninanɗo Antiyokus ɓii Aleksandire.

⁴⁰O tiini ƴamgo Yamlikos hokkita mo ɓiŋngel ngam ngel hooca koromwal baaba maagel. Tirifon anndini anniyaaji ɗi Demetiriyus hooci e nganyŋgu mooɓe sooje'en maatata dow laamiiɗo. O jooɗi o faɓɓi haa Yamlikos.

⁴¹Yonatan, gal wakeere mum, neldi bataakewol haa laamiiɗo Demetiriyus. O ɗon ƴama mo o hoocita sooje'en maako haa Urusaliima e haa gure cemmbiɗinaaɗe haa Yahudiya ngam ɓe ɗon kaɓa tum bee jama'aare Isra'iila.

⁴²Demetiriyus jaabi Yonatan bee boliiɗe ɗe'e: “Accu mi waɗa ko ƴamɗa yam ngam ma e ummaatoore ma, mi hokkan on daraja to mi suklitake.

⁴³Jonta neldam sooje'en ngara mballa yam nder haɓre, ngam sooje'en am fuu tuurtani yam.”

⁴⁴Ɗon nii Yonatan neldi mo sooje'en mum waawɓe konu haa Antakiya, deydey ujine tato. Demetiriyus seyi nde ɓe ngari,

⁴⁵ngam yimɓe wuro ko dillani ujine teemerre e noogas mooɓti caka wuro Antakiya haa parta mo.

⁴⁶Demetiriyus doggino suuɗi nder saare mum, jama'aare man wurti dow laabi e fuɗɗi haɓre.

⁴⁷Laamiiɗo ewni Yahuudu'en ɓe porto, ɓe fuu ɓe ngari. Ɓe caŋkiti nder wuro e ɓe mbari ko dillani yimɓe ujine teemerre nyannde man.

⁴⁸Ɓe nguli wuro man, ɓe njaɓti boo jawle ɗuuɗɗe. Nii laamiiɗo hisri.

⁴⁹Nde yimɓe wuro paami Yahuudu'en nyaami wuro bee koyɗum, ɓe tampi, ɓe njehi ɓe tori laamiiɗo bee bojji, ɓe mbi'i:

⁵⁰“Tef salaaman, umru Yahuudu'en acca hippaago min e hippaago wuro amin.”

⁵¹Ɓe cakkini balmi maɓɓe, ɓe culhindiri bee laamiiɗo. Yahuudu'en keɓi tedduŋgal maŋngal yeeso Demetiriyus e haa yimɓe mum. Nannanti maɓɓe saŋkiti nder laamu man fuu. Ɓe lorti Urusaliima ɓe ɗon kebbini doŋle.

⁵²Laamiiɗo Demetiriyus hooci kanyum boo, koromwal laamu e lesdi fuu ɗon nder de'eende nder laamu maako.

⁵³Ammaa o yottinaay alkawal ngal o haɓɓi, o wanyi Yonatan. Dow o yetta mo dow ko o waɗani mo o fuɗɗi ɓillugo mo.

⁵⁴Wakkati seɗɗa ɓaawoɗon, Tirifon warti bee Antiyokus. Koo ngam Antiyokus, o pamaro jamum, ɓe laami mo, ɓe meeti mo.

⁵⁵Mooɓe sooje'en ɗe Demetiriyus neli mooɓti kommbi Antiyokus. Ɗe koni Demetiriyus, ɗe njaali mo, o doggi.

⁵⁶Tirifon jaɓti nyiibi haɓre maako, o warti o laamani Antakiya.

⁵⁷Antiyokus njoweegoojo pamaro winndani Yonatan bataakewol ngo'ol: “Mi tabitini ma nder kuugal limanjo mawɗo. Mi ardini ma boo dow gure nayi e mi hokki ma meetaleewol ‘soobaajo laamiiɗo’.”

⁵⁸O neldi mo payankon kaŋŋeeri bee alko taabal fuu, o hokki mo duŋayeere yargo nder jardugel kaŋŋeeri e duŋayeere ɓornaago limce boɗeeje ɗe kuugal limanku bee peɗirɗum kaŋŋeeri.

⁵⁹O ardini Simon, deerɗiraawo Yonatan wakiiliijo sooje'en haa lesdi ngonndi hakkunde hooseere nde ɓe mbi'ata ɓaargal Tir e keerol lesdi Misra.

⁶⁰Yonatan naŋngi laawol, o taƴti Siriya maŋngo e o ɗon saalo caka gure. Mooɓe sooje'en fuu ɗon kawtani mo. O tiiti gal Askalon, yimɓe wuro man fuu ngurti njaɓɓi mo bee daraja.

⁶¹Diga ton o dilli haa Gaaza, ammaa yimɓe wuro man maɓɓi pareeje wuro muuɗum'en. O hippi ngo, o luuwi e o wuli gure keedduɗe bee maago.

⁶²Yimɓe wuro Gaaza ƴami sulhu, Yonatan jaɓi sulhu man. O naŋngi yerima'en wuro man, o yerɓi ɓe haa Urusaliima. Ɓaawo man, o taƴti lesdi man fuu haa o yotti Damas.

⁶³Yonatan nani wakiili'en sooje'en Demetiriyus njehi haa Kades nder Galiili bee sooje'en ɗuuɗɓe, ngam haɗgo mo huuwgo kuugal maako.

⁶⁴O tiiti ɓe, ammaa o ɗali deerɗiiko Simon haa Yahudiya.

⁶⁵Kaŋko o yehi o dari haa Bayti-Sur, o hippi wuro man e o taari ngo balɗe ɗuuɗɗe.

⁶⁶Ragare man, yimɓe wuro cafti ƴami sulhu, Simon jaɓani ɓe. Ammaa o dooli ɓe ɓe ngurto ngo. O jaɓti ngo o wartiri ngo saare sooje'en maako.

⁶⁷Gal wakeere maɓɓe, Yonatan bee sooje'en mum caŋngini haa les weendu Genesaret. Fajira cub jaŋngo man, ɓe ndilli, ɓe tiiti daldal Hasor.

⁶⁸Konne'en maɓɓe ngari potti bee maɓɓe haa yayre man, ammaa ɓe ɗali haa kooseeje sooje'en ngam waaltanaago Yonatan. Wakkati man ɓurna sooje'en ɗon ngara fottugo bee maako,

⁶⁹sooje'en suuɗiiɓe nder kooseeje ngurti kippi ɓe.

⁷⁰Sooje'en Yonatan ndoggi. Koo gooto luttaay, sonaa ardiiɓe sooje'en ɗiɗo tan, Matatiyas ɓii Absalom e Yahuuda ɓii Kalfi.

⁷¹Nden Yonatan seeki limce mum, rufi collaaje dow mum, o tori.

⁷²Ɓaawoɗon, o fuɗɗiti haɓre, o jaali konne'en, o farti ɓe.

⁷³Nde sooje'en ɗalnooɓe Yonatan nani o jaalake, ɓe lorti gal maako, ɓe mballi mo tokkaago konne'en haa saŋngeere maɓɓe haa Kades. Ton ɓe caŋngini boo.

⁷⁴Konne'en ko dillani ujine tato fuu kalki nyalde man. Ɓaawo man, Yonatan huuci Urusaliima.