Read Fulfulded 1 Makabe 12 Bible Online

1 Makabe 12 - Fulfulded bible

1 Makabe 12

¹Nde Yonatan faami ko ɗon salo ɗon yahana mo, o suɓi wakiili'en, o neli ɓe haa Roma. Nelal maɓɓe ɗum tabitingo e hesɗitingo alkawal bee Roma'en.

²Ngam daliila maajum, o neli bataakeeji haa Separta e gure goɗɗe.

³Wakiili'en go ndilli haa Roma e ɓe ngiidoyi bee dawrooɓe Roma mawɓe. Ɓe mbi'i ɓe: “Limanjo mawɗo bi'eteeɗo Yonatan e jama'aare Yahuudu'en neli min ngam min kesɗitina alkawal ngal on kaɓɓidi bee maɓɓe.”

⁴Dawrooɓe go ndokki ɓe bataakeeji ngomna'en lesɗe ɗe ɓe caaloto fuu ngam ɓe ayna ɓe dow laawol kuucuki maɓɓe.

⁵Ndaa ko winnda nder bataakewol ngol Yonatan winndani Separta'en:

⁶“Limanjo mawɗo bi'eteeɗo Yonatan, dawrooɓe ndotti'en jama'aare, liman'en e Yahuudu'en fuu koofni deerɗum'en Separta'en.

⁷Neeɓi masin, mawɗo liman'en amin Oniyas, heɓno bataakewol laamiiɗo mon Areyos. O wi'no nder bataakewol man, on koociri min bana deerɗiraaɓe mon: Ko winnda nder bataakewol ngo'ol ɗon holla ɗum.

⁸Oniyas jaɓɓi nelaaɗo mon bee daraja, o jaŋngi ko winndi nder bataakewol man: Ɗum dari dow alkawal e soobaaku.

⁹Defte ceniiɗe ɗe min mari, kanje ngoni seeɓoore tiinaare amin, min ndoolataa ko'e amin haɓɓugo irin alkawe ɗe'e.

¹⁰Ammaa, min ɗon ngelo bee bataakewol ngo'ol, min kesɗitina alkawal deerɗiraagu e soobaaku men ngal min kaɓɓuno. Fakat min ngiɗaa min ngarta bana jananɓe haa mon, ngam duuɓi ɗuuɗɗi caali diga on nelani min nelaaɗo mon.

¹¹Gal wakeere amin, min accaay siftorgo on to min ɗon lii'ana Allah kirseteeɗi malla to min ɗon toro mo yaake juulɗe amin. Ɗum foti e ɗum wooɗi siftorgo deerɗiraaɓe mum.

¹²Min ɗon ceyoro boo daliila nannanti mon.

¹³Minin kam, min ngiidi bee ɓillaaje e konuuji ɗuuɗɗi, ngam laamiiɓe heeddiɗɗiraaɓe amin kippi min.

¹⁴Min cali ɓillugo on malla ɓillugo wallooɓe e soobiraaɓe amin haa ɓe mballa min nder konuuji ɗi'i.

¹⁵Min ɗon tammori Allah bee walliinde mum: kaŋko senndiri min bee konne'en amin e o toski ɓe boo.

¹⁶Jonta kam, min cuɓi Numeniyus ɓii Antiyokus e Antipater ɓii Yason, min neli ɓe haa Roma'en ngam ɓe kesɗitina alkawal e soobaaku ngal min kaɓɓuno bee maɓɓe.

¹⁷Min umri boo wakiili'en amin njotto on ngam ɓe koofna on e ɓe ndokkita on bataakewol amin ƴamanŋgol on hesɗitingo soobiraaku men.

¹⁸Nden, on ceynan min boo, to on njaabake min dow haala ka'a.”

¹⁹Ndaa bataakewol neldanaaŋgol Oniyas ɓooyma:

²⁰“Areyos, laamiiɗo Separta'en hoofni limanjo mawɗo bi'eteeɗo Oniyas.

²¹Min tawi bataakewol binndaaŋgol dow joonde Separta'en e Yahuudu'en, kollitaaŋgol ɓe deerɗiraaɓe. Le'i ɗi'i iwi haa Ibrahiima.

²²Jonta kam, nde min paami nii ɗum wa'i, ɗum seynan min to on ndokki min habaruuji dow joonde mon jonta.

²³Minin kam, min ɗon taaski haa min mbi'a: Ndaare dabbaaji amin e jawle amin bana to ɗum mooɗon, minin boo min ndaaran ɗum mooɗon bana ɗum amin. Min ɗon umra nelaaɓe amin ɓe maatina on nufayeeje amin.”

²⁴Nde Yonatan nani habaru mawɓe ardiiɓe sooje'en Demetiriyus lorti hongo mo bee sooje'en ɗuuɗɓe ko ɓuri naane,

²⁵o wurti Urusaliima ngam o fotta bee maɓɓe haa lesdi Hamat. O yiɗi haɗgo ɓe nastugo lesdi maako.

²⁶O neli horooɓe nder saŋngeere maɓɓe. Ɓe ngarti, ɓe mbi'i mo: Konne'en ɗon taasko hippaago ɓe jemma.

²⁷Diga mutki naaŋge, Yonatan umri sooje'en maako taa ɓe ɗaano, ɓe taaskano haɓre jemma man fuu e ɓe kuuwtinira balmi maɓɓe ngam haɓtaago. O jo'ini aynooɓe haa taarde saŋngeere maɓɓe fuu.

²⁸Nde konne'en keɓi habaru no Yonatan e sooje'en mum ɗon taaskani haɓre, ɓe kultori, nde kultoreeŋgol man saati, ɓe kuɓɓi yiite nder saŋngeere maɓɓe e ɓe ndoggi.

²⁹Yonatan e sooje'en mum paamaay ɗum, sey nde fajiri waɗi, ɓe paami ko waɗi, ngam ɓe ɗonno ngi'a yiite ɗonno huɓɓa nder saŋngeere konne'en maɓɓe.

³⁰Yonatan tokki dogguɓe go, ammaa o jokkaaki ɓe ngam ɓe taƴti maayo Eleter.

³¹Nden Yonatan hippoyi lenyol Arab'en wi'eteeɓe Zabade'en. O jaali ɓe, o jaɓti jawle maɓɓe.

³²Nden o ummi haa saŋngeere maako, o dilli haa Damas, o waanci lesdi maajum fuu.

³³Simon, gal wakeere mum boo, ardini konu nder lesdi fuu haa o yotti Askalon e cuuɗi cemmbiɗɗi keedduɗi. Diga ton o dilli Jaffa, o jooɗi nder berniwol ngo'ol.

³⁴O nanino boo yimɓe berniwol man ngiɗno hokkugo babal cemmbiɗŋgal nga'al haa sooje'en Demetiriyus. O jo'ini yimɓe aynooɓe haa babal ngal.

³⁵Nde Yonatan warti haa Urusaliima, o mooɓti hawtirde nde ndotti'en jama'aare. O anniyi bee maɓɓe nyiɓgo cuuɗi cemmbiɗɗi haa Yahudiya,

³⁶ɓaŋgtugo mahi Urusaliima e darnugo mahol maŋngol hakkunde suudu semmbiɗndu bee berniwol ngam senndugo ɗum. O yiɗno sooje'en Demetiriyus njooɗo feere maɓɓe nder suudu semmbiɗndu, taa ɓe keɓa soodgo koo soorrugo koo ɗume.

³⁷Yimɓe berniwol puɗɗi kuuɗe wo'itingo Urusaliima. Sey ɓe mbo'itina wakeere mahol gibbuŋgol gal wakeere yayre fuunaaŋge e hesɗitingo fattude wi'eteende Kafenata.

³⁸Simon, gal wakeere mum, ɗon nyiɓto berniwol Adida haa lesdi leesndi. O semmbiɗini ngol, o semmbiɗini pareeje maago bee takkugo jamɗe.

³⁹Tirifon tefi haa o laamo dow Siriya maŋngo e haa ɓe meeta mo bana laamiiɗo bee naŋngugo Antiyokus njoweegoojo.

⁴⁰Ammaa o ɗon hula taa Yonatan haɗa anniya maako e o hona mo. O tefi dabare naŋngugo mo ngam o mbara mo, non o dilliri haa Bayti-Se'an.

⁴¹Yonatan dilli fotti bee maako bee yimɓe ujine cappanɗe nayo waawɓe konu. Kaŋko boo o yotti Bayti-Se'an.

⁴²Nde Tirifon yi'i Yonatan wari bee sooje'en ɗuuɗɓe, o huuwtiniri semmbe ngam naŋngugo.

⁴³O jaɓɓi mo bee daraja e o hokki mo caahuuji. O yottini mo haa sooba'en maako fuu, o umri ɓe boo bana o umri sooje'en maako, ɓe ɗowtano Yonatan bana to ɗum kaŋko.

⁴⁴Nden o ƴami Yonatan: “Ko waɗi comnuɗa sooje'en ma fuu alhaali walaa boo konu hakkunde men?

⁴⁵Wi' sooje'en ma ɓe kuuca, suɓ seɗɗa caka maɓɓe ɓe ɗofte e war bee am haa Potolemayis. Mi hokkete berniwol man e cuuɗi cemmbiɗɗi goɗɗi, bee mooɓe luttuɗe e bee akaawu'en wonɓe ton fuu. Daliila man waddi yam haa ɗo, ɓaawoɗon mi huucan.”

⁴⁶Yonatan jaɓi haala Tirifon, o waɗi bana o wi'i mo, o lorni sooje'en maako, ɓe kuuci Yahudiya.

⁴⁷O luttidi bee sooje'en ujine tato. Ɓaawoɗon, o ɗali sooje'en ujine ɗiɗo haa Galiili, ujineere tan ɗofti mo.

⁴⁸Ammaa nde o nasti haa Potolemayis, yimɓe berniwol maɓɓi dammuɗe maagol. Ɓe naŋngi Yonatan e ɓe mbari nastuɓe bee maako fuu.

⁴⁹Dow ɗon Tirifon neli mooɓe sooje'en yahooɓe bee kosɗe e wa'iiɓe pucci haa Galiili e nder yayre mawnde haa ɓe mbardoya sooje'en Yonatan.

⁵⁰Yimɓe ɓe'e paami no limanjo mawɗo naŋngaama e mbaraama hawtaade bee ɗoftuɓe mo. Bee man fuu, ɓe cuusɗindiri caka maɓɓe, ɓe nyiɓɓini caffuuji maɓɓe, ɓe tiiti ɓe, ɓe ɗon ndeena konu.

⁵¹Nde taasnuɓe ngi'i ɓe kaɓan haa yotto maayde maɓɓe, ɓe cafti, ɓe lorti.

⁵²Sooje'en Yahuudu'en fuu ngarti jam haa Yahudiya. Ɓe mboyi Yonatan e yimɓe mum, ɓe ɗonno nder mettamɓeram ɗuuɗɗam. Isra'iila fuu ɗonno nder suno maŋngo.

⁵³Nden yimɓe heefeerɓe heedduɓe bee maɓɓe fuu tefi no ɓe cenndira bee maɓɓe. Ɓe ɗonno mbi'a: “Yahuudu'en ngalaa ardiiɗo, ɓe ngalaa boo balloowo. Kippooɗen ɓe, mbarden ɓe, taa goɗɗo meeta siftorgo ɓe.”