Read Fulfulded 1 Makabe 13 Bible Online

1 Makabe 13 - Fulfulded bible

1 Makabe 13

¹Simon heɓi habaru Tirifon mooɓti mooɓe sooje'en ɗuuɗɓe ngam o yaha haa Yahudiya, o nattina lesdi man.

²Nde o faami jama'aare ɗon diwna ngam kultoreeŋgol, o dilli Urusaliima, o mooɓti Yahuudu'en.

³O haɓdi de'itingo ɓe, o wi'i ɓe: “Onon fuu on anndi, min e deerɗam'en fuu e lenyol amin fuu, min kaɓani hisnugo Tawreeta e haykaliiru men. On anndi konuuji e boneeji ɗi min ngiidi.

⁴Ngam hisnugo Isra'iila, deerɗam'en fuu maayi. Jonta, mi lutti feere am.

⁵Mi numaay hisnugo yoŋki am wakkati masiibo, yoŋki am ɓurataa ki deerɗam'en saman.

⁶Ammaa mi haɓan ngam hisnugo jama'aare am, haykaliiru men, rewɓe mon, ɓikkoy mon, ngam nder nganyŋgu maɓɓe dow men, heefeerɓe kawti ngam mbargo en.”

⁷Boliiɗe Simon ɗe'e cuusɗini yimɓe.

⁸Yahuudu'en njaabi mo bee semmbe: “An woni ardiiɗo amin haa babal deerɗa'en Yahuuda e Yonatan.

⁹Arda min haa haɓre, min tokkoto ko mbi'ɗa.”

¹⁰Nden Simon mooɓti yimɓe haanduɓe haɓgo, o yaawi lamsugo mahi Urusaliima, o semmbiɗini mahi taarɗi berniwol man.

¹¹O neli Yonatan ɓii Absalom haa Jaffa bee mooɓre sooje'en ɗuuɗɓe. Yonatan farti yimɓe wuro man e o waɗi weerde haa ton.

¹²Tirifon ummi diga Potolemayis bee mooɓe ɗuuɗɗe ngam o hippoyo Yahudiya. O yahdi bee Yonatan, deerɗiraawo Simon mo o naŋngi.

¹³Simon waɗi saŋngeere mum haa Adida, nde tiitotiri bee yayre.

¹⁴Tirifon nani Simon hooci laamu ɓaawo deerɗum Yonatan e o ɗon taaskano konu bee maako. O neli nelaaɓe dow Simon ɓe mbi'a mo nii:

¹⁵“Deerɗiraawo ma Yonatan ɗonno nela ceede haa ndesaari laamu daliila kuugal limanku maako. Ammaa nde o waɗaay ɗum, mi jo'ini mo haa am bana daŋngayjo.

¹⁶Mi yooftan mo to a neldi yam kilo cardi ujine ɗiɗi e teemeɗɗe joweeɗiɗi, mi jogi boo ɓiyiiko'en ɗiɗo ngam haɗgo mo tuurtugo dow amin to min njoofi mo.”

¹⁷Simon faami ɓe ngiɗi jumjugo mo, ammaa o neli ɓe ngaddana mo ceede e ɓikkoy ngam o ɗon hula taa yimɓe tuurtana mo

¹⁸e ɓe mbi'a: “Yonatan maayi ngam Simon waawaay hokkugo Tirifon ceede e ɓikkoy.”

¹⁹O hokki ɓikkoy e kilo cardi 2.700, ammaa Tirifon jumji mo, sali yoofgo Yonatan.

²⁰Ɓaawoɗon, Tirifon ummini jahaaŋgal ngam hippaago lesdi e nattingo ndi. Kaŋko e sooje'en maako fuu, ɓe mbiddi, ɓe caali gal laawol jahranŋgol haa berniwol bi'eteeŋgol Adora. Ammaa Simon, bee sooje'en mum ɗon kippo mo gal o yiɗi saalaago fuu.

²¹Nder wakkati man, yimɓe wonɓe nder taarde cuuɗi Urusaliima cemmbiɗɗi neli nelaaɓe haa Tirifon. Ɓe toro mo o wara bee ko yaawi, o hawtana ɓe gal laawol harde e o nelda ɓe ko ɓe nyaama.

²²Tirifon taaskitini wa'ooɓe pucci maako fuu ngam jahaaŋgal man, ammaa jemmaare man waabiliire bee mallimallooje toɓi, haɗi mo tokkaago ton. O tokkiri gal lesdi Galaad.

²³Nde o yotti kommbi Baskama, o mbari Yonatan e ɓe uwi mo haa ton.

²⁴Nden Tirifon lorti lesdi mum.

²⁵Simon neli yimɓe koocoya ɓanndu deerɗum Yonatan, o uwi mo haa Moodin haa wuro kaakiraaɓe maako.

²⁶Isra'iila'en fuu mboyi bee bojji naawɗi, ɓe njooɗi maayiti Yonatan balɗe ɗuuɗɗe.

²⁷Simon nyiɓi yenaande baaba muuɗum e deerɗum'en ngam haa ɗum laare diga daayiiɗum. Nyiɓaalo yenaande man yeeso e ɓaawo fuu, huuwraama bee hayre ɗiggunde.

²⁸Simon nyiɓi boo genaale misraaje joweeɗiɗi keeddiɗɗirɗe, ngam baaba maako, daada maako e deerɗiiko'en nayo.

²⁹O taarni genaale misraaje bee towɗe. O jaagni daŋraŋge man bee balmi sooje'en fuu ngam ɓe ciftora kuuɗe Makabe'en ndey fuu. Ɓe cuurɗini kommbi balmi go koommbooje ngam haa yiilotooɓe nder maaje ngi'a ɗe.

³⁰Yenaande nde Simon nyiɓi haa Moodin, haa hannde fuu nde ɗon.

³¹Wakkati man Tirifon ɗon huuwra bee faasikaare bee laamiiɗo pamaro Antiyokus, o safti o mbari mo.

³²O hooci babal maako, o meeti meetaleewol laamu Siriya maŋngo, o waɗi bononnda ɗuuɗŋga nder lesdi.

³³Simon, gal wakeere mum, nyiɓti cuuɗi Yahudiya cemmbiɗɗi, o taarni ɗi bee cuuɗi aynorɗi towɗi e mahi mawɗi, o semmbiɗini pareeje marɗe jamɗe. O sigi ton nyaamduuji.

³⁴O suɓi wakiili'en, o neli ɓe ɓe ƴama laamiiɗo Demetiriyus ɗiɗaɓo o rimɗina Yahudiya yoɓgo garaama ngam walaa ko Tirifon waɗi sey luuwgo lesdi.

³⁵Demetiriyus neldi mo jaawaabu ko yahdata bee ƴamol ngo'ol. Bataakewol ngo'ol winndaama bee boliiɗe ɗe'e:

³⁶“Laamiiɗo Demetiriyus hoofni Simon, limanjo mawɗo e soobaajo laamiiɓe, ndotti'en jama'aare e ummaatoore Yahuudu'en.

³⁷Min keɓi hufneere kaŋŋeeri e lisal gelleehi ɗum nelduɗon min caahu, min ɗon taaski waɗgo alkawal salaaman timmuŋgal bee mooɗon, min mbinndanan huuwooɓe ngomna njaafo on garaama.

³⁸Ko min ndokki on fuu, tabiti. Cuuɗi cemmbiɗɗi ɗi nyiɓɗon boo, ɗi laatano on.

³⁹Min njaafi boofi e aybeeji ko ngaɗɗon haa hannde. On ndimɗi e yoɓgo garaama laamiiɗo e dow garaama jaɓeteeka haa Urusaliima, yeeso ɗo on njoɓataa ka.

⁴⁰To woodi caka mon yiɗɓe nastugo nder sooje'en aynooɓe laamiiɗo, ɓe njaɓɓaama! Jam tabita caka men.”

⁴¹Nder hitaande 170, Isra'iila fuu rimɗinaama diga baawɗe ummaatooje heefeerɓe.

⁴²Yimɓe puɗɗi maandaago ɗereeji e alkawe bana nii: “Nder hitaande arannde nde Simon, limanjo mawɗo, mawɗo ardiiɗo sooje'en e ardiiɗo Yahuudu'en laami.”

⁴³Nder zamanu man, Simon hippi wuro Gezer. O jo'ini sooje'en haa taarde berniwol man fuu, o nyiɓi suudu aynirdu ndu ɓe cottinta e o yerɓi ndu haa les mahi wuro. O hippi aynirdu wooru e o hooci ndu.

⁴⁴Wonɓe dow aynirdu man ndiwi, caŋkiti nder berniwol, ɗum waɗi kultoreeŋgol maŋngol.

⁴⁵Yimɓe wuro mba'i dow mahi bee rewɓe e ɓikkoy, ɓe ɗonno ceeka limce maɓɓe, ɓe ɗonno mbooka, ɓe ɗonno toro Simon yaafo ɓe.

⁴⁶Ɓe ɗonno mbi'a mo: “Taa waata halleende nde min ngaɗi, yurmin min!”

⁴⁷Simon de'iti, o darni haɓre. Ammaa o farti ɓe diga berniwol, o itti labbi gonɗi calaaje maɓɓe. Nde o waɗi non, o nasti bee sooje'en maako nder Gezer bee gime yettoore.

⁴⁸O itti haa wuro ko soɓnata ngo pat, o jo'ini yimɓe tokkiiɓe Tawreeta Allah. O semmbiɗini mahi e o nyiɓi saare maako.

⁴⁹Haa Urusaliima, yimɓe wonɓe nder suudu semmbiɗŋgu kaaɗaama wurtaago ngam soodgo malla soorrugo koo ɗume nder lesdi man. Weelo torri ɓe jamum, ɗuuɗɓe nder maɓɓe maayi.

⁵⁰Ɓe tori Simon waɗa sulhu bee maɓɓe, o jaɓani ɓe. O wurtini ɓe diga suudu semmbiɗndu go, o seni babal man.

⁵¹Yahuudu'en nasti ton bee gime maŋgtooje, nyalde noogas e tataɓre nder lewru ɗiɗaɓru nder hitaande 171. Ɓe ɗon njogi lice gelleehi, ɓe ɗon ngima maŋgtooje bee moolooji e bawɗi: Konneejo mawɗo jaalaama e fartaama diga lesdi Isra'iila.

⁵²Simon umri hitaande fuu, nyalde man laato juulde. O semmbiɗini towndiire nde haykaliiru, gal wakeere suudu semmbiɗndu. kaŋko fuu o weeri ton bee sooje'en maako.

⁵³Nde ɓiyiiko Yuhanna laati suka, Simon ardini mo mooɓe sooje'en maako fuu. Yuhanna jooɗoyi haa Gezer.