Read Fulfulded 1 Makabe 14 Bible Online

1 Makabe 14 - Fulfulded bible

1 Makabe 14

¹Nder hitaande 172, laamiiɗo Demetiriyus ɗiɗaɓo mooɓti mooɓe sooje'en mum, o dilli haa Mediya. O ɗon tefa walliinde ngam o haɓa bee Tirifon.

²Nde Arsas, laamiiɗo Persiya e Mediya, nani Demetiriyus nasti lesdi maako, o neli mawɗo ardiiɗo sooje'en maako gooto bee mooɓe mum, ɓe naŋnga mo bee yoŋki.

³Mawɗo ardiiɗo go, yehi, jaali sooje'en Demetiriyus. O naŋngi laamiiɗo e o waddi mo haa Arsas, kanyum boo nastini mo daŋngay.

⁴Yahudiya jooɗi nder jam duuɓi ɗi Simon yeeɗi fuu. O tefani ummaatoore maako fuu hayru. Yahuudu'en ngerdi baawɗe e tedduŋgal ngal o heɓi.

⁵O ɓesdi nannanti maako yaake o jaɓti jipporde maayo Jaffa, ɗum walli Yahuudu'en yottaago duuɗe Yunaniŋke'en.

⁶O mawnini taƴre lesdi jama'aare maako, o tabitini laamu dow lesdi man fuu,

⁷o wartiri naŋngaaɓe ɗuuɗɓe nder konu. O jaali Gezer, Bayti-Sur e suudu Urusaliima semmbiɗndu, o itti nder maaga ko soɓnata nga fuu. Walaa dartantooɗo mo sam.

⁸Yimɓe ɗonno ndema gese muuɗum'en nder jam. Gese ɗonno ƴaamna booɗɗum e leɗɗe boo ɗon ngaɗa ɓenndalooje mum.

⁹Ndotti'en, jooɗiiɓe ɗonno ngeewta habaruuji belɗi, suka'en boo ɗonno ɓorno limce soojeeku mum bee fertaare.

¹⁰Simon hebbini haa gure fuu nguure e o hokki ɗe balmi ngam ɗe kisra. Nannanti maako yotti haa keeri duniyaaru fuu.

¹¹O tabitini jam nder lesdi fuu, seyo Isra'iila laati walaa keerol.

¹²Koo moy ɗonno jooɗi nder hoolaare les ɗowdi inabohi mum e ibbi mum, walaa mo toonyi ɓe.

¹³Hippotooɓe fuu eggi Yahudiya, laamiiɓe jananɓe fuu partaama.

¹⁴Simon walli laafuɓe jama'aare mum fuu. O waɗi no Tawreeta Allah neɗɗine e o farti Yahuudu'en heefnitiiɓe.

¹⁵O hokkiti haykaliiru daraja makka, o hebbini ndu bee kuuje korminaaɗe, cenaaɗe.

¹⁶Haa Roma e haa Separta fuu, ɓe nani maayde Yonatan, ɗum sunni ɓe jamum.

¹⁷Ammaa Separta'en keɓi habaru no deerɗiiko Simon hoosi pellel maako, laati limanjo mawɗo, ɓe nani boo no o jaali kawye fuu e berniwol Yahudiya.

¹⁸Nden ɓe mbinndani mo bataakewol dow alluhaaje jamɗe ngam hesɗitingo alkawal soobaaku ngal ɓe kaɓɓuno bee deerɗiiko'en Yahuuda e Yonatan.

¹⁹Ko winnda dow alluhaaje ɗe'e jaŋngaama yeeso kawtal yimɓe Urusaliima.

²⁰Ndaa ko winnda dow alluhaaje ɗe Separta'en neldi: “Ardiiɓe e yimɓe Separta koofni Simon, limanjo mawɗo, ɓe koofni boo ndotti'en, liman'en e jama'aare Yahuudu'en fuu.

²¹Wakiili'en ɓe on neldani min mbi'i min no on laati nanaaɓe e tedduɓe. Min ceyori wargo maɓɓe.

²²Min mbinndi ko ɓe ndawrani min nder diiwaan jama'aare amin: Numeniyus ɓii Antiyokus e Antipater ɓii Yason nelaama haa amin bana wakiili'en Yahuudu'en, ngam ɓe kesɗitina alkawal soobaaku bee amin.

²³Kawtal jama'aare laari ɗum booɗɗum jaɓɓaago yimɓe bee hormu e sigaago bataakewol boliiɗe maɓɓe haa siga ɗereeji laamu. Nii kam, Separta'en cigoto ko waɗa. Bataakewol binndaaŋgol man hokkaama boo haa Simon limanjo mawɗo.”

²⁴Yeeso seɗɗa, Simon neli Numeniyus haa Roma ngam o tabitina alkawal bee Roma'en. O yahri ndarganaawal kaŋŋeeri marŋgal saman bana kilo cardi teemeɗɗe jowi.

²⁵Nde Yahuudu'en nani kuuje ɗe'e, ɓe mbi'i: “Noy min ngaɗata haa min kolla yettoore amin haa Simon e ɓiyum'en?

²⁶Ngam o dartani konne'en non boo deerɗiiko'en e lenyol maɓɓe fuu. O honi konne'en Isra'iila e o farti ɓe. Bana nii o tabitiniri ndimu jama'aare men.” Ɓe mbinndi dow alluhaaje jamɗe, ɓe tiggi ɗe dow daŋraŋge dow hooseere Siyona.

²⁷Ndaa binndi bataakewol man: “Nyalde sappo e joweetataɓre lewru Elul, hitaande 172, hitaande laamu Simon, limanjo mawɗo, tataɓre,

²⁸mooɓtirde mawnde nde liman'en, jama'aare, ardiiɓe ummaatoore, ndotti'en lesdi, waɗi. Haa ton ɓe lornani en habaruuji ɗi'i:

²⁹Konuuji ngaɗi haa lesdi men bee tokkindirki. Nde ɗi ngaɗi fuu, Simon e deerɗum'en ɓiɓɓe Matatiyas e ruutu lenyol Yoyaribu, ndartani masiibooji ɗi'i. Ɓe tiiti konne'en ummaatoore maɓɓe ngam hisnugo haykaliiru men e Tawreeta men, ɓe ngaddani jama'aare men daraja.

³⁰Yonatan narrini ummaatoore men, o laati limanjo mawɗo hiddeko o maaya.

³¹Konne'en Isra'iila ngiɗno hippaago Yahudiya, ngam ɓe luuwa ngo e ɓe campita haykaliiru mum.

³²Nden Simon hooci ardaaŋgal, o haɓi ngam lesdi maako. O majjini ɗuuɗɗum nder jawdi maako ngam soodango sooje'en lesdi balmi e hokkugo ɓe boo ngeenaari.

³³O semmbiɗini berniiji Yahudiya e haa keerol lesdi, berniwol Bayti-Sur, haa sigordu balmi konne'en wonno. O jo'ini haa ton weerde sooje'en Yahuudu'en.

³⁴O semmbiɗini Jaffa dow sera maayo bee Gezer kommbi lesdi Asdod, ngo konne'en njogino ɓooyma. Simon jo'ini Yahuudu'en nder berniiji ɗiɗi ɗi'i e o sigi ko nafata yimɓe maaje fuu.

³⁵Jama'aare faami amaana Simon e nde laari noy o yiɗiri hokkango jama'aare maako maŋngu. Nden ɓe cuɓi mo ardiiɗo e limanjo mawɗo ngam ɓe ngetta mo dow ko o waɗani ɓe fuu, ngam adilaaku maako e kiita e yiide nde o yiɗiri lesdi maako. Simon tefi dabareeji fuu ngam mawningo jama'aare muuɗum.

³⁶Yaake ngeendam maako, o farti diga Yahudiya heefeerɓe e jooɗiiɓe haa Urusaliima nder berniwol Daawuda. Yimɓe ɓe'e mahno suudu semmbiɗndu, ɓe ngurto diga ton ngam soɓnugo ko taari haykaliiru e wonnugo senaare babal man.

³⁷Simon jo'ini sooje'en Yahuudu'en nder suudu man, o semmbiɗini ndu ngam hoolɗingo lesdi e Urusaliima. O ɓaŋgti mahi wuro man boo.

³⁸Ɓaawo kuuɗe ɗe'e fuu, laamiiɗo Demetiriyus ɗiɗaɓo jo'itini Simon limanjo mawɗo nder kuugal maako.

³⁹O hokki meetaleewol “soobaajo laamiiɗo” e o hokki mo daraja ɗuuɗka.

⁴⁰O nanino boo, Roma'en ɗon njogiri Yahuudu'en bana soobiraaɓe, wallooɓe e deerɗiraaɓe, ɓe njaɓɓino bee daraja wakiili'en ɓe Simon neli dow maɓɓe.

⁴¹Ɓe lornani Demetiriyus, Yahuudu'en e liman'en maɓɓe njaɓi ardingo Simon e ruutu mum bana ardiiɓe e liman'en mawɓe haa to annabiijo gooŋɗuɗo waŋgi.

⁴²Simon laati mawɗo ardiiɓe sooje'en, o ɗon suklani haykaliiru, kaŋko boo suɓata ardotooɓe kuuɗe, yimɓe ngomna lesdi, suklantooɓe balmi e cuuɗi cemmbiɗɗi.

⁴³Simon woni kalfinaaɗo kuuɗe haykaliiru. Sey yimɓe fuu ɗowtano mo, sey ɗereeji ngomna fuu winnde dow innde maako, o mari duŋayeere ɓornaago limce boɗeeje ɗe mooɓtirɗe, bee ɓilgo dow limce maako alaama Kaŋŋeeri.

⁴⁴Walaa goɗɗo nder jama'aare malla nder liman'en foti haɗgo anniyaaji toŋngaaɗi malla salaago umrooje Simon malla mooɓtugo yimɓe haa Yahudiya bilaa duŋayeere maako malla ɓornaago limce boɗeeje ɗe mooɓtirɗe malla ɓilgo alaama kaŋŋeeri.

⁴⁵Koo moy caliiɗo ɗowtanaago ko limta malla tefi haɗgo ko limta yahrete yeeso kiita.

⁴⁶Yimɓe fuu njaɓi Simon huuwa bana nii.

⁴⁷Simon boo, jaɓa laataago limanjo mawɗo, mawɗo ardiiɓe sooje'en, ardiiɗo jama'aare Yahuudu'en e liman'en e ardaago ummaatoore Yahuudu'en fuu.”

⁴⁸Yahuudu'en anniyi winndugo sarɗiiji ɗi'i dow alluhaaje jamɗe e jo'ingo ɗe haa daldal haykaliiru haa babal baŋguŋgal.

⁴⁹Bataakewol ngol jo'inte boo nder haykaliiru, haa nder suudu ndesaari, ngam Simon e ɓiyum'en keɓa ndaarta ngol.