Read Fulfulded 1 Makabe 16 Bible Online

1 Makabe 16 - Fulfulded bible

1 Makabe 16

¹Yuhanna ummi diga Gezer haa o yaha o maatina baaba maako Simon ko Kendebe waɗi.

²Simon ewni ɓiyum'en mawniraaɓe ɗiɗo, Yahuuda e Yuhanna, o wi'i ɓe: “Min bee deerɗam'en, bee lenyol baaba am fuu, min kaɓi bee konne'en Isra'iila diga nderkaaku amin haa hannde. Min kaɓdi, nde ɗuuɗɗum min kisni Isra'iila.

³Jonta mi naywi, ammaa onon barka Allah, on ɗon nder sukaaku. Kooce babal am e ngal deerɗam'en, ndille, kaɓane ummaatoore men, Allah wallu on!”

⁴Yuhanna mooɓti nder lesdi maɓɓe sooje'en yahooɓe bee kosɗe e wa'ooɓe pucci deydey ujine noogas, nden o dilli haɓoygo bee Kendebe. Ɓe mbaali haa Moodin.

⁵Jaŋngo maajum fajira cub, ɓe njotti yayre. Haa ton sooje'en yahooɓe bee kosɗe e wa'iiɓe pucci ɗuuɗɓe, ngari potti bee maɓɓe. Maayo ɗon caka maɓɓe.

⁶Yuhanna e yimɓe mum ndari, taaski, tiiti konne'en. O faami sooje'en maako kuli taƴtugo maayo, nden o aarti o taƴti. Nde yimɓe maako ngi'i o taƴti, ɓe tokki mo.

⁷Yuhanna sennditi sooje'en mum, o darni wa'ooɓe pucci haa caka cak sooje'en yahooɓe bee kosɗe ngam konne'en wa'iiɓe pucci ɓuranno ɗuuɗgo.

⁸Ɓe puufi algaytaaji ngam fuɗɗugo haɓre e Kendebe jaalaama bee sooje'en maako fuu. Konne'en ɗuuɗɓe maayi nder konu man e luttuɓe ndoggi, cuuɗoyi nder suudu semmbiɗndu haa Kederon.

⁹Yahuuda naawnaama nder haɓre man, ammaa deerɗiiko Yuhanna taasni dogguɓe haa Kederon, wuro ngo Kendebe nyiɓti.

¹⁰Woɗɓe cuuɗoyi nder aynorɗi kommbi Asdod, haa kaywe. Yuhanna wuli wuro man, konne'en ujine ɗiɗo mbaraama. Ɓaawoɗon, Yuhanna lorti Yahudiya o jamo kelen.

¹¹Potolome ɓii Abubos laati ardiiɗo mawɗo haa ngomna nder yayre Yeriko. O ɗon mari kaŋŋeeri e cardi ɗuuɗɗum,

¹²ngam o esiraawo Simon, limanjo mawɗo.

¹³Ɗum hokki mo eeleende ngam o laato ardiiɗo lesdi fuu. O nufi senndirgo bee Simon e ɓiyum'en bee ƴoƴre.

¹⁴Wakkati man, Simon boo ɗon sukli yiilaago gure lesdi man fuu, ngam faamgo haajeeji maɓɓe. O jippi haa Yeriko bee ɓiyiiko'en Matatiyas e Yahuuda, nder lewru sappo e go'ooru, waato lewru Cebat nder hitaande 177.

¹⁵Ɓii Abubos jaɓɓi ɓe e o weerni ɓe haa cuurel cemmbiɗŋgel bi'eteeŋgel Dok, ngel o nyiɓi. O ɗon suuɗi anniyaaji maako, o waddani ɓe nyaamdu ɗuuɗndu. Ammaa o suuɗi sooje'en nder saare man.

¹⁶Nde Simon e ɓiyum'en njari, nguyki, Potolome e yimɓe mum nasti, njaɓti balmi maɓɓe, ɓe kippoyi Simon haa suudu ndu o woni ngam nyaamgo, ɓe mbari mo kaŋko e ɓiyiiko'en ɗiɗo e woɗɓe nder tokkiiɓe mo.

¹⁷Potolome waɗi bana nii faasikaare nyiddunde, o waɗi halleende dow mbooɗeeŋga.

¹⁸Ɓaawoɗon, Potolome winndani laamiiɗo Antiyokus dow ɗum ko laati fuu. O ƴami mo boo o nelda mooɓe sooje'en ngam cemmbiɗina mo, o heɓa no o hokkira laamiiɗo gure e lesdi man.

¹⁹O neli yimɓe feere haa Gezer bee umroore mbargo Yuhanna. O winndani mawɓe ardiiɓe sooje'en ngam haa ɓe kawtana mo. O iinani ɓe kaŋŋeeri, cardi e caahuuji.

²⁰Potolome neli fahin yimɓe woɗɓe haa Urusaliima, ngam ɓe nyaama wuro man e townde nde haykaliiru.

²¹Goɗɗo feere doggi haa Gezer bee law maatini Yuhanna no baaba maako e deerɗiiko'en fuu mbaraama e o wi'i mo: “Potolome neli yimɓe ngam ɓe mbare, an boo.”

²²Habaru man sakli Yuhanna. Nde o faami ɓe ngiɗi mbargo mo, o naŋngi nelaaɓe go e o mbari ɓe.

²³Luttuɗum taariha Yuhanna, kaɓe maako, jaalorɗe maako, nyiɓaalooji mahi cemmbiɗɗi e kuuɗe maako goɗɗe fuu,

²⁴ɗum winndaama nder deftere kuuɗe limanku ɓaawo nde o roni laamu baaba maako.