Read Fulfulded 1 Makabe 2 Bible Online

1 Makabe 2 - Fulfulded bible

1 Makabe 2

¹Wakkati man limanjo saare Yoyaribu, Matatiyas ɓii Yuhanna e taaniraawo Simeyon taaski wurtaago Urusaliima haa o jooɗoya haa Moodin.

²O marno ɓikkoy njowoy: Yuhanna coometeeɗo Gaddi,

³Simeyon coometeeɗo Tassi,

⁴Yahuuda coometeeɗo Makabe,

⁵Eli'azaaru coometeeɗo Awaran e Yonatan coometeeɗo Afus.

⁶Nde o yi'i kuuɗe kalluɗe gaɗaaɗe nder Yahudiya e Urusaliima,

⁷o wi'i: “E naawɗum! Min kam mi danyaama ngam mi yi'a nattere jama'aare am e wuro am seniiŋgo na? Mi danyaama ngam mi jooɗo non, mi laara wuro am ɗon haa juuɗe konne'en amin na? Haykaliiru amin boo ɗon haa juuɗe jananɓe.

⁸Haykaliiru nanndi bee goɗɗo mo ɓe itti ɗum daraja.

⁹Kuuje gaɗanɗe tedduŋgal maaru koocaama bana ndahalaagu konu. Ɓikkoy amin pamaroy mbaraama haa babe, sukaaɓe amin, kaafaaje konne'en ndo'i ɓe.

¹⁰Heefeerɓe njaɓti min wuro, ɓe kooci ndesaari maago fuu.

¹¹Pawne fuu ittaama. Ɓooyma ngo dimo, hannde ngo maccuŋgo.

¹²Mbooɗirka babal amin ceniiŋgal ngal min mantorto laati harde non. Heefeerɓe coɓni ngal.

¹³Ko yeeɗgo haa ɗo nafata?”

¹⁴Nder suno, Matatiyas e ɓikkoy mum ceeki limce mum'en, ɓorni leppi buhuuje, ɓe mboyi ɗuuɗɗum.

¹⁵Nyannde feere, wakiili'en laamiiɗo Antiyokus, doolanɓe yimɓe ngudina Tawreeta Muusa go, ngari nder wuro Moodin haa ɓe ndoola fahin yimɓe wuro lii'aago kirseteeɗi bana no heefeerɓe ngaɗata.

¹⁶Ɗuuɗɓe nder Isra'iila'en njehi potti bee maɓɓe, ammaa Matatiyas e ɓiyum'en ndari sera.

¹⁷Nden wakiili'en laamiiɗo mbi'i Matatiyas: “A ardiiɗo mawɗo teddinaaɗo nder wuro ngo'o, a ɗon mari ballal ɓikkoy ma e lenyol ma.

¹⁸Haani boo, an aartata jonta kam wargo huuwa umrooje laamiiɗo bana no heefeerɓe kuuwri bana yimɓe wuro Yahudiya e wonɓe haa Urusaliima! Bana nii ɓiya'en e an boo, on laatoto “soobiraaɓe laamiiɗo”. Ɓe teddina on bee caahuuji ceede e kaŋŋeeri e bee dokke ɗuuɗɗe.”

¹⁹Matatiyas jaabi ɓe daande townde: “Heefeerɓe fuu poti nana umrooje laamiiɗo e ɓe cuɓa ɗowanaago umrooje maako, koo moy foti acca diina kaakiraaɓe mum.

²⁰Ammaa min, ɓikkoy am e lenyol am, min accataa tokkaago alkawal ngal Allah haɓɓi bee kaakiraaɓe amin.

²¹Mi ɗon toro Allah hokka min barka, taa min acca Tawreeta e umrooje maako!

²²Min tokkataako umrooje laamiiɗo giɗɗo min acca diina amin.”

²³Nde Matatiyas timmini wolwugo, Yahuuduujo gooto waŋgi haa yeeso yimɓe fuu lii'i kirseteeŋga maako haa hirsirde heefeerɓe nde Moodin bana no laamiiɗo umri.

²⁴Nde Matatiyas laari ɗum, o diwni daliila mettamɓeram. Tikkere ɓoociinde hippi mo, o doggi o naŋngi Yahuuduujo go, o hirsi mo dow hirsirde.

²⁵Nden man o mbari wakiiliijo laamiiɗo doolanɗo yimɓe lii'aago kirseteeɗi e o sampiti hirsirde.

²⁶Tiinaare maako nde o wirfani Tawreeta Muusa nanndi bee ko Pinehas waɗi wakkati o mbari Zimiri ɓii Salu.

²⁷Ɓaawoɗon, Matatiyas ɗon yiilo nder wuro, o ɗon wi'a bee sawtu: “Yiɗɓe Tawreeta Muusa e neɗɗinanɓe alkawal fuu ummo, tokko yam!”

²⁸Nden Matatiyas bee ɓiyiiko'en ndoggi dow kooseeje, ɓe ɗali jawle maɓɓe e ko ɓe mari fuu.

²⁹Nii non ɗuuɗɓe yiɗɓe yeeɗgo fodde Tawreeta Muusa ndilli nder ladde hamaadaare, ɓe annini jooɗaago ton,

³⁰kamɓe bee ɓikkoy maɓɓe, rewɓe maɓɓe e dabbaaji maɓɓe, ngam daliila ɓillaare hippiinde ɓe.

³¹Wakiili'en e sooje'en laamiiɗo wonɓe haa Urusaliima, wuro hamaadaare, nani yimɓe cali huuwgo umrooje laamiiɗo, ɓe ndoggi nder ladde hamaadaare haa ɓe cuuɗo.

³²Nden mooɓre sooje'en taasni ɓe, heɓtoyi ɓe e taaski hippugo ɓe nyalaade siwtorde.

³³Ɓe mbi'i ɓe: “Cuy non jonta kam, ngurte haa cuuɗiiɗon, ɗowtane umroore laamiiɗo e on kisnan ko'e mon.”

³⁴Yahuudu'en njaabi: “Min ngurtataako e min ɗowtantaako umroore laamiiɗo. Min ngewataa sarɗiwol nyalaade siwtorde.”

³⁵Ɗon e ɗon sooje'en ummini haɓre bee maɓɓe.

³⁶Ammaa Yahuudu'en cali haɓgo, ɓe cakkinaay koo kaa'el gootel dow sooje'en e ɓe cukkaay dammuɗe haa ɓe cuuɗi.

³⁷Ɓe ɗon mbi'a: “Maayden en fuu bee anniya laaɓŋga. Asama e lesdi fuu seedanto min: On ɗon mbara min bilaa hujja laaɓka.”

³⁸Nii non konne'en maɓɓe kippi ɓe nyalaade siwtorde. Ɓe fuu ɓe maayi bee rewɓe maɓɓe e ɓikkoy maɓɓe, ɓe mbari boo dabbaaji maɓɓe. Yimɓe baakin ujineere maayi.

³⁹Nde Matatiyas e sooba'en mum nani habaru maayde maɓɓe, ɓe mboyi ɗuuɗɗum.

⁴⁰Sey ɓe carwootiri caka maɓɓe: “To en ngaɗi bana deerɗiraaɓe men, en kaɓaay bee heefeerɓe ngam hisnugo yoŋki men e al'aadaaji men, jama'aare men fuu wilan e nde majjan diga lesdi.”

⁴¹Nyannde man, ɓe kooci anniya ka'a: “En konan kippuɗo en nyalaade siwtorde fuu. Bana nii en maaydataa en fuu bana deerɗiraaɓe men maayɓe nder nyukkirɗe maɓɓe.”

⁴²Nden yeɓre Hasidi'en hawtani ɓe, ɗum yimɓe anndaaɓe marɓe cuusal haa lesdi Isra'iila, gooto maɓɓe fuu ɗon dari wirfango Tawreeta Muusa.

⁴³Nii non boo, yimɓe woɗɓe dogguɓe ɓilla fuu ɗon kawtana ɓe e ɗum ɗon ɓesda semmbe maɓɓe.

⁴⁴Hawtaade ɓe ndarni mooɓre konu. Nder mettamɓeram maɓɓe, ɓe mbari Yahuudu'en accuɓe Tawreeta. Daɗɓe fuu kawtani heefeerɓe.

⁴⁵Matatiyas e sooba'en mum kippoyi koo toy fuu e campitoyi kirsirɗe heefeerɓe.

⁴⁶Ɓe njuulni bee doole derke'en ɓe ɓe tawi ɓe njuulnaaki haa lesdi Isra'iila.

⁴⁷Ɓe puɗɗi fartugo konne'en mawnitiiɓe e ɓe njaali ɓe bee koyɗum.

⁴⁸Ɓe kisni Tawreeta Muusa diga toonyaaŋge nge ummaatooje heefeerɓe e laamiiɓe maaje ngaɗi dow maaka. Ɓe nderfi laamu laamiiɗo konneejo Allah.

⁴⁹Nde wakkati maaygo Matatiyas ɓadi, o wi'i ɓikkoy maako: “Zamanu men ɗon heewi yawaare e sooynde semteende, ɗum wakkati wonnuru e caatal.

⁵⁰Ɓikkoy am, wakkati waɗi daranaago Tawreeta Muusa bee semmbe e hokkugo yoŋkiiji mon ngam alkawal ngal kaakiraaɓe men kaɓɓi bee Allah.

⁵¹Ciftore ko kaakiraaɓe men kuuwi wakkati muuɗum'en. Bee tokkaago ko ɓe ngaɗi, on keɓan tedduŋgal maŋngal e daraja nduumiika.

⁵²Ibrahiima hoolaakino Allah wakkati jarribeego na? Ooho, ngam maajum Allah annditiri mo bana adiliijo.

⁵³E non boo Yusufu, wakkati masiibooji, o tokki Tawreeta Allah e non o laati ardiiɗo mawɗo nder Misra.

⁵⁴Pinehas, kaakiraawo men, holli cuusal e o heɓi tammunde ruutu maako fuu laatoto tum liman'en Allah.

⁵⁵Yosuwa kanyum boo ɓe ngaɗi ɗum kiitoowo ardotooɗo Isra'iila ngam o yottini nelal maako.

⁵⁶Kaaleb boo heɓi lesdi halal ngam o laati ceedoowo gorɗuɗo haa yeeso kawtal Isra'iila.

⁵⁷Bee amaana maako bee Allah, Daawuda heɓi koromwal laamu, kaŋko e ruutu maako duuɓi ɗuuɗɗi.

⁵⁸Eliya holli cuusal cemmbiɗŋgal ngam Tawreeta Allah e o eeŋgaama haa asama.

⁵⁹Hananiya, Azariya e Miisayel kisnaama yiite ngam ɓe kooli Allah.

⁶⁰Daniyel hisnaama hunnduko barooɗe ngam adilaaku muuɗum.

⁶¹Nden kam, paame booɗɗum, diga yidere haa yidere nder taariha men, hooliiɓe Allah fuu keɓi walliinde.

⁶²Taa kule barriya laamiiɗo konneejo Allah ngam tedduŋgal maako laatan nyolnere, gilɗi nyaaman ɗum.

⁶³Hannde o teddinteeɗo, ammaa jaŋngo, o halkan ngam o wartan mbulwuldi e lisaafiiji maako fuu nattinte.

⁶⁴Onon ɓiɓɓe am, laate semmbiɗɓe e worɗuɓe haa daranaago Tawreeta Allah. Kaŋka tan hokkata on tedduŋgal.

⁶⁵Jonta kam, mi anndi deerɗiraawo mon Simon carwoowo booɗɗo, nane mo tum: O laatoto bana baaba mon.

⁶⁶Yahuuda Makabe, anndaaɗo ngam o mari semmbe diga nderkaaku maako, kaŋko laatoto ardiiɗo sooje'en mon e kaŋko ardoto on haa konu to on ɗon kaɓa bee konne'en mon.

⁶⁷Onon boo mooɓte les mooɗon tokkiiɓe Tawreeta e mbaatane jama'aare men.

⁶⁸Lornane jama'aaje yimɓe heefeerɓe naawɗum ko ɓe ngaɗi on e tokke umrooje Tawreeta.”

⁶⁹Matatiyas barkiɗini ɓe, nden o maayi,

⁷⁰nder hitaande 146. Ɓiyiiko'en uwi mo nder yenaande lenyol maako haa Moodin. Isra'iila fuu woyi mo ɗuuɗɗum.