Read Fulfulded 1 Makabe 3 Bible Online

1 Makabe 3 - Fulfulded bible

1 Makabe 3

¹Yahuuda, bi'eteeɗo Makabe, laati ardiiɗo haa babal baaba mum Matatiyas.

²Deerɗiiko'en fuu e yeɓre wonduɓe bee baaba maako fuu ngaddani mo walliinde mum'en e ɓe ɗon ceyi haɓango Isra'iila.

³Yahuuda mawnini tedduŋgal jama'aare muuɗum. To o ɓornake sulke maako, o ɗon nannda bee maapinndiijo. O hooci balmi, o fuɗɗi hongo, o hisni yimɓe maako bee kaafahi maako.

⁴Nder jaalorgal maako, o ɗon nanndi bee mbarooga. O ɗon wurɓo bana dabba to ɗon naŋnga ko nyaama.

⁵O tefi yimɓe wudinɓe Tawreeta e o taasni ɓe. O yahri haa yiite waɗnooɓe fitina dow jama'aare maako.

⁶Cuusal heefeerɓe majji ngam ɓe ɗon kula mo. Yimɓe waabotooɓe Tawreeta fuu anndaa ko ɓe ngaɗata. Barka Yahuuda dimɗinki jama'aare ɗon dow laawol booɗŋgol.

⁷O yarni laamiiɓe ɗuuɗɓe bone, o seyni jama'aare Isra'iila bee kuuɗe maako. Ɓe ciftoran mo e ɓe ngimdan mo haa foroy.

⁸O yiili nder gure Yahudiya e o mbardi heefeerɓe. O daaytini Isra'iila bee tikkere Allah.

⁹O laati nanaaɗo haa seɓatto duniyaaru, o mooɓti barraaɓe natteego.

¹⁰Apolloniyus mooɓti sooje'en caka heefeerɓe e woɗɓe ɗuuɗɓe iwɓe haa Samariya ngam hongo Isra'iila.

¹¹Yahuuda nani ɗum e o taaskani haɓgo bee maako. O jaali mo e o mbari mo. Ɗuuɗɓe caka konne'en mbaraama nder konu man, ɗuuɗɓe boo ndoggi.

¹²Yahuudu'en jaɓti jawle. Yahuuda hooci kaafahi Apolloniyus e o honiri bee maaki haa ragare balɗe maako.

¹³Seron, mawɗo sooje'en lesdi Siriya, heɓi habaru Yahuuda mooɓtuɗo hooliiɓe Allah e mooɓre taaskaniiɓe haɓre tum.

¹⁴Seron wi'i: “Mi laatoto nanaaɗo e teddinaaɗo nder lesdi ndi'i: Mi honoyan Yahuuda e yimɓe mum saliiɓe umrooje laamiiɗo.”

¹⁵Nden o wurti, o ɗon ardi yimɓe ɗuuɗɓe heefeerɓe yiɗɓe wallugo mo waataago Isra'iila'en.

¹⁶Nde Seron ɓadi wa'orde Bayti-Horon, Yahuuda ummini yimɓe seɗɗa dow maako.

¹⁷Nde ɓe ngi'i sooje'en Seron ɗon ngara dow maɓɓe, ɓe mbi'i Yahuuda: “Noy mbaawreten haɓgo bee mooɓre sooje'en ɗuuɗɓe ɓe'e? En famarɓe, en somɓe ngam en nyaamaay ko weeti.”

¹⁸Yahuuda jaabi ɓe: “Ɗum koyɗum, yimɓe seɗɗa njaalo ɗuuɗɓe. Haa yeeso Allah kam, jaalorgal laaranaay famɗugo malla ɗuuɗgo yimɓe.

¹⁹Haa konu boo jaalorgal laaranaay ɗuuɗgo sooje'en ammaa laarani walliinde nde Allah hokkata.

²⁰Konne'en ɗon tiito en bee mawnitaare e halleende, ɓe ngiɗi mbargo en, enen, rewɓe men, ɓikkoy men e hoosa jawle men.

²¹Enen, en ɗon kaɓa ngam yoŋkiiji men e ngam al'aadaaji men.

²²Allah nattinan konne'en men yeeso men, taa kule ɓe.”

²³Nde Yahuuda timmini wolwugo, o hippi bee juhuki sooje'en Seron. Ɓe njaali ɓe,

²⁴yimɓe Yahuuda taasni ɓe diga diirtorde Bayti-Horon haa yotti yayre. Ɓe mbari baakin teemeɗɗe joweetati, woɗɓe boo ndoggi haa lesdi Filisti'en.

²⁵Diga nden yimɓe puɗɗi hulgo Yahuuda e deerɗum'en. Ummaatooje keedduɗe bee maako ɗon kultora.

²⁶Manoore Yahuuda yotti laamiiɗo Antiyokus e haa koo toy fuu yimɓe heefeerɓe ɗon mbolwa dow jaalorɗe maako.

²⁷Nde laamiiɗo Antiyokus nani ko ɓe ngeewtata, o laati bana ginnaaɗo, o ɓerni. O umri ɓe mooɓta mooɓe sooje'en lesdi maako fuu.

²⁸O yoɓi sooje'en man ngeenaari deydey hitaande. Ceede ɗe'e, nder siga maako o wurtini ɗe. O umri ɓe laato taaskiiɓe wakkati fuu.

²⁹Ɓaawoɗon, o faami o walaa ko siisi haa siga maako. Daliila aybe maako, ko garaama nastinta haa lesdi maako famɗiti: Fakat, kaŋko fooɗi fitina e masiibooji nder lesdi man bee ittugo al'aadaaji ɓooymaaji.

³⁰Antiyokus woowno hokkugo caahuuji ceede e halkugo ɗe, walaa laamiiɗo fuu foondete bee maako. O hultori taa o waawa waɗgo bana nii fahin

³¹e ɗum sukli mo. O annini dillugo lesdi Persiya haa o yoɓna garaama haa nder gure maako e o mooɓta ceede ɗuuɗɗe.

³²O halfini Lisiyas, goɗɗo tedduɗo “caka saaro'en laamiiɗo” ardaaŋgal kuugal laamu maako hakkunde maayo Efratis e keeri Misra.

³³O halfini mo fahin aynugo ɓiyiiko Antiyokus hiddeko o warta.

³⁴O ɗalani mo reeta mooɓre sooje'en maako bee nyiibi ɗi haɓre, o hokki mo umrooje no o huuwrata ko o wi'i mo, sakkomaa ko laarani yimɓe Yahudiya e Urusaliima:

³⁵Lisiyas yahranno sooje'en hippooɓe haa ɓe nama, ɓe ɗiggina Isra'iila e mbila ko lutti haa Urusaliima, ɓe mbila ko siftorta joonde maɓɓe haa pellel man.

³⁶O jo'inan koo toy fuu jananɓe, o senndana ɓe gese.

³⁷Laamiiɗo hooci reeta mooɓre sooje'en, o dillidi Antakiya, laamorde laamu maako nder hitaande 147. Ɓaawo o taƴti maayo Efratis, o saali gal woyla lesdi maako.

³⁸Lisiyas suɓi caka sooba'en laamiiɗo, yimɓe tato tedduɓe: Potolome ɓii Dorimen, Nikanor e Gorgiyas.

³⁹O halfini ɓe yimɓe ujine cappanɗe nayo e wa'ooɓe pucci ujine joweeɗiɗo, o yerɓi ɓe nder lesdi Yahudiya, ngam ɓe kona ɓe bana no laamiiɗo umri.

⁴⁰Ardiiɓe tato go ndilli bee mooɓre sooje'en muuɗum'en. Nde ɓe njotti yayre ɓadiinde Emmawus, ɓe caŋngini ton.

⁴¹Filooɓe wuro man keɓi habaru man, ɓe mooɓti ceede e kaŋŋeeri ɗuuɗɗum, bee callalluuji, ɓe njehi haa Isra'iila'en caŋngini bee tammunde soodugo ɓe bana maccuɓe. Mooɓre hippuɓe ɓesditi bee sooje'en lesdi Idume e lesdi Filisti'en.

⁴²Yahuuda e deerɗum'en paami haala ka ɗon tullita ngam sooje'en konne'en caŋngini dow lesdi Isra'iila. Ɓe keɓi habaru no laamiiɗo hokki duŋayeere ɓe mbarda jama'aare maɓɓe fuu.

⁴³Ɓe mbi'mbi'tiri caka maɓɓe: “Kisnen jama'aare men nattineego, kaɓanen nde e kaɓanen haykaliiru seniindu.”

⁴⁴Nden kawtal jama'aare hawti ngam taaskanaago konu ngam toraago Allah e ƴamgo enɗam e mbooɗeeŋga maako.

⁴⁵Urusaliima laaɓi bana ladde hamaadaare, walaa goɗɗo ɗon nasta malla ɗon wurto ngol. Haykaliiru soɓaama, jananɓe laatini suudu semmbiɗndu weerde heefeerɓe. Seyo eggi yimɓe Isra'iila, sawtu algayta e geegeeru majji.

⁴⁶Yahuudu'en mooɓti, ɓe ndilli haa wuro Mispa tiitotirŋgo bee Urusaliima, ngam ɓooyma jama'aare Isra'iila marno babal do'a ton.

⁴⁷Nyannde man, ɓe cuumi, ɓe ndufi ndoondi dow ko'e maɓɓe, ɓe ceeki limce maɓɓe e ɓe ɓorni leppi buhuuje.

⁴⁸Ɓe taggiti deftere Tawreeta haa ɓe ngaɗa sawari maare, naa bana heefeerɓe ƴamanɓe laabi mum ngaɗata.

⁴⁹Ɓe ngaddi limce liman'en, ƴaamle gese aartuɗe, zakka ƴaamle maɓɓe. Ɓe mooɓti Nasiri'en timminɓe wakkatiire muuɗum'en seniinde deydey togayeeje muuɗum'en.

⁵⁰Ɓe tori Jawmiraawo bee sawtu, ɓe mbi'i: “Ɗume min ngaɗata bee dokke ɗe'e e toy min njahrata yimɓe ɓe'e?

⁵¹Haykaliiru ma seniindu yaaɓaama e soɓaama. Liman'en ma ɗon nder maayiti e toskaare.

⁵²Heefeerɓe mooɓtake ngam wilgo min. An a anndi ko ɓe nufi waɗgo min.

⁵³Noy min kaɓrata bee maɓɓe to a wallaay min?”

⁵⁴Ɓe puufi algayta e ɓe ngaɗi ilinaali ɗuuɗɗi.

⁵⁵Nden Yahuuda suɓi ardiiɓe jama'aare, darni ɓe dow geɓe yimɓe ujineere, teemerre, cappanɗe jowi e yimɓe sappo boo.

⁵⁶Fodde Tawreeta, o lorni nyiɓanɓe cuuɗi mum'en, ɓaŋgɓe kesum malla jubanɓe ngesa inabohi malla hulɓe.

⁵⁷Nden mooɓre Isra'iila'en ummi, dilli haa ɓe njehi ɓe caŋngini haa fombina Emmawus.

⁵⁸Yahuuda wi'i ɓe: “Taaskitine balmi mon e mare cuusal. Taaskitane haɓgo jaŋngo bee heefeerɓe mooɓtiiɓe haa nattina en e mbila haykaliiru men.

⁵⁹Ndikkana en maaygo nder haɓre dow laargo masiibooji ukkanɗi dow jama'aare men e haykaliiru men.

⁶⁰Ko Jawmiraawo yiɗi fuu o waɗan ɗum.”