Read Fulfulded 1 Makabe 4 Bible Online

1 Makabe 4 - Fulfulded bible

1 Makabe 4

¹Gorgiyas hooci yimɓe ujine njowo e wa'ooɓe pucci ujineere. Mooɓre nde'e wurti bee jemma

²ngam hippugo Yahuudu'en bee juhuki e jaalaago ɓe. Yimɓe wonɓe haa Urusaliima ɗon ardi ɓe.

³Yahuuda heɓi habaru man, dilli bee sooje'en maako suusɓe, o yiɗi jaalaago sooje'en laamiiɗo haa Emmawus

⁴wakkati Gorgiyas e mooɓre mum ɗon ndaayi bee saŋngeere.

⁵Gal wakeere maako boo, Gorgiyas bee yimɓe mum, njotti saŋngeere Yahuuda bee jemma, ɓe tawaay koo goɗɗo. Ɓe tammi Yahuudu'en ndoggi yeeso maɓɓe, nden ɓe mbi'i ɓe taasna ɓe nder hooseere.

⁶Nde fajira weeti, Yahuuda waŋgi nder yayre bee yimɓe ujine tato. Ammaa ɓe ngalaa culke e kaafaaje ɗe ɓe ngiɗi.

⁷Ɓe eewi mooɓre sooje'en heefeerɓe ɗon ɓorni culke, pucci ɗon taari ɓe, ɓe mboowi waɗgo konu.

⁸Yahuuda wi'i yimɓe mum: “Taa kule ɗuuɗeeŋga sooje'en e taa kultore to ɓe ukkanake en.

⁹Ciftore noy kaakiraaɓe men kisna haa maayo Maaliya yaake Firawna e sooje'en mum ɗon tokki ɓe.

¹⁰Jonta kam toroɗen Allah o hokka en jaalorgal, o siftora alkawal ngal o haɓɓi bee kaakiraaɓe men, o ɗiggina hannde boo sooje'en wonɓe yeeso meeɗen.

¹¹Ummaatooje heefeerɓe fuu paaman woodi dimɗinoowo e kisnoowo Isra'iila.”

¹²Nde konne'en eewi Yahuudu'en ɗon ngara dow maɓɓe,

¹³ɓe ngurti diga saŋngeere maɓɓe haa ɓe kaɓa bee maɓɓe. Yimɓe Yahuuda puufi algayta

¹⁴e ɓe kippi ɓe. Heefeerɓe partaama, ɓe ndoggi gal yayre.

¹⁵Sakitiiɓe fuu mbaraama. Yahuudu'en taasni konne'en haa Gezer, haa nder yayre Idume, haa Asdod e Jamniya. Ɓe mbari baakin ujine tato.

¹⁶Nde Yahuuda wartoyi bee sooje'en mum,

¹⁷o wi'i yimɓe maako: “Taa cuunen ndahalaagu, ndikka tokkitinen konu.

¹⁸Gorgiyas e mooɓre mum ɗon nder hooseere kommbi men. Taaskite booɗɗum dow konne'en men e kone ɓe. Ɓaawo man, on poti mooɓtugo ndahalaagu bee hoolɗinaare.”

¹⁹Yahuuda timminaay wolde mum, ɓe ndaari ko yeɓre sooje'en aynanɓe waɗata dow hooseere.

²⁰Ɓe paami sooje'en maɓɓe partaama e saŋngeere maɓɓe ɗonno wula: Cuurka ndilluka dow holli ɗum laaɓɗum.

²¹Bee laargo ɗum, ɓe kultori jamum. Nde ɓe ndaari haa yayre sooje'en Yahuuda ɗon taaskitani haɓre,

²²ɓe ndoggi ɓe fuu haa lesdi Filisti'en.

²³Yahuuda lorti nder saŋngeere konne'en ngam ɓoftugo jawle. Yahuudu'en kooci kaŋŋeeri ɗuuɗndi, ceede, limce bee riskuuji goɗɗi.

²⁴Ɓe kuuci ɓe ɗon ngetta Jawmiraawo. Ɓe ɗonno ngima: “O booɗɗo e yiide maako timmataa.”

²⁵Ɗum laati nyannde dimɗineeki ngam Isra'iila.

²⁶Sooje'en jananɓe doggunooɓe njehi maatini Lisiyas ko waɗi fuu.

²⁷Nde o nani habaru man, o sakli, jokke maako mbaati. Fakat, konu bee Isra'iila'en yahaay bana o yiɗno e ragare konu man yahdaay bee ko laamiiɗo umrino.

²⁸Marɗo balɗe, Lisiyas mooɓti sooje'en maako suɓaaɓe ujine cappanɗe njoweego e wa'ooɓe pucci ujine njowo ngam haɓgo bee Yahuudu'en.

²⁹Ɓe ndilli haa Idume, ɓe caŋngini haa Bayti-Sur. Yahuuda yehi fotti bee maɓɓe bee yimɓe ujine sappo.

³⁰Nde o yi'i sooje'en heefeerɓe semmbiɗɓe, o waɗi tornde nde'e: “A yettaama kisnoowo Isra'iila! An, bee juŋngo jagganiiɗo ma Daawuda yewno hippannde Goliyat. An hokki sooje'en Filisti'en haa juŋngo Yonatan ɓii Sawulu e haa jagganiiɗo pamaro jogotooɗo balmi maako.

³¹Jaal bana nii sooje'en konne'en laamu Isra'iila, jama'aare maaɗa. Semtin ɓe, toskin ɓe, koo ngam ɓe ɗon mari sooje'en e pucci ɗuuɗɗi.

³²Hebbin ɓe kulol, yew hoolaare nde ɓe koolori semmbe maɓɓe. Waɗ ɓe ndiwna to ɓe numi ɓe jaalotooɓe.

³³Waɗ ɓe maaya bee kaafaaje yiɗɓe ma haa annduɓe innde ma, maŋgta ma bee gime maŋgtooje.”

³⁴Mooɓe sooje'en ɗiɗi go tiitotiri nder haɓre, Yahuudu'en mbari ko dillani sooje'en Lisiyas ujine njowo.

³⁵Lisiyas laati ceedoowo dow jaaleeki mooɓre maako, o annditi cuusal sooje'en Yahuuda, taaskaniiɓe yeeɗgo e maaygo. Sey o lorti haa Antakiya, o yoɓi sooje'en jananɓe ngam o yaha o hippa lesdi Yahudiya fahin bee sooje'en ɓurɓe naane.

³⁶Nden Yahuuda e deerɗum'en mbi'i: “Nde konne'en men fuu njaalaama, ndillen Urusaliima haa cenen haykaliiru haa wartana Allah fahin.”

³⁷Sooje'en fuu mooɓti, mba'i hooseere Siyona.

³⁸Ɓe ndaari walaa koo goɗɗo nder haykaliiru, hirsirde soɓaama e dammuɗe ngulaama. Leɗɗe pamare ɗon puɗa haa daldal maaru bana nder ladde malla dow kooseeje, cuuɗi maaru fuu mbonni.

³⁹Nden ɓe ceeki limce maɓɓe, ɓe mboyi ɗuuɗɗum e ɓe ndufi ndoondi dow ko'e maɓɓe.

⁴⁰Ɓe turi haa geese maɓɓe meemi lesdi e nde algayta fuufi, ɓe kolli Allah bojji maɓɓe.

⁴¹Ɓaawoɗon, Yahuuda umri sooje'en woɗɓe kippo aynooɓe mahi taariiɗi berniwol yaake o ɗon suklani sengo haykaliiru.

⁴²O suɓti liman'en ɓe ngalaa feloore e tokkiiɓe Tawreeta Muusa.

⁴³Ɓe ceni haykaliiru e ɓe njahri kaa'e coɓɗe haa babal coɓŋgal.

⁴⁴Ɓe ɗon ƴamƴamtira noy ɓe ngaɗata bee hirsirde soɓnde nde heefeerɓe coɓni.

⁴⁵Ɓe keɓi sawari ɓe pusa nde, ngam taa coɓɗum waylito semtina ɓe. Ɓe campiti nde

⁴⁶e ɓe kooci kaa'e maare, ɓe njo'ini haa babal kaanduŋgal dow townde haykaliiru. Kaa'e man njooɗo ton hiddeko annabiijo garanɗo wi'a ko ɓe ngaɗata bee maaje.

⁴⁷Ɓe kooci kaa'e ɗe cehaaka bana no Tawreeta wi'i, ɓe ngaɗi hirsirde hesre nanndunde bee hiinde.

⁴⁸Ɓe mbo'itini haykaliiru, ɓe pawni nder maaru, ɓe ceni daldal maaru.

⁴⁹Ɓe tappi kuuje kuuwtinirɗe ceniiɗe e ɓe njo'ini nder haykaliiru pittirlaaji, hirsirde uurle e taabal tamseeje lii'anaaɗe Allah.

⁵⁰Ɓe nguli tame uurɗe dow hirsirde. Ɓe kuɓɓi pittirlaaji dow jo'inirɗe maaji ngam ɗi njayna haykaliiru.

⁵¹Ɓe njo'ini tamseeje dow taabal, ɓe pooɗi laabule e ɓe timmini kuuɗe ɗe ɓe puɗɗino.

⁵²Nyannde noogas e jowaɓre nder lewru joweenayaɓru, waato lewru Kislew nder hitaande 148, Yahuudu'en ummi fajira cub,

⁵³bana no Tawreeta Muusa umri, ɓe lii'i kirseteeɗi maɓɓe dow hirsirde hesre nde ɓe nyiɓi.

⁵⁴Deydey wakkati heefeerɓe coɓni hirsirde, nden man hirsirde hesre senaama bee gime, geegeeji, gommbe e bawɗi.

⁵⁵Yimɓe jama'aare fuu turi haa geese maɓɓe meemi lesdi ngam sujidaago. Ɓe ngetti Allah dokkuɗo ɓe jaalorgal.

⁵⁶Ɓe ceyi deydey balɗe joweetati dow sengo hirsirde hesre. Hoolaaɓe lii'i kirseteeɗi, kirseteeɗi ɗi kawtal Allah bee yimɓe e ɗi yettoore bee seyo maŋngo.

⁵⁷Ɓe pawni dammugal haykaliiru bee meetaleeji kaŋŋeeri e ndarganaahon, ɓe mbo'itini nastirɗe e cuuɗi, ɓe ngaati pareeje boo.

⁵⁸Seyo maŋngo saŋkiti nder jama'aare, ngam ɓe itti cemtuɗum ɗum heefeerɓe ukkani ɓe.

⁵⁹Yahuuda, deerɗum'en e kawtal Isra'iila fuu kaɓɓi anniya waɗgo juulde maajum nder seyo maŋngo hitaande fuu, haa wakkati man, diga nyalde noogas e jowi lewru Kislew, juulde nde'e duuran deydey balɗe joweetati.

⁶⁰Ɓe nyiɓi haa wakkati man kommbi hooseere Siyona, mahi towɗi e aynorɗi dow mahol, ngam haɗgo heefeerɓe wargo soɓna babe man fahin.

⁶¹Yahuuda jo'ini yeɓre sooje'en ngam aynugo haykaliiru. O nyiɓi mahi towɗi haa wuro Bayti-Sur ngam jama'aare Isra'iila wona nder hoolɗinaare to Idume'en tiitake ɓe.