Read Fulfulded 1 Makabe 5 Bible Online

1 Makabe 5 - Fulfulded bible

1 Makabe 5

¹Ummaatooje keedduɗe keɓi habaru no Yahuudu'en nyiɓti hirsirde e kesɗitini haykaliiru bana ɗum wa'no naane. Ɗum mettini ɓe ɓerɗe.

²Ɓe anniyi nattingo Isra'iila'en wonɓe caka maɓɓe. Nden ɓe puɗɗi mbargo yimɓe jama'aare men.

³Idume'en ngaɗno faddorde dow Isra'iila. Yahuuda yehi hongo ɓe haa Akarabaten, o torri ɓe jamum. O farti ɓe, o luuwi jawle maɓɓe.

⁴Ɓaawoɗon, Yahuuda nufi torrugo asŋgol Baya ngam bononndaaji mum: Ɓe ɗonno paso Isra'iila'en dow laabi, ɓe ɗonno ngaɗa faddorde naŋngugo ɓe nder tuufnorgol.

⁵Yahuuda farti yimɓe Baya nder wuro maɓɓe marŋgo mahi towɗi, o taari ɓe. O huni o mbardan ɓe, o wuli wuro e wonɓe nder maago.

⁶Ɓaawoɗon, o tiiti wuro Ammoni'en. Ton o fottotiri bee sooje'en ɗuuɗɓe e semmbiɗɓe, Timote ardini ɓe.

⁷O waɗi bee maɓɓe kaɓe ɗuuɗɓe, o jaali ɓe, o ɗiggini ɓe.

⁸O jaɓti wuro Yazer e gure keedduɗe, nden o lorti Yahudiya.

⁹Heefeerɓe wonɓe haa Galaad kawti dow Isra'iila'en wonɓe nder lesdi maɓɓe, ngam haa ɓe mbara ɓe. Ammaa Isra'iila'en ndoggi haa suudu semmbiɗndu haa Datema.

¹⁰Ɓe neldi bataakewol dow Yahuuda e deerɗum'en: “Heefeerɓe taariiɓe min kawti ngam mbargo min.

¹¹Mooɓre sooje'en maɓɓe ɓe Timote ardani ɗon taasko hippugo min e jaɓtugo suudu semmbiɗndu haa min cuuɗi.

¹²Ngare hisnugo min. Ɗuuɗɓe caka amin mbaraama.

¹³Wonɓeno haa wuro Tubi fuu maaydi. Ɓe naŋngi rewɓe maɓɓe e ɓikkoy maɓɓe, ɓe laatini ɓe horɓe e maccuɓe, ɓe kooci jawle maɓɓe boo. Worɓe ko dillani ujineere fuu maayi.”

¹⁴Yahuuda e deerɗum'en timminaay maa jaŋngugo bataakewol ngo'ol, nelaaɓe feere ngari diga Galiili. Limce maɓɓe ɗon ceeki, ɗum alaama mettamɓeram, ɓe ngaddi kubaruuji nannduɗi.

¹⁵Ndaa ko ɓe mbi'ata: “Heefeerɓe wonɓe haa Potolemayis, Tir, Sidon e wonɓe haa Galiili haa jananɓe ngoni, kawti ngam mbargo min.”

¹⁶Nde Yahuuda e jama'aare nani habaruuji ɗi'i, ɓe ngaɗi mooɓtorde mawnde. Ɓe carwootiri dow ko ɓe ngaɗata haa ɓe mballa deerɗiraaɓe Yahuudu'en wonɓe nder ɓillaare ngam heefeerɓe kippi ɓe.

¹⁷Yahuuda wi'i deerɗum Simon: “Suɓ yimɓe no he'ete, yah hisnu deerɗiraaɓe men Yahuudu'en haa Galiili. Min bee Yonatan, deerɗiraawo men, min ndillan haa lesdi Galaad.”

¹⁸Yahuuda ɗali Yusufu ɓii Zakariya e Azariya, ardiiɓe jama'aare, ngam wirfango Yahudiya bee sooje'en luttuɓe.

¹⁹O hokki ɓe umroore nde'e: “Arde jama'aare, taa naste konu bee heefeerɓe hiddeko min ngarta.”

²⁰Yimɓe ujine tato tokki Simon, njehi gal Galiili e ujine njoweetato boo tokki Yahuuda haa lesdi Galaad.

²¹Nde o yotti Galiili, Simon waɗi konu ɗuuɗŋgu bee heefeerɓe. O jaali ɓe, o farti ɓe,

²²o taasni ɓe haa dammuɗe wuro Potolemayis. Isra'iila'en mbari baakin yimɓe ujine tato caka heefeerɓe, ɓe njaɓti balmi maɓɓe boo.

²³Simon mooɓti ɓaawoɗon, Yahuudu'en wonɓe haa Galiili e haa Arbatta, bee rewɓe maɓɓe e ɓikkoy maɓɓe e ko ɓe mari fuu. Bee seyo maŋngo, o yahri ɓe haa Yahudiya.

²⁴Wakkati man, Yahuuda Makabe e deerɗum Yonatan taƴtino maayo Urdun e ɓe njehi deydey nyalɗe tati haa nder lesdi ndi perwundi.

²⁵Ɓaawo man, ɓe potti bee Nabate'en, kamɓe boo ɓe njaɓɓi ɓe nder numo marŋgo salaaman, ɓe limtani ɓe ko heɓi Isra'iila'en haa lesdi Galaad.

²⁶Ɓe mbi'i ɓe ɗuuɗɓe nder Isra'iila'en naŋngaama bana maccuɓe nder gure mawɗe: Bosra, Bosor, Alema, Casfo, Maked e Karnayim.

²⁷Naŋngaaɓe woɗɓe ɗonno nder gure feere haa lesdi Galaad. Ɓe mbi'i no konne'en ɗon taaski ngam hippaago cuuɗi Yahuudu'en cemmbiɗɗi jaŋngo, ɓe njaɓta ɗi e ɓe mbara nyannde man wonɓe nder maaji.

²⁸Non e non, Yahuuda e sooje'en mum cannji laawol e ɓe ndilli Bosra gal laawol ladde hamaadaare. Ɓe njaɓti wuro man: Ɓe luuwi ngo, ɓe nguli ngo, ɓaawo ɓe mbari worɓe wuro man fuu.

²⁹Ɓe ndilli ton bee jemma, ɓe njehi haa ɓe njotti suudu Yahuudu'en semmbiɗndu haa Datema.

³⁰Subaha, ɓe eewi sooje'en ɗuuɗɓe ɗon ɓaŋgta ɓaarle e ɓe ɗon njahra kuuje konu haa ɓe njaɓta suudu Yahuudu'en man. Ɓe puɗɗi hippaago.

³¹Yahuuda laari haɓre fuɗɗi, o nani haraka, sawtu algayta e gookaali haɓre ɗon iwa diga suudu man haa yotti asama.

³²Nden o wi'i sooje'en maako: “Kone hannde ngam hisnugo deerɗiraaɓe men Isra'iila'en.”

³³O sennditi sooje'en maako geɓe tati, o yerɓi ɓe ɓe kippo sooje'en heefeerɓe gal ɓaawo. Ɓe puufi algayta e ɓe tori bee semmbe.

³⁴Nde sooje'en Timote ngi'i Yahuuda Makabe ɗon hona ɓe, ɓe ndoggi. Yahuuda jaali ɓe jaaleeki naawki: Nyannde man konne'en baakin ujine njoweetato mbaraama.

³⁵Ɓaawoɗon Yahuuda yahri sooje'en maako gal Alema. Ɓe kippi wuro man e ɓe njaɓti ngo: Ɓe luuwi ngo, ɓe nguli ngo, ɓaawo ɓe mbari worɓe wuro man fuu.

³⁶Nden, ɓe njehi ɓe njaɓti Casfo, Maked, Bosor e gure goɗɗe nder lesdi Galaad.

³⁷Ɓaawo maajum Timote mooɓti sooje'en woɗɓe, o wari o saŋngini yeeso Rafon, gaɗa maayo.

³⁸Yahuuda neli yimɓe njaha njurno ko konne'en annini waɗgo haa saŋngeere maɓɓe, yimɓe man mbi'i: “Heefeerɓe taariiɓe en fuu kawti sooje'en ɗuuɗɓe dow ardaaŋgal Timote.

³⁹Ɓe coodi sooje'en Arab'en haa mballa ɓe. Ɓe caŋngini gaɗa maayo, ɓe ɗon taaskitani haɓre.” Nden Yahuuda e sooje'en mum ummi, ndilli ngam hippaago ɓe

⁴⁰haa ɓadi maayo. Nden Timote wi'i wakiili'en maako: “To Yahuuda aarti taƴti maayo haa o hippo en, en mbaawataa haɓgo bee maako, o jaaloto en fakat.

⁴¹Ammaa to o hultori, o darake gal gaɗa maayo, en taƴtoto ngam hippaago mo, nii kam en njaaloto mo.”

⁴²Nde Yahuuda yotti daande maayo, o darni wakiili'en maako haa fomoonde maayo e o umri ɓe: “Taa ɗale koo goɗɗo daro, sey en fuu en njaha haɓre.”

⁴³Yahuuda aarti taƴti, sooje'en maako fuu tokki mo, ɓe puɗɗi haɓre. Heefeerɓe ɗon lortilortino, cakkini balmi mum'en, ndoggi haa hirsirde wuro Karnayim.

⁴⁴Yahuuda e sooje'en mum njaɓti wuro man, ɓe nguli babal ceniiŋgal bee wonɓe ton fuu. Ɗum laati ragare Karnayim e diga yaake maajum heefeerɓe maraay baawɗe haɓtaago Yahuuda.

⁴⁵Ɓaawoɗon Yahuuda mooɓti Isra'iila'en wonɓe haa lesdi Galaad fuu haa o hoora ɓe haa Yahudiya. O dillidi bee maɓɓe fuu, koo gooto o ɗalaay, diga rewɓe maɓɓe, ɓikkoy maɓɓe e jawle maɓɓe: Ɗum mooɓre ɗuuɗnde.

⁴⁶Ɓe njotti Efruuna, wuro maŋngo, semmbiɗŋgo, jooɗiiŋgo dow laawol maɓɓe. Ɓe keɓataa wakkaago ngo koo gal nano, koo gal nyaamo, doole sey ɓe caalo gal wuro man.

⁴⁷Ammaa yimɓe Efruuna kaɗi ɓe nastugo, ɓe cukki dammuɗe wuro man bee kaa'e.

⁴⁸Yahuuda neldi ɓe bataakewol jamwol, o wi'i ɓe: “Min ngiɗi taƴtugo wuro mon haa min kuuca lesdi amin. Walaa gooto caka amin toonyoto on, min caaloto, min tokko laawol.” Ammaa yimɓe wuro man cali maɓɓititgo dammuɗe.

⁴⁹Yahuuda umri caffuuji yimɓe, taa koo moy sotta haa woni.

⁵⁰Sooje'en taaskitani haɓre. Ɓe koni jemma e naaŋge fuu, haa ragare man, ɓe njaɓti wuro man.

⁵¹Ɓe luuwi ngo, ɓe nami ngo fuu, ɓaawo ɓe mbari worɓe wonɓe nder wuro man fuu. Isra'iila'en taƴti nder wuro man, ɓe ɗon njaaɓa dow maayɓe.

⁵²Ɓe taƴti maayo Urdun haa ɓe njotti yayre mawnde tiitotirnde Bayti-Se'an.

⁵³Yahuuda mooɓti sakitiiɓe haa ɓaawo, o ɗon suusɗina yimɓe man haa ɓe njotti Yahudiya.

⁵⁴Ɓe mba'i hooseere Siyona bee seyo e welwelo. Ɓe lii'ani Allah guleteeɗi ngam walaa gooto mbaraaɗo caka maɓɓe, ɓe ngarti jam salaaman.

⁵⁵Wakkati Yahuuda e Yonatan ɗon nder lesdi Galaad e deerɗiraawo maɓɓe Simon ɗon yeeso Potolome haa lesdi Galiili,

⁵⁶Yusufu ɓii Zakariya e Azariya, ardiiɓe mooɓre Yahudiya keɓi habaru jaalorgal maɓɓe nder haɓre.

⁵⁷Ɓe carwootiri, ɓe mbi'i: “Enen boo, ngaɗen no ɓe manira innde men. Ndillen konen heefeerɓe taariiɓe en.”

⁵⁸Ɓe umri mooɓe sooje'en ɗe ɓe kalfini ɓe, ɓe ndilli hippaago Jamniya.

⁵⁹Gorgiyas e sooje'en mum ngurti wuro ngam honugo ɓe.

⁶⁰Ɓe njaali mooɓe sooje'en Yusufu e Azariya go, ɓe parti ɓe haa ɓe njottini ɓe keerol Yahudiya. Ko dillani Isra'iila'en ujine ɗiɗo mbaraama nyannde man.

⁶¹Jama'aare yiidi bee jaaleeki makki ngam Yusufu e Azariya nananaay Yahuuda e deerɗum'en: Ɓe ɗonno tammi ɓe keɓanno jaalorgal kamɓe boo.

⁶²Ɓe anndaa ɓe limaaka nder yimɓe ɓe Allah hokki baawɗe hisnugo Isra'iila.

⁶³Yahuuda gorɗuɗo e deerɗum'en ɗon ndaare bana yimɓe tedduɓe nder Isra'iila e nder lesɗe heefeerɓe ɗe nani innde maɓɓe.

⁶⁴Yimɓe ɗon njaawa ngam yettugo ɓe.

⁶⁵Yahuuda bee deerɗum'en lorti konu dow Edoomi'en gal fombina. Ɓe njaɓtoyi Heburuun e gure keedduɗe e mum, ɓe pusi mahi cemmbiɗɗi ɗi wuro man, ɓe nguli cuuɗi aynorɗi taariiɗi wuro man.

⁶⁶Ɓe ndilli ɓaawo man gal lesdi Filisti'en, ɓe taƴti wuro Maresa.

⁶⁷Nyannde man liman'en ɗuuɗɓe mbaraama nder haɓre man, ɓe ngiɗno waɗgo kuuje mawɗe, ɓe nasti nder haɓre man bee cuusal ammaa bee jaawal boo.

⁶⁸Yahuuda dilli fahin gal Asdod, nder lesdi Filisti'en. O fusi kirsirɗe maɓɓe, o wuli labbi maɓɓe, o luuwi gure man. Nden o lorti Yahudiya.