Read Fulfulded 1 Makabe 6 Bible Online

1 Makabe 6 - Fulfulded bible

1 Makabe 6

¹Wakkati laamiiɗo Antiyokus ɗon taƴta lesdi towndi, o heɓi habaru no woodi haa lesdi Persiya wuro wi'eteeŋgo Elimayis, nanaaŋgo daliila riskuuji e cardi e kaŋŋeeri maago.

²Haykaliiru maago marno jawle ɗuuɗɗe. Nder maaru, woodi sulkeeji kaŋŋeeri, ndarganaaje e balmi ɗum Zuulgarnayni ɓii Filip laamiiɗo Makedoniya aartuɗo laamaago dow Yunaniya ɗali.

³Antiyokus yehi haa Elimayis go, tefi nyaamgo ngo ngam o luuwa ngo, ammaa o heɓaay jaalorgal dow maago. Ngam yimɓe wuro man keɓi habaru anniyaaji laamiiɗo man.

⁴Ɓe kaɓti mo e ɓe njaali mo, o dilli o toskaaɗo masin, o lori Baabila.

⁵Nden man nelaaɗo maako diga Persiya haa maatina mo no mooɓre nde o neli haa Yahudiya jaalaama.

⁶Lisiyas yahduno bee mooɓre semmbiɗnde, ammaa Yahuudu'en parti ɓe, caŋkiti ɓe. Ɓaawo ɓe campiti mooɓre laamiiɗo, Yahuudu'en njaɓti balmi maɓɓe, kuuje konu e jawle, ɗum fuu ɗum ɓesdani ɓe semmbe.

⁷Ɓe nattini “kuuŋga nyidduŋga” nga laamiiɗo nyiɓi dow hirsirde seniinde haa Urusaliima, ɓe taari haykaliiru bee mahi towɗi bana ɓooyma e ɓe cemmbiɗini bana non boo Bayti-Sur, wuro nder gure laamiiɗo.

⁸Nde Antiyokus heɓi kubaruuji man, ɗi kayɗini mo, ɗi ɓilli mo haa o nyawi, o waali dow leeso. O suni ngam ɗum waɗaay bana no o yiɗiri ɗum waɗe.

⁹Mettamɓeramji goɗɗi mballini mo dow leeso ngo'o balɗe ɗuuɗɗe, o faami jonta kam saa'i maako waɗi.

¹⁰O ewni “sooba'en maako” fuu, o wi'i ɓe: “Mi heɓataa mi ɗaano, kultoreeŋgol ɓilli yam.

¹¹Mi tefi haa mi faama ko waɗi mi ɗon nder sooynde tammunde ngam mi nder laamu am mi woonani yimɓe e ɓe ngiɗi yam boo.

¹²Ammaa mi siftori jonta kalluɗi ɗi mbaɗmi haa Urusaliima: Mi itti nder haykaliiru kuuje marɗe kaŋŋeeri e ceede, mi umri bilaa daliila ɓe mbara yimɓe wuro Yahudiya.

¹³Mi anndi kanjum woni daliila masiibooji ɗi keɓmi jonta, mi maayan bilaa tammunde nder lesdi njananndi.”

¹⁴Nden o ɓaditini Filip, gooto nder “sooba'en laamiiɗo”, o umri mo o suklano ngomna laamu wuro man fuu.

¹⁵O hokki mo meetaleewol laamu, alkibbaare laamu e halagaare takkugo dow ɗereeji. O wi'i mo o suklano ɓiyiiko Antiyokus e o hokka mo jaŋngirde wallannde mo haa o laamo.

¹⁶Laamiiɗo Antiyokus maayi nder hitaande 149 haa Persiya.

¹⁷Nde habaru maayde maako yotti haa Lisiyas, o darni Antiyokus pamaro mo o mawnini diga nderkaaku mum bana laamiiɗo. O inndani mo Epator.

¹⁸Yaake man, konne'en wonɓe haa cuuɗi Urusaliima cemmbiɗɗi, kaɗi Yahuudu'en yiilaago kommbi haykaliiru, ɓe ɗonno tefa ɓillugo ɓe koo toy fuu e wallugo heefeerɓe.

¹⁹Yahuuda Makabe annini timmindirgo bee maɓɓe, o mooɓti jama'aare fuu ngam o hippo ɓe.

²⁰Isra'iila'en mooɓti, ɓe taari mahol cemmbiɗŋgol ngol wuro man nder hitaande 150, ɓe nyiɓi jo'inirɗum piɗorɗum e ko yibbinta mahi.

²¹Ammaa konne'en hippaaɓe woɗɓe keɓi dabare wurtaago, ɓe ndoggi bee Yahuudu'en yedduɓe Allah,

²²ɓe njehi haa laamiiɗo Antiyokus Epator, ɓe mbi'i mo: “Ndey taaskantooɗa torrugo konne'en men e mbaatantoɗa sooba'en men?

²³Minin, min njaɓi huuwango baaba ma e ɗowtanaago kiitaaji e umrooje maako.

²⁴Ngam maajum, yimɓe amin laati konne'en amin: Ko ɓuri ɓe mbari yimɓe ɓe tawi caka amin, ɓe njaɓti jawle amin.

²⁵Naa min tan ɓe toonyi ammaa lesɗe keedduɗe bee amin fuu.

²⁶Jonta boo, ɓe ɗon ngaɗa dabare hippaago mahi Urusaliima cemmbiɗɗi ngam ɓe njaɓta ngol e ɓe cemmbiɗini mahi haykaliiru e wuro Bayti-Sur.

²⁷To a yaawaay haɓgo bee maɓɓe, ɓe ngaɗan ko tulli e a waawataa darnugo ɓe.”

²⁸Nde laamiiɗo Antiyokus nani habaru maajum, o ɓerni. O mooɓti “sooba'en laamiiɗo” fuu, ardiiɓe sooje'en e wakiili'en wa'otooɓe pucci.

²⁹O wuƴi sooje'en gal gure goɗɗe e gal duuɗe Yunaniŋke'en.

³⁰Tuutawal maako ɗon mari sooje'en yahooɓe bee kosɗe ujine teemerre, ujine noogas bee pucci, nyiibi kaɓooji cappanɗe tati e ɗiɗi.

³¹Laamiiɗo e mooɓe mum taƴti caka Idume e ɓe kippi Bayti-Sur, haɓre man neeɓi balɗe seɗɗa. Ɓe nyiɓi jo'inirɗum piɗorɗum e ko yibbinta mahi, ammaa hippaaɓe keɓi laawol wurtaago, ɓe kuɓɓi yiite e ɓe kaɓi bee cuusal.

³²Nden Yahuuda acci berniwol Urusaliima, o saŋngini bee yimɓe maako haa Bayti-Zakariya tiitotirɗum bee saŋngeere laamiiɗo.

³³Jaŋngo maajum, fajiri cub, laamiiɗo yerɓi sooje'en mum bee jaawɗum dow laawol jahranŋgol haa Bayti-Zakariya, mooɓe maako ndarni caffuuji muuɗum'en, ɓe puufi algayta.

³⁴Ɓe esti nyiibi haa haɓre bee hokkugo ɗi inaboojam njillaaɗam bee ndiyam ɓiɓɓe leɗɗe ɓennduɗe.

³⁵Ɓe cennditi ɗi caka geɓe sooje'en yahooɓe bee kosɗe. Yimɓe ujineere ɓorniiɓe jamɗe e waɗɓe kifineeje jamɗe boɗeeje ɗon ndari les nyiiwa ngaye fuu. Fahin, yimɓe wa'otooɓe pucci teemeɗɗe njowo waawɓe pucci, ɗon ɗofta ndabbaawa fuu.

³⁶Ɓe ɗon ndaro haa nyiiwa fuu daroto. To nga yehi, ɓe tokko nga e ɓe daayataako nga.

³⁷Daŋki nannduki bee cuurel, ɗon haɓɓe bee callallu haa ɓaawo nyiiwa fuu ngam hisnugo sooje'en nayo wonɓe dow maaga ngam haɓgo e ɗowoowo nga.

³⁸Laamiiɗo darni luttuɓe bee pucci haa babe feere feere gal sera sooje'en: Ɓe ɗon njaha ɓilla sooje'en Yahuuda, ɓe ɗon kisna mooɓe kosɗe.

³⁹Nde njayawri naaŋge jalbiti dow ndarganaaje ɗe kaŋŋeeri e njamndi mboɗeeri, kooseeje njalbiti e ɗelki bana to yiite ulgi.

⁴⁰Mooɓre laamiiɗo ɗon dari haa caffuuji konu, woɗɓe haa towɗum, woɗɓe haa yayre. Ɓe ɗon njaha bee hoolaare e nder darnuɗum.

⁴¹Haraka yimɓe ujineeje yahooɓe bee kosɗe e balmi lukkindiranɗi caka maaji ɗon hulna nananɓe ɗum fuu: Mooɓre konu nde'e nde ɗuuɗnde e semmbiɗnde.

⁴²Yahuuda e mooɓe mum ndilli haɓoygo, nden ɓe mbari sooje'en laamiiɗo teemeɗɗe joweego.

⁴³Eli'azaaru bi'eteeɗo Awaran laari nyiiwa ngoota. Ndarganaawal laamiiɗo faddi nga, nga ɓurdi goɗɗi mawnugo, o tammo laamiiɗo ɗonno wa'i nga.

⁴⁴O annini hokkugo yoŋki maako ngam hisnugo jama'aare maako haa o heɓa innde duumiinde ɓaawo maayde maako.

⁴⁵O sorki bee cuusal caka sooje'en bee kosɗe, o wersi haa o yotti nyiiwa, o mbari yimɓe gal nyaamo maako e gal nano maako, o farti konne'en gal bakkeeje ɗiɗi fuu.

⁴⁶O sori les ndabbaawa go, o yuwi nga gal les haa nga waati. Nga do'i dow Eli'azaaru, kanyum boo maayi ton.

⁴⁷Nde Yahuudu'en annditi semmbe sooje'en laamiiɗo e tiinaare yimɓe maako, ɓe lorti ɓaawo.

⁴⁸Konne'en eggi saŋngeere laamiiɗo, ɓe mba'i Urusaliima ngam hongo Yahuudu'en. Laamiiɗo yiɗi hippugo Yahudiya e hooseere Siyona.

⁴⁹O sulhindiri tawon bee Yahuudu'en wonɓe haa Bayti-Sur. Kamɓe ɓe ngurti berniwol mum'en ngam ɓe ngalaano nyaamdu he'anndu to kippol man neeɓan: Ɗum hitaande siwtorde nde ɓe ndemataa gese maɓɓe.

⁵⁰Laamiiɗo hooci berniwol Bayti-Sur, o ɗali mooɓre ngam aynugo ngol.

⁵¹O taari haykaliiru balɗe ɗuuɗɗe, o jo'ini jo'inirɗum piɗirɗum e kuuje pusruɗe mahi, cakkinirɗum yiite, piɗirɗum kaa'e e kuuje piɗirɗe kuri e irin piɗirɗi fuu.

⁵²Yahuudu'en hippaaɓe mbaɗi kamɓe boo jamɗe goɗɗe campitooje balmi konne'en, ɓe kaɓi e haɓre man neeɓi.

⁵³Ammaa walaa nyaamdu nder cigorɗi haykaliiru ngam ɗum hitaande siwtorde e Yahuudu'en warɓe diga gure jananne nyaamdi nyaamduuji cigaaɗi fuu.

⁵⁴Ngam daliila weelo ɓilluŋgo hippaaɓe, yimɓe seɗɗa tan njooɗi nder haykaliiru, woɗɓe caŋkiti, koo moy fuu haa saare mum.

⁵⁵Wakkati maajum Lisiyas heɓi habaru no Filip warti Persiya e Mediya bee mooɓe ɗoftuɗe laamiiɗo. O nani boo o yiɗi ardanaago kuuɗe laamu. Ɗum Filip mo Antiyokus nayaɓo halfinno ɓiyum Antiyokus hiddeko o maaya ngam o hokka derkeejo oo jaŋngirde wallannde mo haa o laamo.

⁵⁶

⁵⁷Lisiyas ɗon taasko haa o dilla. O wi'i haa laamiiɗo pamaro, haa ardiiɓe sooje'en e haa sooje'en: “En ɗon tampa nde weeti fuu e gure men ɗon usto tum. Babal ngal taariiɗen ɗon saati e sey cuklanooɗen laamorde men boo.

⁵⁸Accen hongo yimɓe ɓe'e: Sulhindiren bee maɓɓe e ummaatoore maɓɓe fuu.

⁵⁹Ɗalen ɓe ɓe ngeeɗa bana no al'aadaaji maɓɓe ngiɗi bana ɓooyma. Ɓe tuurti, ɓe ngaɗi bononndaaji diga min mbili ɓe al'aadaaji maɓɓe.”

⁶⁰Laamiiɗo e ardiiɓe fuu ngerdi sawari man. Lisiyas neli dow Yahuudu'en ngam ɓe culhindira e ɓe njaɓi boo.

⁶¹Ɓaawo laamiiɗo e ardiiɓe kuni neɗɗingo narral nga'al, Yahuudu'en ngurti nder suudu maɓɓe semmbiɗndu.

⁶²Ammaa nde laamiiɗo yotti dow hooseere Siyona, o laari noy babal ngal semmbiɗinaaŋgal. O yewi alkawal ngal o huni e o umri ɓe campita mahi taariiɗi haykaliiru.

⁶³Ɓaawoɗon, o yaawi huucugo Antakiya. O tawi Filip marti berniwol. O haɓi bee maako, o jaɓti Antakiya bee semmbe.