Read Fulfulded 1 Makabe 7 Bible Online

1 Makabe 7 - Fulfulded bible

1 Makabe 7

¹Nder hitaande 151, Demetiriyus arano ɓii Selewkus teeti diga Roma. O dillidi bee yimɓe seɗɗa gal wuro wonŋgo haa daande maayo maŋngo, o waɗi hoore maako laamiiɗo.

²Wakkati o ɗon yaha gal laamorde kaakiraaɓe maako, sooje'en naŋngi Antiyokus njowaɓo bee Lisiyas haa ɓe njahrana mo yimɓe ɓe'e.

³Demetiriyus arano heɓi habaru naŋngeeki maɓɓe, ammaa o wi'i o yiɗaa laargo ɓe.

⁴Nden sooje'en mbari ɓe, Demetiriyus jooɗi dow koromwal laamu.

⁵Isra'iila'en yedduɓe Allah e faasiki'en heedi Tawreeta fuu njaawi njehi ndaari mo. Alkime giɗɗono laataago limanjo mawɗo wonno ardiiɗo maɓɓe.

⁶Yeeso laamiiɗo, ɓe njahri kaadooje dow Yahuudu'en luttuɓe, ɓe ɗon mbi'a mo: “Yahuuda bee deerɗum'en mbardi yimɓe ma fuu e ɓe parti min lesdi amin.

⁷Nel jonta goɗɗo mo kooluɗa haa o yaha o laara no ɓe mbonni gese amin e gese ɗe laamiiɗo mari. Wi' goɗɗo man o torra Yahuuda, deerɗum'en e yimɓe wallanɓe ɓe fuu.”

⁸Laamiiɗo Demetiriyus suɓi Bakides marɗo meetaleewol “soobaajo laamiiɗo”, o ardiiɗo lesɗe Siriya maŋngo. O goɗɗo tedduɗo nder lesdi man e o koolaaɗo laamiiɗo.

⁹Demetiriyus neli mo bee Alkime, goɗɗo keefeero, mo laamiiɗo waɗi mo limanjo mawɗo. O umri ɓe ɓe mbaato naawɗum ko Isra'iila'en ngaɗno.

¹⁰Bakides e Alkime ndilli bee mooɓre sooje'en ɗuuɗnde. Nde ɓe njotti Yahudiya, ɓe neli nelaaɓe haa Yahuuda e deerɗum'en ngam ɓe carga ɓe bee nufayeeje sulhu pewooji.

¹¹Ammaa Yahuudu'en yi'nooɓe ɓe ɗon ngara bee semmbe koolaaki nufayeeje sulhu maɓɓe.

¹²Ammaa woodi yeɓre moodiɓɓe Tawreeta yehi haa Alkime e Bakides ngam ɓe keɓa nufayeeje sulhu koytinanɗi.

¹³Nder Yahuudu'en, Hasidi'en ɓurdan yiɗgo waɗgo sulhu.

¹⁴Ɓe ɗon mbi'a: “Alkime, garɗo bee sooje'en laamiiɗo, ɗum limanjo mo lenyol Haruna, o toonyataako en meere.”

¹⁵Alkime yeewtidi bee maɓɓe nder jam, o huni: “Min ngalaa anniya waɗgo on kalluɗum, onon e sooba'en mon fuu.”

¹⁶Ammaa nde o heɓi hoolaare maɓɓe, o naŋngi cappanɗe joweego caka maɓɓe, o mbari ɓe nyannde man nden bana ko winnda nder defte:

¹⁷“Ɓe caŋkiti ɓalli nuɗɗinɓe ma mbaraaɓe, ɓe ndufi ƴiiƴam haa taarde Urusaliima e walaa goɗɗo gooto wari uwi ɓe.”

¹⁸Nden yimɓe wuro fuu kultori. Ɓe ɗon mbi'a: “Yimɓe ɓe'e, ɓe fewooɓe e sooyɓe adilaaku ngam ɓe njottinaay alkawal ngal en ngaɗi e ɓe piisti hunayeere nde ɓe ngaɗi.”

¹⁹Bakides acci Urusaliima e saŋngini haa Bayti-Zayit. O naŋngi yimɓe ɗuuɗɓe saalinooɓe gal maako bee Yahuudu'en woɗɓe boo. O mbari ɓe, o sakkini ɓe nder ɓulndu mawndu.

²⁰O halfini jahargal lesdi haa Alkime, o ɗalani mo mooɓe sooje'en ngam wallugo mo, nden o lorti haa laamiiɗo.

²¹Alkime waɗi dabareeji mum fuu haa ɓe anndita mo bana limanjo mawɗo.

²²Nden waɗanɓe fitina nder jama'aare fuu kawtani mo. Ɓe koo'i Yahudiya e ɓe torri Isra'iila'en jamum.

²³Yahuuda faami Alkime bee yimɓe maako ɗon torra Isra'iila'en ko ɓuri torra ka heefeerɓe torriri ɓe.

²⁴O yiili gure Yahudiya fuu ngam o torra faasiki'en hawtananɓe Alkime, o haɗa ɓe yiilaago nder gure lesdi maako.

²⁵Alkime faami Yahuuda e yimɓe mum ɗon ngarta semmbiɗɓe, o waawataa haɓre bee maɓɓe. Daliila man o lorti haa laamiiɗo o fewani ɓe ɓe ɗon ngaɗa bononnda.

²⁶Nikanor, mawɗo ardiiɓe sooje'en, tedduɗo nder laamu man, monni Isra'iila masin. Laamiiɗo neli mo, umri mo o wila jama'aare nde'e.

²⁷Nikanor yotti Urusaliima bee mooɓe ɗuuɗɗe. Ngam sargugo Yahuuda e deerɗum'en, o wari bee nufayeeje sulhu pewooji. O wi'i ɓe:

²⁸“Walaa jokkirgol caka am bee mooɗon. Mi ɗon wara haa mooɗon bee sooje'en seɗɗa ngam keɓen giidal soobaaku.”

²⁹Nde Nikanor wari haa Yahuuda, ɓe koofnotiri bana soobiraaɓe. Ammaa konne'en ɗon taaski haa ɓe naŋnga Yahuuda.

³⁰Yahuuda boo faami woodi tuufnorgol nder kawtal nga'al. O hultori, o sali juutingo giidal man bee Nikanor.

³¹Nde Nikanor boo faami dabare mum fiistake, o acci Urusaliima, o dilli hongo Yahuuda haa les Kafarsalaama.

³²Yimɓe ko dillani teemeɗɗe njowo caka sooje'en Nikanor mbaraama, luttuɓe boo ndoggi ndilli berniwol Daawuda.

³³Ɓaawoɗon, Nikanor wa'i hooseere Siyona. Liman'en e ndotti'en jama'aare ngurti haa haykaliiru ngam hoofnugo mo bee koofŋgol salaaman e hollugo mo nguleteeŋga nga ɓe lii'anto Allah ngam laamiiɗo.

³⁴Nikanor yawi ɓe, o jali ɓe e tuuti tuuɗe dow maɓɓe, o soɓni ɓe. O wolwani ɓe bee mawnitaare.

³⁵O wi'i ɓe bee caatal hunayeere nde'e: “To on ndokkaay yam hannde Yahuuda bee sooje'en mum, mi huni mi lortan mi wula haykaliiru ndu to konu timmi.” O dilli, o ɗon ɓerni.

³⁶Liman'en lorti nder daldal, ɓe ɗon ndari, ɓe ɗon tiiti hirsirde e pellel ceniiŋgel, ɓe mboyi, ɓe mbi'i:

³⁷“Yaa Jawmiraawo, an suɓi babal nga'al haa ngal laato ngal maaɗa, ngal laato suudu tornde e do'aare ngam jama'aare ma.

³⁸Torru goɗɗo oo e sooje'en maako. Mbar ɓe nder haɓre nde'e. Siftor kuudi maɓɓe e taa ɗal ɓe, ɓe ngeeɗa.”

³⁹Nikanor dilli diga Urusaliima, o saŋngini haa Bayti-Horon, mooɓe ummiiɗe diga Siriya ngari, kawtani mo.

⁴⁰Yahuuda, kanyum boo, saŋngini haa Hadasa bee yimɓe ujine tato. O waɗi tornde nde'e:

⁴¹“Yaa Jawmiraawo, nyannde feere, nelaaɓe laamiiɗo, kuɗi ma. Nden malaa'ikaajo ma waŋgi, nattini sooje'en maako ujine teemerre e cappanɗe njoweetato e njowo.

⁴²Bana nii boo, wirgu sooje'en wonɓe yeeso amin hannde. Luttanɓe bee yoŋki, annditan an torri Nikanor ngam o huɗi haykaliiru maaɗa seniindu. Hiitu mo fodde halleende maako.”

⁴³Sooje'en puɗɗi konu, nyalɗe sappo e tati lewru Adar, sooje'en Nikanor njaalaama. kaŋko laati arano nder mbaraaɓe haa konu man.

⁴⁴Nde sooje'en maako ndaari o maayi, ɓe ngudini balmi maɓɓe, ɓe ndoggi.

⁴⁵Yahuudu'en taasni ɓe deydey nyalaade woore diga Hadasa haa Gezer, ɓe ɗon puufa algayta.

⁴⁶Yimɓe ngurti nder gure Yahudiya fuu e gure taariiɗe: Ɓe ɗon kippo konne'en koo toy fuu e ɓe ɗon ngerɓa oo dow oya. Sooje'en Nikanor fuu mbaraama nder haɓre, koo gooto daɗaay.

⁴⁷Yahuudu'en kooci balmi e jawdi ndi konne'en ɗali. Ɓe ta'i hoore Nikanor e juŋngo mum nyaamo ngo o ɓaŋgtino bee mawnitaare. Ɓe hoosi ɗum ngam ɓe cappina ɗum yimɓe wuro Urusaliima.

⁴⁸Yimɓe fuu keewi seyo, nyannde man warti bana juulde mawnde.

⁴⁹Yahuudu'en annini waɗgo juulde hitaande fuu to nyannde man yaali, waato nyalde sappo e tataɓre nder lewru Adar.

⁵⁰Yahudiya heɓi jam wakkati seɗɗa.